- ક્રિસ ગેલ અને શોએબ મલિક આ રેકોર્ડ બનાવનારા ખેલાડીઓ છે
- શોએબે કુલ 526 ટી20માં 13010 રન બનાવી રચ્યો ઈતિહાસ
- પાકિસ્તાની ક્રિકેટર પહેલાંથી જ ટેસ્ટ અને વનડેમાંથી સંન્યાસ લઈ ચૂક્યા છે
ભારતીય ટેનિસ સ્ટાર સાનિયા મિર્ઝાની સાથે છૂટાછેડાની અફવાઓ વચ્ચે પાકિસ્તાન ક્રિકેટ ટીમના ખેલાડી શોએબ મલિકે જ્યારથી અભિનેત્રી સના જાવેદ સાથેના લગ્નની જાહેરાત કરી છે ત્યારથી તે ચર્ચામાં છે. જ્યારે મેદાનની બહાર ઈન્ટરનેટ પર શોએબ અને સનાના લગ્નની ચર્ચા છે, ત્યારે ક્રિકેટના મેદાન પર શોએબ મલિકે એક મોટો રેકોર્ડ પોતાના નામે કરી લીધો છે. શોએબ મલિક T20 ક્રિકેટમાં 13,000 રન બનાવનાર પ્રથમ એશિયન અને એકંદરે બીજો ખેલાડી બન્યો. તેણે બાંગ્લાદેશ પ્રીમિયર લીગ (BPL)માં રંગપુર રાઇડર્સ સામે ફોર્ચ્યુન બરીશાલ મેચ દરમિયાન આ સિદ્ધિ મેળવી હતી. શોએબ મલિકે મેચમાં એક વિકેટ લઈને પોતાની ટીમને જીત અપાવવામાં મહત્વની ભૂમિકા ભજવી હતી.
કુલ 526 T20 મેચ રમી, પણ સદી એકપણ નહીં
શોએબ મલિકે કુલ 526 T20 મેચ રમી છે જેમાં તેણે 36.44ની એવરેજ અને 127.72ની સ્ટ્રાઈક રેટથી 13010 રન બનાવ્યા છે. આ દરમિયાન શોએબ મલિક એકપણ સદી ફટકારી શક્યો નથી. જો કે, તેણે આ ફોર્મેટમાં ચોક્કસપણે 82 અડધી સદી ફટકારી છે. ટી20માં શોએબ મલિકનો સર્વોચ્ચ સ્કોર અણનમ 95 રન છે. ટી20માં સૌથી વધુ રન બનાવનાર બેટ્સમેન ક્રિસ ગેલ છે. ક્રિસ ગેલે 463 મેચમાં 36.22ની એવરેજ અને 144.75ની સ્ટ્રાઈક રેટથી 14562 રન બનાવ્યા છે. ક્રિસ ગેલે આ ફોર્મેટમાં 22 સદી અને 88 અડધી સદી ફટકારી છે. માત્ર ક્રિસ ગેલ અને શોએબ મલિક જ 13 હજાર ટી20 રનનો આંકડો પાર કરી શક્યા છે.
ખેલાડીએ શનિવારે પાકિસ્તાની અભિનેત્રી સના જાવેદ સાથે લગ્ન કર્યા
પાકિસ્તાની ક્રિકેટર ટેસ્ટ અને ODI ક્રિકેટમાંથી પહેલેથી જ નિવૃત્તિ લઈ ચૂક્યો છે, પરંતુ તે રમતના સૌથી ટૂંકા ફોર્મેટમાં રમે છે અને T20 વર્લ્ડ કપ 2024માં પસંદગી માટે હાજર છે. શોએબ મલિકે શનિવારે સોશિયલ મીડિયા દ્વારા પાકિસ્તાનની લોકપ્રિય અભિનેત્રી સના જાવેદ સાથેના લગ્નની જાહેરાત કરી હતી. આ ક્રિકેટરે સોશિયલ મીડિયા પ્લેટફોર્મ પર તેની નવી પત્ની સાથેના લગ્નનો ફોટો જાહેર કર્યો છે.
સાનિયા મિર્ઝા અને શોએબ મલિકના છૂટાછેડાના સમાચાર ઘણા સમયથી આવી રહ્યા હતા. વર્ષ 2022 થી એવી અફવાઓ ચાલી રહી છે કે 41 વર્ષીય શોએબ અને સાનિયા વચ્ચે મતભેદો છે અને બંને જલ્દી અલગ થઈ શકે છે. શોએબ મલિકે થોડા દિવસો પહેલા ઈન્સ્ટાગ્રામ પર ભારતીય સ્ટારને અનફોલો કરી દીધો હતો. તેનો પાંચ વર્ષનો પુત્ર ઇઝાન સાનિયા સાથે રહે છે. સાનિયાએ છૂટાછેડાની કાર્યવાહી શરૂ કરી દીધી છે. શોએબ અને સાનિયાએ એપ્રિલ 2010માં ભારતીય ખેલાડીના હોમટાઉન હૈદરાબાદમાં લગ્ન કર્યા હતા અને તેઓ દુબઈમાં રહેતા હતા.
