ભારતીય ટીમને મહિલા હોકી વર્લ્ડ કપ 2026ના બીજા રાઉન્ડના પહેલા મેચમાં નેધરલેન્ડ્સ સામે 2-0 થી હારનો સામનો કરવો પડ્યો હતો.કેપ્ટન સલીમા ટેટેએ ટીમને ગોલ-સ્કોરિંગ પ્રયાસ તરફ દોરી હતી,પરંતુ ભારતીય ખેલાડીઓ ડચના મજબૂત ડિફેન્સને ભેદવામાં અસમર્થ રહી હતી.ડચ ખેલાડીઓએ સમગ્ર મેચ દરમિયાન શાનદાર અને આક્રમક રમત દર્શાવી,પોતાનું વર્ચસ્વ જાળવી રાખ્યું.મોટાભાગની મેચમાં તેમનો કબજો હતો.
નેધરલેન્ડ્સના ખેલાડીઓએ ઉત્તમ પ્રદર્શન કર્યું
નેધરલેન્ડ્સે આ મહિલા હોકી વર્લ્ડ કપ 2026 મેચની શરૂઆતથી જ પોતાનું વર્ચસ્વ જાળવી રાખ્યું હતું. રમતના બીજા મિનિટે, યબ્બી જેન્સેનએ પેનલ્ટી કોર્નરથી ગોલ કરીને નેધરલેન્ડ્સને 1-0 ની લીડ અપાવી, જેના કારણે ભારતીય ટીમ પ્રથમ ક્વાર્ટરના અંતે 0-1 થી પાછળ રહી ગઈ. બીજા ક્વાર્ટરમાં કોઈ પણ ટીમ ગોલ કરી શકી નહીં, અને નેધરલેન્ડ્સે હાફટાઇમ સુધી 1-0 ની લીડ જાળવી રાખી.
નેધરલેન્ડ્સે ત્રીજા ક્વાર્ટરમાં પોતાનો બીજો ગોલ કર્યો
નેધરલેન્ડ્સે ત્રીજા ક્વાર્ટરમાં બીજો ગોલ કર્યો. મેચની 38મી મિનિટે, માલ્ટાએ પેનલ્ટી કોર્નરને ગોલ કરીને નેધરલેન્ડ્સને 2-0ની મજબૂત લીડ અપાવી. ત્રીજા ક્વાર્ટરના અંત સુધી સ્કોર 2-0 નેધરલેન્ડ્સના પક્ષમાં રહ્યો. ત્યારબાદ ભારતીય ટીમે ચોથા અને અંતિમ ક્વાર્ટરમાં વાપસી કરવાનો શ્રેષ્ઠ પ્રયાસ કર્યો, પરંતુ તેઓ ડચના મજબૂત ડિફેન્સને તોડી શક્યા નહીં, અને ભારતને 2-0 થી હારનો સામનો કરવો પડ્યો.
ભારતીય ટીમનો સેમિફાઇનલમાં પહોંચવાનો માર્ગ મુશ્કેલ બન્યો
બીજા રાઉન્ડની પહેલી મેચ હાર્યા બાદ, ભારતીય મહિલા હોકી ટીમનો સેમિફાઇનલમાં પ્રવેશ હવે અત્યંત મુશ્કેલ લાગે છે. જોકે, ટીમને ઓસ્ટ્રેલિયા સામે હજુ એક મેચ રમવાની બાકી છે. ભારત હવે આગળ વધશે કે નહીં તે અન્ય ટીમોની મેચોના પરિણામો પર આધાર રાખે છે. અગાઉ, ભારતીય ટીમ તેના ગ્રુપમાં અજેય રહીને ટોપ-8 માં સ્થાન મેળવવામાં સફળ રહી હતી.ભારતીય કેપ્ટન સલીમા ટેટેએ મેચ પછી ટીમના સંઘર્ષ અને થાક વિશે વાત કરી. તેમણે સમજાવ્યું કે ખેલાડીઓ સતત મેચ રમીને શારીરિક રીતે થાકી ગઈ હતી, જેના કારણે પરિસ્થિતિઓ મુશ્કેલ બની ગઈ હતી. આમ છતાં, ખેલાડીઓએ છેલ્લી સીટી સુધી સખત લડત આપી.
આ પણ વાંચો - Kate Cross : ઈંગ્લેન્ડની સ્ટાર ખેલાડી કેટ ક્રોસે નિવૃત્તિની કરી જાહેર
