એક તરફ ટીમ ઈન્ડિયા અને ન્યુઝીલેન્ડ વચ્ચે ત્રણ મેચની ટેસ્ટ સીરીઝ રમાઈ રહી છે. તો ભારતમાં ડોમેસ્ટિક ક્રિકેટ પણ શરૂ થઈ ગયું છે. રણજી ટ્રોફી 2024-25નો પ્રથમ તબક્કો શરૂ થઈ ગયો છે. હવે ટીમ ઈન્ડિયાનો વિસ્ફોટક બેટ્સમેન રિંકુ સિંહ રણજીમાં જોવા મળવાનો છે. રિંકુ સિંહની ઉત્તર પ્રદેશની ટીમમાં વાપસી થઈ છે.
રિંકુ બીજી મેચમાં ધમાલ મચાવશે!
ઉત્તર પ્રદેશની બીજી મેચ હરિયાણા સાથે થવાની છે. યુપીની પ્રથમ મેચ બંગાળ સામે ડ્રો રહી હતી. જે બાદ હવે ટીમ જીતની આશા છે. ટીમના મિડલ ઓર્ડરને મજબૂત કરવા માટે હવે રિંકુ સિંહે વાપસી કરી છે. સુકાની આર્યન જુયાલના નેતૃત્વમાં ઉત્તર પ્રદેશની ટીમ રિંકુ સિંહના ફોર્મ અને અનુભવનો ફાયદો ઉઠાવવાનો પ્રયાસ કરશે.
યુપી પાસે મજબૂત બોલિંગ
2024-25ની રણજી ટ્રોફીમાં યુપી ટીમની બોલિંગ લાઇનઅપ ઘણી મજબૂત દેખાઈ રહી છે. ડેબ્યૂ કરનારા લેગ સ્પિનર વિપ્રજ નિગમએ પોતાની પ્રથમ મેચમાં ચાર વિકેટ લીધી. જ્યારે અનુભવી ઝડપી બોલર યશ દયાલે પણ ચાર વિકેટ ઝડપી હતી. એકવાર ફરી આ બંને બોલરો પાસેથી યુપીની ટીમને શાનદાર પ્રદર્શનની આશા છે. આ ઉપરાંત ટીમની પાસે સૌરભ, શિવમ શર્મા, અંકિત રાજપૂત અને પૂર્વ કેપ્ટન નિતીશ રાણાના રૂપમાં બોલિંગના વિકલ્પ શામેલ છે.
ચહલની ટીમ સામે રમશે રિંકૂસિંહ
ટીમ ઈન્ડિયાના સ્ટાર સ્પિન બોલર યુઝવેન્દ્ર ચહલની પણ હરિયાણાની ટીમમાં વાપસી થઈ છે. હરિયાણાની ટીમ હવે વધુ મજબૂત જોવા જઈ રહી છે. ચહલનું વર્તમાન પ્રદર્શન પણ ઘણું શાનદાર રહ્યું છે. હરિયાણાએ તેની પ્રથમ મેચમાં બિહારને કારમી હાર આપી હતી. જે બાદ ટીમ આત્મવિશ્વાસથી ભરેલી જોવા મળી રહી છે.
