વિશ્વની નંબર એક મહિલા ટેનિસ ખેલાડી આર્યના સબાલેન્કાએ અમેરિકાની જેસિકા પેગુલાને 7-5, 6-2થી સીધા સેટમાં પરાજય આપીને પોતાની કેરિયરનું પહેલું મિયામી ઓપન ટાઇટલ કબજે કર્યુ છે.
હાર્ડ રોક સ્ટેડિયમ ખાતે શનિવારે રમાયેલી આ WTA 1000 ઇવેન્ટની ફાઇનલમાં જીતની સાથે જ સબાલેન્કાએ વર્ષ 2025નું પોતાનું બીજું ટાઇટલ જીત્યું છે. આ પહેલા તે જાન્યુઆરીમાં બ્રિસબેન ઓપનમાં વિજયી બની હતી. આ જીતની સાથે જ આર્યનાએ પોતાનું આઠમું WTA 1000 ટાઇટલ જીત્યુ હતું. હજુ તાજેતરમાં જ ઇન્ડિયન વેલ્સની ફાઇનલમાં રશિયાની સગીર ખેલાડી મિરા એન્દ્રીવા સામે પરાજીત થનારી આર્યનાએ આ મેચમાં પોતાની મક્કમતાનો પરચો આપ્યો હતો અને ઇન્ડિયન વેલ્સની ફાઇનલ જેવી ભૂલોનું પુનરાવર્તન થવા દીધું નહોતું.
