Under-18 એશિયા કપ હોકી ટુર્નામેન્ટ હવે તેના સૌથી રોમાંચક તબક્કામાં પહોંચી ગઈ છે. આ પ્રતિષ્ઠિત ટુર્નામેન્ટની હાઈ-વોલ્ટેજ સેમિફાઇનલ મેચમાં પરંપરાગત હરીફ ભારત અને પાકિસ્તાન આજે શુક્રવારના રોજ આમને-સામને ટકરાશે. ફાઇનલમાં સ્થાન મેળવવા કટ્ટર હરીફો વચ્ચે જોરદાર અને રોમાંચક મુકાબલો જોવા મળે તેવી પૂરેપૂરી સંભાવના છે. પૂલ સ્ટેજની ચારમાંથી ત્રણ મેચોમાં શાનદાર જીત મેળવીને ભારતે અંતિમ ચારમાં પોતાનું સ્થાન પાકું કર્યું છે. જોકે, ટુર્નામેન્ટ દરમિયાન જાપાન સામે ભારતને હારનો સામનો કરવો પડ્યો હતો, પરંતુ ભારતીય યુવા બ્રિગેડે તેમાંથી ઝડપથી બોધપાઠ લઈને શાનદાર વાપસી કરી બતાવી છે.
એશિયા કપમાં ભારતીય ટીમનું શાનદાર પ્રદર્શન
ભારતીય પુરુષ ટીમે અત્યાર સુધી આ ટુર્નામેન્ટમાં અત્યંત પ્રભાવશાળી પ્રદર્શન કર્યું છે. એશિયા કપમાં પોતાની પ્રથમ મેચમાં ભારતીય બ્રિગેડે કઝાકિસ્તાનને ૧૩-૦થી સજ્જડ હાર આપી હતી. ત્યારપછીની મેચમાં જાપાન સામે ૨-૪થી પરાજય વેઠવો પડ્યો હતો. જોકે, આંચકામાંથી બહાર આવીને ભારતે મજબૂત રમત રમી અને કોરિયાને ૪-૧થી તેમજ ચાઇનીઝ તાઈપેઈને ૧૩-૧ના વિશાળ અંતરથી હરાવીને એકતરફી વિજય મેળવ્યો હતો. આ આખી ટુર્નામેન્ટમાં ભારતીય ફોરવર્ડ લાઈન અને ડિફેન્સ બંને મજબૂત દેખાયા છે.
