- શિખર ધવને રાજસ્થાન રોયલ્સ સામેની મેચમાં એક IPL રેકોર્ડ બનાવ્યો
- તેણે IPLમાં સૌથી વધુ ફિફ્ટી પ્લસ રન બનાવવામાં કોહલીની બરાબરી કરી
- આ બંને સિવાય અન્ય કોઈ બેટ્સમેન આઈપીએલમાં આવું કરી શક્યો નથી
ટીમ ઈન્ડિયામાંથી બહાર થયા બાદ અનુભવી ઓપનર શિખર ધવને આઈપીએલ 2023ની પોતાની બીજી મેચમાં હંગામો મચાવ્યો છે. ગબ્બરે સાબિત કર્યું કે તે હજુ પણ કેટલો દમદાર બેટ્સમેન છે અને તે T20 ફોર્મેટ માટે કેટલો લાયક છે. 5 એપ્રિલના રોજ, રાજસ્થાન રોયલ્સ અને પંજાબ કિંગ્સ વચ્ચે ગુવાહાટીના બરસાપારા સ્ટેડિયમમાં હાઈ-સ્કોરિંગ મેચ રમાઈ હતી, જેમાં પંજાબ કિંગ્સે 5 રનથી જીત હાંસલ કરી હતી. આ મેચમાં પંજાબના કેપ્ટન શિખર ધવનનું બેટ જોરદાર બોલ્યું હતું. આ દરમિયાન શિખર ધવને રાજસ્થાન રોયલ્સ સામેની મેચમાં એક IPL રેકોર્ડ બનાવ્યો હતો. તેણે અડધી સદી ફટકારીને IPLમાં સૌથી વધુ ફિફ્ટી પ્લસ રન બનાવવાના મામલે વિરાટ કોહલીની બરાબરી કરી હતી. આ બંને સિવાય અન્ય કોઈ બેટ્સમેન આઈપીએલમાં આવું કરી શક્યો નથી.
ટોસ હાર્યા બાદ પહેલા બેટિંગ કરવાનું પસંદ કરતા પંજાબ કિંગ્સે શાનદાર શરૂઆત કરી હતી. પાંચમી ઓવર પહેલા ઓપનર બેટ્સમેન પ્રભસિમરન સિંહ અને શિખર ધવને ટીમના પચ્ચાસ રન પૂરા કર્યા હતા. આ પછી પ્રભસિમરને તેની અડધી સદી પૂરી કરી, તે ઝડપી રમી રહ્યો હતો અને ધવન સતર્ક હતો. પરંતુ પ્રભસિમરનના આઉટ થયા બાદ ધવને પણ પોતાનું ગિયર બદલી નાખ્યું હતું. શિખર ધવને 36 બોલમાં પોતાની અડધી સદી પૂરી કરી હતી.
ધવને બનાવ્યો રેકોર્ડ, વિરાટ કોહલીની બરાબરી કરી
શિખર ધવને IPL ઈતિહાસમાં 50મી વખત પચ્ચાસથી વધુ ઇનિંગ્સ રમી હતી. આ પહેલા માત્ર વિરાટ કોહલીએ જ 50 વખત આવું કર્યું છે. બંને હવે 50 વખત ફિફ્ટી પ્લસ ઇનિંગ્સ રમવાના મામલે સંયુક્ત રીતે પહેલા છે.
ધવન અને પ્રભસિમરને અડધી સદીની ઇનિંગ્સ રમી
પંજાબ કિંગ્સે પહેલા બેટિંગ કરતા 197 રન બનાવ્યા હતા. થોડા સમય માટે એવું લાગતું હતું કે પંજાબ 220 રન બનાવી લેશે, પરંતુ છેલ્લી ઓવરોમાં રાજસ્થાન રોયલ્સે સારી બોલિંગ કરી હતી. શિખર ધવને અણનમ 86 રનની ઇનિંગ રમી હતી. આ પહેલા પ્રભસિમરન સિંહે 60 રન બનાવ્યા હતા. જેસન હોલ્ડરે 4 ઓવરમાં 29 રન આપીને 2 વિકેટ લીધી હતી. અશ્વિન અને ચહલે 1-1 વિકેટ લીધી હતી.
