ભારતીય રમતજગતની સૌથી મહત્વની સંસ્થાઓમાંની એક ભારતીય ઓલિમ્પિક સંઘ (IOA)ના નવા પ્રમુખ કોણ બનશે તે અંગેની સ્પર્ધા હવે વધુ રસપ્રદ બની રહી છે. અગાઉ ઓલિમ્પિક મેડલ વિજેતા શૂટર ગગન નારંગનું નામ પ્રમુખપદના મુખ્ય દાવેદાર તરીકે ચર્ચામાં હતું. હવે IOAના પૂર્વ મહાસચિવ રાજીવ મહેતાએ પણ ચૂંટણી લડવાનો નિર્ણય કર્યો છે. તેઓ સોમવારે ઉમેદવારી નોંધાવે તેવી શક્યતા છે. બીજી તરફ, વર્તમાન પ્રમુખ પી.ટી. ઉષા પણ ફરી ચૂંટણી લડી શકે છે. 5 ડિસેમ્બરે યોજાનારી આ ચૂંટણીમાં દેશના રમતગમત વહીવટની આગામી દિશા નક્કી થશે.

રાજીવ મહેતા સોમવારે નોંધાવશે ઉમેદવારી

પીટીઆઈના અહેવાલ મુજબ, રાજીવ મહેતાએ પ્રમુખપદની ચૂંટણી લડવાનું લગભગ નક્કી કરી લીધું છે. તેમની નજીકના એક સૂત્રએ જણાવ્યું કે તેઓ સોમવારે ઉમેદવારીપત્ર ભરી શકે છે. રાજીવ મહેતા 2014થી 2022 સુધી ભારતીય ઓલિમ્પિક સંઘના મહાસચિવ રહી ચૂક્યા છે. હાલમાં તેઓ ભારતીય ફેન્સિંગ સંઘ અને એશિયન ફેન્સિંગ સંઘના મહાસચિવ છે. મહેતાએ ચૂંટણી નિષ્પક્ષ અને પારદર્શક રીતે યોજાય તેમજ ઓલિમ્પિક ચાર્ટર હેઠળ IOAની સ્વાયત્તતા જળવાય તેવી અપેક્ષા વ્યક્ત કરી છે.

ગગન નારંગ પણ પ્રમુખપદના દાવેદાર

ઓલિમ્પિક મેડલ વિજેતા શૂટર અને IOAના ઉપપ્રમુખ ગગન નારંગને પ્રમુખપદના મુખ્ય દાવેદાર તરીકે જોવામાં આવી રહ્યા છે. 22 નવેમ્બરના અહેવાલોમાં તેમને સંભવિત પસંદગીના ઉમેદવાર તરીકે પણ દર્શાવવામાં આવ્યા છે. બીજી તરફ, વર્તમાન પ્રમુખ પી.ટી. ઉષાએ પણ ફરી ચૂંટણી લડવાની શક્યતા જાળવી રાખી છે. તેઓ આઇસ હોકી એસોસિયેશન ઓફ ઇન્ડિયાના પ્રતિનિધિ તરીકે જનરલ બોડીમાં સામેલ થયાં છે. પૂર્વ એથ્લેટિક્સ ફેડરેશન પ્રમુખ અદિલે સુમરીવાલાનું નામ પણ ચર્ચામાં છે. આથી પ્રમુખપદની ચૂંટણીમાં એકથી વધુ દાવેદારો વચ્ચે સ્પર્ધા થવાની શક્યતા છે. જોકે, અંતિમ ચિત્ર ઉમેદવારીપત્રોની ચકાસણી અને ઉમેદવારી પાછી ખેંચવાની પ્રક્રિયા પૂરી થયા બાદ સ્પષ્ટ થશે.

71 સભ્યો કરશે મતદાન

IOAની ચૂંટણી માટે મતદાર મંડળમાં કુલ 71 સભ્યો છે. તેમાં 30 રાષ્ટ્રીય રમત મહાસંઘોના 60 પ્રતિનિધિઓ, રમતવીરોની શ્રેણીમાંથી ચૂંટાયેલા 8 પ્રતિનિધિઓ, ખેલાડીઓના આયોગના 2 સભ્યો મીરાબાઈ ચાનુ અને સાજન પ્રકાશ તથા ભારતમાં IOCના સભ્ય નીતા અંબાણીનો સમાવેશ થાય છે. આ 71માંથી મીરાબાઈ ચાનુ, સાજન પ્રકાશ અને નીતા અંબાણી મતદાન કરી શકશે, પરંતુ ચૂંટણી લડી શકશે નહીં. બાકીના 68 સભ્યો નિયમો મુજબ મતદાન અને ઉમેદવારી બંને માટે પાત્ર છે.

5 ડિસેમ્બરે થશે ચૂંટણી

IOAમાં પ્રમુખ, વરિષ્ઠ ઉપપ્રમુખ, બે ઉપપ્રમુખ, ખજાનચી, બે સંયુક્ત સચિવ અને કાર્યકારી પરિષદના છ અન્ય સભ્યો માટે ચૂંટણી યોજાશે. ઉમેદવારીપત્રો ભરવાની છેલ્લી તારીખ 24 નવેમ્બર છે. 24 નવેમ્બરે ઉમેદવારીની પ્રાથમિક યાદી જાહેર થશે. ચકાસણી અને વાંધાઓની પ્રક્રિયા બાદ 1 ડિસેમ્બરે અંતિમ ઉમેદવારોની યાદી આવશે. ઉમેદવારી પાછી ખેંચવાની છેલ્લી તારીખ 2 ડિસેમ્બર છે અને અંતિમ યાદી 3 ડિસેમ્બરે જાહેર થશે. મતદાન, મતગણતરી અને પરિણામની જાહેરાત 5 ડિસેમ્બરે થશે.

આ ચૂંટણી એટલા માટે પણ મહત્વની છે કે અમદાવાદમાં 2030ની કોમનવેલ્થ ગેમ્સ યોજાવાની છે અને ભારત 2036 ઓલિમ્પિક્સની યજમાની મેળવવાનો પ્રયાસ કરી રહ્યું છે. નવા પ્રમુખ અને કાર્યકારી પરિષદની જવાબદારી આ બંને મહત્વાકાંક્ષી રમતગમત યોજનાઓના સંદર્ભમાં પણ મહત્વની રહેશે.

આ પણ વાંચો: Real Madrid: ચેમ્પિયન્સ લીગ જોવા નહીં લેવી પડે સબ્સ્ક્રિપ્શન, ભારતમાં ફ્રી સ્ટ્રીમિંગની તૈયારી!