‘સ્ટાર ખેલાડી પર મર્ડર કેસ..!’ ઇંગ્લેન્ડમાં કરી રહ્યો છે શાનદાર પ્રદર્શન!

બાંગ્લાદેશ ક્રિકેટ ટીમના પૂર્વ કેપ્ટન શાકિબ અલ હસને તાજેતરમાં જ પાકિસ્તાન સામેની ટેસ્ટ સિરીઝ જીતવામાં મહત્વનું યોગદાન આપ્યું હતું. તે પછી તે દુબઈ થઈને ઈંગ્લેન્ડ ગયો, જ્યાં તે કાઉન્ટી ચેમ્પિયનશિપમાં સરે કાઉન્ટી તરફથી રમી રહ્યો છે. આ દરમિયાન શાકિબે પોતાની ફર્સ્ટ ક્લાસ કારકિર્દીની 106મી મેચ રમી હતી, જેમાં તેણે વિકેટ લેવાનો ખાસ રેકોર્ડ બનાવ્યો છે.

ઇંગ્લેન્ડમાં રમી રહ્યો છે શાકિબ અલ હસન

સમરસેટ અને સરે વચ્ચે રમાયેલી મેચ પહેલા શાકિબ અલ હસને પોતાની ફર્સ્ટ ક્લાસ કારકિર્દીમાં 342 વિકેટ ઝડપી હતી. શાકિબે ઈંગ્લેન્ડમાં ચાલી રહેલી આ મેચની પ્રથમ ઈનિંગમાં 4 વિકેટ ઝડપી હતી અને ત્યારબાદ બીજી ઈનિંગમાં 5 વિકેટ લઈને ઐતિહાસિક સિદ્ધિ મેળવી હતી. આ સાથે જ શાકિબે ફર્સ્ટ ક્લાસ ક્રિકેટમાં 350 વિકેટનો આંકડો પાર કરી લીધો છે. તેના યોગદાનને કારણે સમરસેટનો બીજો દાવ માત્ર 224 રનમાં સમેટાઈ ગયો હતો.

બાંગ્લાદેશમાં ચાલી રહ્યો છે મર્ડરનો કેસ

વાસ્તવમાં જ્યારે શાકિબ અલ હસન પાકિસ્તાનમાં ટેસ્ટ સિરીઝ રમી રહ્યો હતો ત્યારે રફીકુલ ઈસ્લામ નામના વ્યક્તિએ તેની વિરુદ્ધ હત્યાનો કેસ દાખલ કર્યો હતો. રફીકુલ દ્વારા દાખલ કરવામાં આવેલી એફઆઈઆરમાં કહેવામાં આવ્યું છે કે 7 ઓગસ્ટના રોજ બાંગ્લાદેશમાં ચાલી રહેલા વિદ્યાર્થીઓના વિરોધ દરમિયાન તેમના પુત્ર રૂબેલના મૃત્યુમાં શાકિબ અલ હસન પણ સામેલ હતો.

બાંગ્લાદેશ ક્રિકેટ બોર્ડે આપ્યું નિવેદન

આ મુદ્દે બાંગ્લાદેશ ક્રિકેટ બોર્ડનું નિવેદન પણ સામે આવ્યું છે. બોર્ડ દ્વારા જારી કરવામાં આવેલા નિવેદનમાં કહેવામાં આવ્યું છે કે, શાકિબ સામે હત્યાના આરોપમાં નોટિસ મળી ગઈ છે, પરંતુ હાલમાં શાકિબ ક્રિકેટ રમવાનું ચાલુ રાખશે. બોર્ડે સ્પષ્ટ કર્યું હતું કે જ્યાં સુધી શાકિબ સામેના આરોપો સાબિત નહીં થાય ત્યાં સુધી તેને રમવાથી રોકવામાં આવશે નહીં. ભારત સામે 19 સપ્ટેમ્બરથી શરૂ થનારી ટેસ્ટ સિરીઝ માટે શાકિબ અલ હસનનો પણ ટીમમાં સમાવેશ કરવામાં આવ્યો છે. આવી સ્થિતિમાં, શક્ય છે કે તે ઇંગ્લેન્ડથી સીધો ભારત જશે.