ફિફા વર્લ્ડ કપ 2026 માટે હાલમાં રાઉન્ડ ઓફ 32 મેચ ચાલી રહી છે,જેમાં કુલ સાત ટીમોએ રાઉન્ડ ઓફ 16માં પોતાનું સ્થાન સુરક્ષિત કર્યું છે.આમાં બે ટીમો યજમાન મેક્સિકો અને નોર્વેનો સમાવેશ થાય છે,જે 28 વર્ષ પછી વર્લ્ડ કપમાં ભાગ લઈ રહી છે.નોર્વેએ તેમના રાઉન્ડ ઓફ 32 મેચમાં આઇવરી કોસ્ટનો સામનો કર્યો હતો, જેમાં 2-1 ના માર્જિનથી જીત મેળવી હતી.યજમાન મેક્સિકોએ 1 જુલાઈના રોજ સવારે ભારતીય સમય મુજબ ઇક્વાડોર સામે 2-0 ના માર્જિનથી પોતાની રાઉન્ડ ઓફ 32 મેચ જીતીને આગામી રાઉન્ડમાં સ્થાન સુરક્ષિત કર્યું હતું.
આઇવરી કોસ્ટ સામેની મેચમાં હાલેન્ડનો જાદુ
1998 માં ફિફા વર્લ્ડ કપમાં છેલ્લે ભાગ લેનાર નોર્વેએ રાઉન્ડ ઓફ 32 મેચમાં આઇવરી કોસ્ટનો સામનો કર્યો હતો. નોર્વેએ મજબૂત શરૂઆત કરી હતી, જેમાં એન્ટોનિયો નુસાએ પ્રથમ હાફની 39મી મિનિટમાં શાનદાર ગોલ કરીને તેમને 1-0 ની લીડ અપાવી હતી. નોર્વેએ પ્રથમ હાફ પછી પણ પોતાની લીડ જાળવી રાખી હતી. બીજા હાફની શરૂઆત થતાં જ, આઇવરી કોસ્ટના અમાદ ડાયલોએ ગોલ કરીને મેચ 1-1થી બરાબર કરી દીધી, જેનાથી મેચ રોમાંચક બની ગઈ. બધાની નજર નોર્વેના સ્ટાર ખેલાડી હાલેન્ડ પર હતી, જેણે 86મી મિનિટે પોતાનો જાદુ બતાવીને ગોલ કરીને પોતાની ટીમને 2-1ની લીડ અપાવી અને વિજય મેળવ્યો. ફિફા વર્લ્ડ કપના ઇતિહાસમાં પહેલી વાર, નોર્વેએ રાઉન્ડ ઓફ 16માં સ્થાન મેળવ્યું છે. તેઓ હવે 6 જુલાઈએ ભારતીય સમય મુજબ સવારે 1:30 વાગ્યે બ્રાઝિલનો સામનો કરશે.
