ભારતીય પેરા-એથ્લીટ અનમોલ વશિષ્ઠ પર ઇન્ટરનેશનલ પેરાલિમ્પિક કમિટી (IPC)એ 3 વર્ષનો પ્રતિબંધ લગાવ્યો છે. અનમોલ વશિષ્ઠ જેવલિન થ્રો (ભાલા ફેંક) સ્પર્ધામાં ભાગ લે છે. માર્ચ 2026માં નવી દિલ્હીમાં યોજાયેલી વર્લ્ડ પેરા એથ્લેટિક્સ ગ્રાન્ડ પ્રિક્સ દરમિયાન લેવામાં આવેલા તેના યુરિન સેમ્પલમાં પ્રતિબંધિત પદાર્થના અંશ મળી આવ્યા હતા. આ સેમ્પલ 11 માર્ચે પુરુષોની જેવલિન થ્રો F55 સ્પર્ધા દરમિયાન લેવામાં આવ્યો હતો. તપાસમાં ડિહાઇડ્રોક્લોરોમિથાઇલ-ટેસ્ટોસ્ટેરોન (DHCMT) નામના એનાબોલિક સ્ટેરોઇડના મેટાબોલાઇટની હાજરી મળી હતી. આ પદાર્થ વર્લ્ડ એન્ટી-ડોપિંગ એજન્સી (WADA)ની 2026ની પ્રતિબંધિત પદાર્થોની યાદીમાં સામેલ છે.
24 એપ્રિલથી પ્રતિબંધ લાગુ
IPCએ અનમોલને 24 એપ્રિલ 2026ના રોજ કામચલાઉ સસ્પેન્ડ કર્યો હતો. ત્યારબાદ અનમોલે ડોપિંગના નિયમોના ઉલ્લંઘન અને IPC દ્વારા સૂચવવામાં આવેલા પરિણામોનો સ્વીકાર કર્યો હતો. હવે તેના પર 24 એપ્રિલ 2026થી 23 એપ્રિલ 2029 સુધી પ્રતિબંધ રહેશે. આ સમયગાળા દરમિયાન તે કોઈ પણ સ્પર્ધામાં ભાગ લઈ શકશે નહીં અને અન્ય રમતગમતની પ્રવૃત્તિઓમાં પણ સામેલ થઈ શકશે નહીં. જોકે, અધિકૃત એન્ટી-ડોપિંગ શિક્ષણ અથવા પુનર્વસન કાર્યક્રમોમાં ભાગ લેવાની છૂટ રહેશે.
મેડલ અને ઇનામ પણ ગુમાવશે
આ કાર્યવાહીથી અનમોલના નવી દિલ્હીમાં યોજાયેલી ગ્રાન્ડ પ્રિક્સના પરિણામો પર પણ અસર પડી છે. પુરુષોની જેવલિન થ્રો F55 સ્પર્ધામાં તેનું પરિણામ રદ કરવામાં આવ્યું છે. આ ઉપરાંત, તે ટૂર્નામેન્ટમાં મેળવેલા અન્ય તમામ પરિણામો પણ રદ કરવામાં આવ્યા છે. પરિણામો રદ થવાને કારણે તેના મેડલ, પોઇન્ટ અને ઇનામ પણ પાછાં લેવામાં આવશે. સેમ્પલ લેવામાં આવ્યા તે તારીખથી લઈને કામચલાઉ સસ્પેન્શન લાગુ થયું ત્યાં સુધીના તેના અન્ય પરિણામો પણ રદ કરવામાં આવ્યા છે.
ડોપિંગના નિયમો અંગે IPCનું વલણ
IPCએ સ્પષ્ટ કર્યું છે કે ખેલાડીઓના સેમ્પલમાં પ્રતિબંધિત પદાર્થ મળી આવે તો તેના માટે ખેલાડીઓ જવાબદાર ગણાય છે. પદાર્થ જાણીજોઈને લેવામાં આવ્યો હોય કે અજાણતાં શરીરમાં પહોંચ્યો હોય, તેનાથી નિયમોના ઉલ્લંઘન અંગેની જવાબદારી આપમેળે દૂર થતી નથી. IPCએ એન્ટી-ડોપિંગ નિયમોનું પાલન કરાવવા અને રમતગમતમાં પ્રતિબંધિત પદાર્થોનો ઉપયોગ અટકાવવા પોતાની પ્રતિબદ્ધતા પણ વ્યક્ત કરી છે.
અનમોલ વશિષ્ઠ પરનો આ પ્રતિબંધ ભારતીય પેરા-એથ્લેટિક્સ માટે મોટો ઝટકો છે. હવે તે એપ્રિલ 2029 સુધી સ્પર્ધાત્મક રમતગમતમાં ભાગ લઈ શકશે નહીં.
આ પણ વાંચો: FIFAe Finals 2026 ટૂર્નામેન્ટ મોકૂફ, સાઉદી અરેબિયામાં હુમલા બાદ નિર્ણય
