Paris Olympic 2024: IOC ચીફે દક્ષિણ કોરિયાના રાષ્ટ્રપતિની માંગી માફી, જાણો કારણ

• ઓલિમ્પિકના ઉદ્ઘાટન સમારોહ દરમિયાન એક મોટી ભૂલ થઈ
  
• દક્ષિણ કોરિયાની ટીમને ઉત્તર કોરિયા તરીકે સંબોધવામાં આવી
• આ ભૂલને લઈને દક્ષિણ કોરિયાના લોકોએ ગુસ્સો વ્યક્ત કર્યો

ફ્રાન્સની રાજધાની પેરિસમાં શુક્રવારે આયોજિત ઓલિમ્પિકના ઉદ્ઘાટન સમારોહ દરમિયાન એક મોટી ભૂલ થઈ છે. સમારોહમાં પરેડ ઓફ નેશન્સ દરમિયાન દક્ષિણ કોરિયાની ટીમને ઉત્તર કોરિયા તરીકે સંબોધવામાં આવી હતી. ઓલિમ્પિકમાં થયેલી આ ભૂલને લઈને દક્ષિણ કોરિયાના લોકોમાં ઘણો ગુસ્સો છે, જે બાદ ઓલિમ્પિક સમિતિએ ઔપચારિક રીતે માફી માંગી છે.

આ કારણે થયો વિવાદ

પેરિસ ઓલિમ્પિકના ઉદઘાટન સમારોહ દરમિયાન 6 કિલોમીટરની પરેડ સીન નદી પરના ઓસ્ટરલિટ્ઝ બ્રિજથી શરૂ થઈ હતી. જ્યારે દક્ષિણ કોરિયાની ટીમ ભવ્ય બોટ પર પરેડમાં પ્રવેશી ત્યારે દક્ષિણ કોરિયાને ફ્રેન્ચ અને અંગ્રેજી બંને ભાષામાં ડેમોક્રેટિક પીપલ્સ રિપબ્લિક ઓફ કોરિયા કહેવામાં આવ્યું હતું. તમને જણાવી દઈએ કે આ ઉત્તર કોરિયાનું સત્તાવાર નામ છે.

આ ઘટના પર નારાજગી વ્યક્ત કરતા દક્ષિણ કોરિયાએ પોતાનો વાંધો ઉઠાવ્યો હતો. આ પછી ઓલિમ્પિક સમિતિએ આ ઘટના પર ખેદ વ્યક્ત કર્યો અને માફી માંગી અને ખાતરી આપી કે ભવિષ્યમાં આવી ઘટના નહીં બને.

IOC ચીફે દક્ષિણ કોરિયાના રાષ્ટ્રપતિ સાથે વાત કરી

ઈન્ટરનેશનલ ઓલિમ્પિક કમિટીએ સોશિયલ મીડિયા પોસ્ટમાં કહ્યું કે ઓપનિંગ સેરેમની દરમિયાન દક્ષિણ કોરિયાની ટીમનો પરિચય આપતી વખતે અમે ભૂલ કરી હતી, જેના માટે અમે દિલથી માફી માગીએ છીએ. આંતરરાષ્ટ્રીય ઓલિમ્પિક સમિતિના પ્રમુખ થોમસ બેચે દક્ષિણ કોરિયાના રાષ્ટ્રપતિ યુન સુક યેઓલ સાથે ટેલિફોન દ્વારા વાત કરી અને વ્યક્તિગત રીતે માફી માંગી. દક્ષિણ કોરિયાના રાષ્ટ્રપતિએ બાકને કહ્યું કે તેમના દેશના લોકો આ ઘટનાથી ખૂબ જ આઘાતમાં છે અને શરમ અનુભવે છે.

ઓલિમ્પિક સમિતિના પ્રવક્તા માર્ક એડમ્સે આ ભૂલને સ્પષ્ટપણે ખેદજનક ગણાવી અને કહ્યું કે ભૂલ થઈ છે. અમે ફક્ત માફી માંગી શકીએ છીએ કે અમે ભૂલ કરી છે. દક્ષિણ કોરિયાના રમત મંત્રાલયે વિદેશ મંત્રાલયને ફ્રાન્સની સરકારને સત્તાવાર રીતે ફરિયાદ કરવા વિનંતી કરી છે.