- T20 વર્લ્ડ કપ 2022ની ફાઈનલ મેચમાં ઈંગ્લેન્ડે પાકિસ્તાનને 5 વિકેટે હરાવ્યું હતું
- ફાઈનલ મેચ દરમિયાન ફાસ્ટ બોલર શાહીન શાહ આફ્રિદી ઈજાગ્રસ્ત થતાં બહાર ગયો હતો
- પાકિસ્તાન સુપર લીગ (PSL)માં શાહીન શાહ આફ્રિદી ફુલ ફોર્મમાં જોવા મળી રહ્યો છે
T20 વર્લ્ડ કપ 2022ની ફાઈનલ મેચમાં ઈંગ્લેન્ડે પાકિસ્તાનને 5 વિકેટે હરાવ્યું હતું. આ ફાઈનલ મેચ દરમિયાન ફાસ્ટ બોલર શાહીન શાહ આફ્રિદી ઈજાગ્રસ્ત થતાં મેદાનની બહાર ગયો હતો. ભૂતપૂર્વ ફાસ્ટ બોલર શોએબ અખ્તરે હાલમાં જ આ મેચ પર વાત કરતા કહ્યું હતું કે શાહીનને ફાઇનલમાં મેદાન છોડવું જોઈતું ન હતું. જો હું શાહીનની જગ્યાએ હોત તો મેં ઈન્જેક્શન લઈને બોલિંગ કરી હોત. અખ્તરના આ નિવેદન પર હવે શાહીનના સસરા શાહિદ આફ્રિદીએ મોટું નિવેદન આપ્યું છે.
શાહિદ આફ્રિદીની અખ્તર સાથે ટક્કર!
પાકિસ્તાન સુપર લીગ (PSL)માં શાહીન શાહ આફ્રિદી ફુલ ફોર્મમાં જોવા મળી રહ્યો છે. આવી સ્થિતિમાં પાકિસ્તાનના પૂર્વ કેપ્ટન અને શાહીન આફ્રિદીના સસરા શાહિદ આફ્રિદીએ શોએબ અખ્તરના નિવેદનનો જડબાતોડ જવાબ આપ્યો છે. શાહિદ આફ્રિદીએ કહ્યું કે શોએબ અખ્તર ક્રિકેટર તરીકે સક્રિય દિવસોમાં ઈન્જેક્શન લેતા હતા. આવી સ્થિતિમાં તેમના માટે આજકાલ ચાલવું મુશ્કેલ બની ગયું છે.
શાહિદ આફ્રિદીએ આ મોટું નિવેદન આપ્યું છે
શાહિદ આફ્રિદીએ સામ ટીવીના એક ચેટ શોમાં કહ્યું, 'અખ્તરે એટલા બધા ઈન્જેક્શન લીધા છે કે તે હવે ચાલી પણ શકતો નથી! જુઓ, આ શોએબ અખ્તરનો ક્લાસ છે. તે આવું કરી શકે છે. જોકે, તે મુશ્કેલ છે. દરેક વ્યક્તિ શોએબ અખ્તર ન બની શકે. જો તમે ઈન્જેક્શન અને પેઈનકિલર્સ લો છો તો ઈજા સાથે રમવું મુશ્કેલ છે. કારણ કે તે પછી, તમે ઈજાને વધુ ગંભીર બનાવવાનું જોખમ લઈ રહ્યા હોવ છો. ખેર, શોએબ અખ્તરને એકલા છોડી દો!
શોએબ અખ્તરે આ વાત કહી હતી
શોએબ અખ્તરે એક પાકિસ્તાની ટીવી શોમાં કહ્યું હતું કે, 'જો હું શાહીન આફ્રિદી હોત તો પાકિસ્તાન માટે T20 વર્લ્ડ કપની ફાઇનલમાં મારા ઘૂંટણમાં ઈન્જેક્શન લેત. હું પેઈનકિલર્સ લઈને તે બે ઓવર નાખતો, પણ બોલિંગ જરૂર કરતો. લોકો કહેતા કે તું મરી જઈશ, તારો ઘૂંટણ તૂટી જશે, હું કહેતો કે મરવું સારું છે પરંતુ આ સમયે વર્લ્ડ કપ હાથમાંથી ન જવો જોઈએ. હું પાકિસ્તાનનો સૌથી મોટો સેલિબ્રિટી અને રાષ્ટ્રીય હીરો બની ગયો હોત.
શાહીન આફ્રિદીને ઈજા થઈ હતી
આ ફાઈનલ મેચમાં હેરી બ્રુક્સનો કેચ લેતી વખતે શાહીન શાહ આફ્રિદી ઈજાગ્રસ્ત થઈ ગયો હતો, ત્યારબાદ તેને 16મી ઓવરમાં બોલિંગ પર મૂકવામાં આવ્યો હતો પરંતુ તે માત્ર એક બોલ ફેંકી શક્યો હતો અને ત્યારબાદ ઓફ સ્પિનર ઈફ્તિખાર અહેમદે ઓવર પૂરી કરી હતી. જેના કારણે પાકિસ્તાનનું બોલિંગ બેલેન્સ ખરાબ રીતે ખોરવાઈ ગયું હતું.
