ભારતીય ક્રિકેટરના પિતા પર લાગ્યા ગંભીર આરોપ, આ ક્લબે રદ કર્યું સભ્યપદ

ભારતની સ્ટાર મહિલા ક્રિકેટર જેમિમાહ રોડ્રિગ્સ વિવાદમાં ફસાઈ છે, જ્યાં મુંબઈની પ્રખ્યાત ખાર જિમખાના ક્લબ દ્વારા તેના પિતા ઈવાન રોડ્રિગ્સ પર ગંભીર આરોપો લગાવવામાં આવ્યા છે. ક્લબે દાવો કર્યો છે કે ભારતીય ક્રિકેટરના પિતા ધાર્મિક પ્રવૃત્તિઓ કરવા માટે ક્લબના પરિસરનો ઉપયોગ કરતા હતા. હવે જેમિમાને તેના પિતા પરના આરોપોનો ભોગ બનવું પડશે, જ્યાં ક્લબે તેની સભ્યપદ રદ કરી દીધી છે.

જેમિમાહનું માનદ સભ્યપદ રદ

ક્લબના પ્રમુખ વિવેક દેવનાનીએ જણાવ્યું કે જેમિમાહનું ત્રણ વર્ષનું માનદ સભ્યપદ રદ કરવામાં આવ્યું છે. એક અહેવાલ મુજબ, જેમિમાહના પિતાની તાજેતરની પ્રવૃત્તિઓ પર સભ્યોએ વાંધો ઉઠાવ્યા બાદ ક્લબના અધિકારીઓને કડક પગલાં લેવાની ફરજ પડી હતી. રિપોર્ટમાં કહેવામાં આવ્યું છે કે ઈવાન ક્લબ પરિસરનો ઉપયોગ 'સંવેદનશીલ લોકોને છુપાવવા' માટે ધાર્મિક કાર્યક્રમોનું આયોજન કરવા માટે કરતો હતો. રવિવારે એન્યુઅલ જનરલ બોડીની બેઠક બાદ જેમિમાહનું સભ્યપદ રદ કરવામાં આવ્યું હતું. નોંધનીય છે કે જેમિમાહ 2023માં ખાર જિમખાનાની માનદ સભ્યપદ મેળવનારી પ્રથમ ભારતીય મહિલા ક્રિકેટર બની હતી.

35 કાર્યક્રમોનું આયોજન કર્યું

જીમખાનાના અન્ય એક અધિકારીએ જણાવ્યું હતું કે જેમિમાના પિતાએ સંસ્થાના ભાગરૂપે 35 ઈવેન્ટ્સનું આયોજન કરવા માટે લગભગ દોઢ વર્ષ સુધી પરિસરનો ઉપયોગ કર્યો હતો. ખાર જિમખાના પ્રબંધન સમિતિના સભ્ય શિવ મલ્હોત્રાએ કહ્યું, 'અમને જાણવા મળ્યું કે જેમિમાહ રોડ્રિગ્ઝના પિતા બ્રધર મેન્યુઅલ મિનિસ્ટ્રીઝ નામની સંસ્થા સાથે સંકળાયેલા હતા. તેઓએ લગભગ દોઢ વર્ષ માટે પરિસર બુક કરાવ્યું અને 35 કાર્યક્રમોનું આયોજન કર્યું. આપણે બધા જાણીએ છીએ કે ત્યાં શું થઈ રહ્યું હતું.

જેમિમાહની ક્રિકેટ કારકિર્દી

જેમિમાહના કરિયરની વાત કરીએ તો અત્યાર સુધી તેણે ત્રણ ટેસ્ટ, 30 વનડે અને 104 ટી20 મેચમાં ભારતનું પ્રતિનિધિત્વ કર્યું છે. આમાં તેમના નામે અનુક્રમે 235, 710 અને 2142 રન છે. ભારતીય મહિલા ક્રિકેટ ટીમના અગ્રણી ચહેરાઓમાંથી એક જેમિમાહ આ મહિનાની શરૂઆતમાં UAEમાં રમાયેલા મહિલા T20 વર્લ્ડકપમાં ટીમ ઈન્ડિયાનો ભાગ હતી.