મુંબઈ ઈન્ડિયન્સને મળશે નવો કોચ, વર્લ્ડકપ વિજેતા ભારતીય ટીમને આપ્યું છે કોચિંગ

IPL 2025 પહેલા યોજાનારી મેગા હરાજી માટે તમામ ફ્રેન્ચાઈઝી તેમની તૈયારીઓમાં વ્યસ્ત છે. કોચ, કેપ્ટન બદલવાથી લઈને ખેલાડીઓની રિટેન્શન લિસ્ટ સુધી, ફ્રેન્ચાઈઝી તેને તૈયાર કરી રહી છે. હવે IPLની સૌથી સફળ ટીમ મુંબઈ ઈન્ડિયન્સને ટૂંક સમયમાં નવો કોચ મળવા જઈ રહ્યો છે. મુંબઈ ઈન્ડિયન્સ જેમને આ મોટી જવાબદારી સોંપવા જઈ રહી છે તે દિગ્ગજે T20 વર્લ્ડકપ 2024ની વિજેતા ભારતીય ટીમને કોચિંગ આપ્યું છે.

પારસ મ્હામ્બરે MIના નવા બોલિંગ કોચ બનશે!

એક અહેવાલ મુજબ ટીમ ઈન્ડિયાના પૂર્વ બોલિંગ કોચ પારસ મ્હામ્બરે મુંબઈ ઈન્ડિયન્સના નવા બોલિંગ કોચ બન્યા છે. જોકે, મુંબઈ ઈન્ડિયન્સ દ્વારા આ અંગેની સત્તાવાર માહિતી હજુ આપવામાં આવી નથી. પારસે લાંબા સમયથી ટીમ ઈન્ડિયાના બોલરોને કોચિંગ આપ્યું છે. પારસે T20 વર્લ્ડકપ 2024માં ટીમ ઈન્ડિયાના બોલરોને તૈયાર કર્યા હતા.

રિપોર્ટ અનુસાર, ભૂતપૂર્વ ભારતીય બોલિંગ કોચ લસિથ મલિંગા અને ટીએ શેખર સાથે પાંચ વખતની ચેમ્પિયન ટીમ માટે નવી ભૂમિકામાં જોડાશે. મ્હામ્બરેની વરણીની સત્તાવાર જાહેરાત હજુ સુધી કરવામાં આવી નથી, પરંતુ તે ટીમ સાથે 'લિંક' હોવાનું માનવામાં આવે છે.

MIનું ગત સિઝનમાં ખરાબ પ્રદર્શન રહ્યું હતું

IPL 2024માં ખરાબ પ્રદર્શન બાદ મુંબઈ ઈન્ડિયન્સ IPL 2025માં વાપસી કરવા ઈચ્છે છે. મુંબઈ ઈન્ડિયન્સના બોલિંગ આક્રમણની આગેવાની જસપ્રીત બુમરાહ કરી રહ્યો છે, જે આ સમયે તમામ ફોર્મેટમાં શ્રેષ્ઠ બોલરોમાંનો એક છે. ટીમ ઈન્ડિયામાં તેના દિવસોથી જ બુમરાહ સાથે મ્હામ્બરેના જોડાણથી IPL 2025માં તેના પ્રદર્શનમાં વધુ સુધારો થવાની અપેક્ષા છે.