શ્રીલંકા ક્રિકેટ પસંદગી સમિતિએ દક્ષિણ આફ્રિકા સામેની બે મેચની ટેસ્ટ સિરીઝ માટે 17 ખેલાડીઓની ટીમની જાહેરાત કરી છે. આ બે મેચની ટેસ્ટ સિરીઝ ICC વર્લ્ડ ટેસ્ટ ચેમ્પિયનશિપનો એક ભાગ છે. સિરીઝ 27 નવેમ્બરના રોજ કિંગ્સમીડ, ડરબન ખાતે શરૂ થશે. જ્યારે બીજી ટેસ્ટ 5 ડિસેમ્બરે સેન્ટ જ્યોર્જ પાર્કમાં રમાશે.
દક્ષિણ આફ્રિકા માટે રવાના થઈ ગયા અડધા ખેલાડી
ગયા અઠવાડિયે, 10 શ્રીલંકાના ખેલાડીઓ બે મેચની ટેસ્ટ સિરીઝ પહેલા પ્રી-સિરીઝ કેમ્પમાં ભાગ લેવા માટે દક્ષિણ આફ્રિકા ગયા હતા. શ્રીલંકાના ટેસ્ટ કેપ્ટન ધનંજય ડી સિલ્વા, દિમુથ કરુણારત્ને, એન્જેલો મેથ્યુસ, દિનેશ ચાંદીમલ અને પ્રભાત જયસૂર્યા એ 10 ખેલાડીઓમાં સામેલ છે જેઓ દક્ષિણ આફ્રિકાના ડરબન જવા રવાના થયા છે. અહીં ખેલાડીઓની તાલીમ માટેની વ્યવસ્થા કરવામાં આવી હતી. લસિથ એમ્બુલ્ડેનિયા પણ ટીમમાં પાછો ફર્યો છે, તેણે તેની છેલ્લી મેચ 2022માં રમી હતી.
બાકીના ખેલાડીઓ 22મી નવેમ્બરે રવાના થશે
શ્રીલંકા ક્રિકેટે કહ્યું કે બાકીના ખેલાડીઓ 22 નવેમ્બર 2024ના રોજ દક્ષિણ આફ્રિકા જવા રવાના થશે. આ પછી આ ખેલાડીઓ પ્રેક્ટિસ શરૂ કરશે. શ્રીલંકાનું પ્રદર્શન તાજેતરના સમયમાં ઘણું સારું રહ્યું છે. તેઓએ ન્યુઝીલેન્ડ સામે ટેસ્ટ સિરીઝ જીતી હતી. આ સિવાય તાજેતરમાં જ ન્યુઝીલેન્ડ સામે ટી20 અને વનડે સીરીઝ પણ જીતી છે. આવી સ્થિતિમાં શ્રીલંકા પાસે ઈતિહાસ રચવાની તક છે.
https://twitter.com/ESPNcricinfo/status/1858756075610403315
WTC માટે મહત્વપૂર્ણ છે આ સિરીઝ
જો તેઓ સાઉથ આફ્રિકાને હરાવશે તો WTC ફાઇનલમાં સ્થાન મેળવવાની તેમની આશાઓ વધુ વધી જશે. શ્રીલંકાની ટીમ અત્યારે પોઈન્ટ ટેબલમાં ત્રીજા સ્થાને છે. નોંધનીય છે કે સનથ જયસૂર્યાના કોચ બન્યા બાદ શ્રીલંકાની ટીમમાં ઘણા ફેરફાર થયા છે. આવી સ્થિતિમાં હવે તેમની નજર દક્ષિણ આફ્રિકા સામેની ટેસ્ટ સિરીઝ જીતવા પર રહેશે.
દક્ષિણ આફ્રિકા પ્રવાસ માટે શ્રીલંકા ટીમ
ધનંજય ડી સિલ્વા (કેપ્ટન), પથુમ નિસાન્કા, દિમુથ કરુણારત્ને, દિનેશ ચંદીમલ, એન્જેલો મેથ્યુસ, કુસલ મેન્ડિસ, કામિન્દુ મેન્ડિસ, ઓશાદા ફર્નાન્ડો, સદિરા સમરવિક્રમા, પ્રભાત જયસૂર્યા, નિશાન પીરીસ, લસિથ એમ્બુલ્ડેનિયા, મિલન રથનાયકે, અસિથા ફર્નાન્ડો, વિશ્વા ફર્નાન્ડો, લાહિરુ કુમારા, કાસુન રાજીથા