દિગ્ગજ ક્રિકેટરની ભવિષ્યવાણી, ટીમ ઇન્ડિયા બની શકે છે વર્લ્ડ ચેમ્પિયન પણ...

• ગાવસ્કરે ટીમની પસંદગી અંગે પણ ચર્ચા કરી
• દિગ્ગજ બેટ્સમેન સુનીલ ગાવસ્કરનું નિવેદન
• ટીમ ટ્રોફી લાવી શકે છે - ગાવસ્કર

ઓસ્ટ્રેલિયાની યજમાનીમાં 16 ઓક્ટોબરથી શરૂ થઈ રહેલા T20 વર્લ્ડ કપમાં ભારતીય ટીમ મજબૂત દાવેદાર તરીકે ઉતરશે. રોહિત શર્માને ટીમની કમાન સોંપવામાં આવી છે. આ દરમિયાન ભારતના મહાન બેટ્સમેનોમાંના એક સુનીલ ગાવસ્કરે પણ ભવિષ્યવાણી કરી છે. તેમણે કહ્યું છે કે ભારત ફરી એકવાર T20 ફોર્મેટમાં વર્લ્ડ ચેમ્પિયન બની શકે છે.

દિગ્ગજ બેટ્સમેન સુનીલ ગાવસ્કરે એક ઇન્ટરવ્યુમાં કહ્યું, 'હા આ ટીમ T20 વર્લ્ડ કપ જીતી શકે છે. મને ખાતરી છે કે જેમ દરેક ટીમને થોડાક ભાગ્યની જરૂર હોય છે, તેવી જ રીતે ભારત પણ છે અને ટીમ ટ્રોફી લાવી શકે છે. ભારતે 15 વર્ષ પહેલા T20 વર્લ્ડ કપ જીત્યો હતો. જોકે ત્યાર બાદ ટીમ ઈન્ડિયા આ ટૂંકા ફોર્મેટમાં ક્યારેય ચેમ્પિયન બની શકી નથી. આ વખતે રોહિત શર્માની કેપ્ટન્સીમાં ભારત બીજી વખત T20 વર્લ્ડ ચેમ્પિયન બનવાના ઈરાદા સાથે ઉતરશે.

ટીમની પસંદગી અંગે ચર્ચા

ગાવસ્કરે ટીમની પસંદગી અંગે પણ ચર્ચા કરી હતી. ઓસ્ટ્રેલિયન પીચો પર શમી વધુ અસરકારક સાબિત થઈ શકે છે તે અંગે પૂછવામાં આવતા તેણે કહ્યું, “એકવાર ટીમ પસંદ થઈ જાય પછી તે અમારી ભારતીય ટીમ છે. આપણે તેને ટેકો આપવો પડશે. આપણે ટીમ સિલેક્શન પર સવાલ ન ઉઠાવવો જોઈએ કે શા માટે કોઈ ખેલાડીને પડતો મૂકવામાં આવ્યો અથવા કોઈને ટીમનો ભાગ કેમ બનાવવામાં આવ્યો. તેનાથી ખેલાડીઓનું મનોબળ પણ તૂટી જાય છે.

23 ઓક્ટોબરે પાકિસ્તાન સામે મેચ

ભારતીય ટીમ 23 ઓક્ટોબરે કટ્ટર હરીફ પાકિસ્તાન સામેની મેચથી T20 વર્લ્ડ કપમાં પોતાના અભિયાનની શરૂઆત કરશે. તાજેતરમાં એશિયા કપ-2022માં ભારતે લીગ સ્ટેજમાં પાકિસ્તાનને હરાવ્યું હતું પરંતુ સુપર-4 રાઉન્ડમાં હારનો સામનો કરવો પડ્યો હતો. મેલબોર્નમાં ફરી એકવાર ભારત અને પાકિસ્તાન વચ્ચે કપરા અને રોમાંચક મુકાબલાની અપેક્ષા રાખવામાં આવી રહી છે. આ પછી ટીમ ઈન્ડિયાએ દક્ષિણ આફ્રિકા અને બાંગ્લાદેશ સામે પણ મેચ રમવાની છે.

ટી20 વર્લ્ડ કપ માટે ટીમ ઈન્ડિયા

રોહિત શર્મા (કેપ્ટન), કેએલ રાહુલ (વાઈસ કેપ્ટન), વિરાટ કોહલી, સૂર્યકુમાર યાદવ, દીપક હુડ્ડા, ઋષભ પંત (વિકેટમેન), દિનેશ કાર્તિક (વિકેટમેન), હાર્દિક પંડ્યા, રવિચંદ્રન અશ્વિન, યુઝવેન્દ્ર ચહલ, અક્ષર પટેલ, જસપ્રિત બુમરાહ, ભુવનેશ્વર કુમાર, હર્ષલ પટેલ અને અર્શદીપ સિંહ.

સ્ટેન્ડબાય ખેલાડીઓ - મોહમ્મદ શમી, શ્રેયસ ઐયર, દીપક ચહર અને રવિ બિશ્નોઈ.