- બાંગ્લાદેશની સામે ઝિમ્બાબ્વેની ટીમ 3 રનથી હારી ગઇ
- અમ્પાયરે ખેલાડીઓને ફરીથી મેદાનમાં બોલાવ્યા અને છેલ્લો બોલ નંખાવ્યો
- બાંગ્લાદેશી વિકેટકીપરની હોશિયારી ટીમને લઇ ડૂબત
T20 વર્લ્ડ કપના ઈતિહાસમાં સૌથી રોમાંચક છેલ્લી ઓવરની વાત કરીએ તો ઘણી બધી હોઈ શકે છે, પરંતુ રોમાંચક છેલ્લો બોલ માત્ર એક જ હોઈ શકે છે. આ બોલ રવિવારે (30 ઓક્ટોબર) ઝિમ્બાબ્વે અને બાંગ્લાદેશ વચ્ચેની મેચમાં બનાવવામાં આવ્યો હતો. આ છેલ્લા બોલ પર પરિણામ આવ્યું પરંતુ અમ્પાયરે અલગ નિર્ણય આપીને મેચમાં ગરમાવો વધાર્યો.
વાસ્તવમાં મેચમાં 151 રનના લક્ષ્યનો પીછો કરવા ઉતરેલી ઝિમ્બાબ્વેની ટીમને છેલ્લી ઓવરમાં 16 રનની જરૂર હતી. આ ઓવર ઓફ સ્પિનર મોસાદ્દેક હુસૈને કરી હતી. રેયાન બર્લે અને બ્રાડ ઇવાન્સ ક્રીઝ પર હાજર હતા. આ ઓવરમાં ઝિમ્બાબ્વેએ 5 બોલમાં 11 રન બનાવ્યા, પરંતુ 2 વિકેટ પણ ગુમાવી દીધી.
અમ્પાયરે ખેલાડીઓને ફરી મેદાનમાં બોલાવ્યા અને છેલ્લો બોલ નંખાવ્યો
આવી સ્થિતિમાં મેચ હવે છેલ્લા બોલ પર સ્થિર થઈ ગઈ, જેના પર ઝિમ્બાબ્વેને 5 રનની જરૂર હતી. નવો બેટ્સમેન બ્લેસિંગ મુજરબાની ક્રિઝ પર હાજર હતો. તેણે આગળ જઈને લાંબો શોટ લેવાનો પ્રયાસ કર્યો, પરંતુ બોલ બાંગ્લાદેશના વિકેટકીપર નુરુલ હસનના હાથમાં આવી ગયો અને તેણે વિલંબ કર્યા વિના સ્ટમ્પ આઉટ કરી દીધો. આ રીતે બાંગ્લાદેશે 4 રનથી મેચ જીતી લીધી હતી. તમામ ખેલાડીઓ ખુશીથી ઉજવણી કરતા પેવેલિયનમાં જઈ રહ્યા હતા, ત્યારે ફિલ્ડ અમ્પાયરે એન્ટ્રી કરી.
અમ્પાયરે છેલ્લા બોલને નો-બોલ ગણાવ્યો અને બધાને મેદાનમાં પાછા બોલાવ્યા. બાંગ્લાદેશ અને ઝિમ્બાબ્વેના ખેલાડીઓની સાથે ફેન્સને પણ સમજાયું નહીં કે શું થયું. ઝિમ્બાબ્વે ખુશ હતું, બાંગ્લાદેશી ટીમ થોડી ઉદાસ અને મૂંઝવણમાં હતી. ત્યારબાદ અમ્પાયરે તેને આખો મામલો સમજાવ્યો અને છેલ્લો બોલ નંખાવ્યો, જેમાં ઝિમ્બાબ્વેને હવે 4 રનની જરૂર હતી.
બાંગ્લાદેશી વિકેટકીપરની હોશિયારી ટીમને લઇ ડૂબત
આપને જણાવી દઈએ કે અમ્પાયરે અંતિમ બોલનો નિર્ણય થર્ડ અમ્પાયરને રિફર કર્યો હતો, જેમાં જાણવા મળ્યું હતું કે બાંગ્લાદેશી વિકેટકીપરે હોશિયારી દેખાડતા સ્ટમ્પ આઉટ કરવા માટે બોલને સ્ટમપની આગળથી પકડયો હતો. બસ પછી શું થયું, અમ્પાયરે તેને નોબોલ ગણાવી દીધો અને એક રન ઝિમ્બાબ્વેના ખાતામાં ગયો. જ્યારે છેલ્લો બોલ નંખાવ્યો ત્યારે પણ મુજારબાની જ બેટિંગ કરી રહ્યો હતો અને તે આ જીવતદાનનો ફાયદો ઉઠાવી શકયો નહીં. આ વખતે બાંગ્લાદેશે કોઇ ભૂલ કરી નહીં અને 3 રનથી મેચ જીતી લીધી.
આ રીતે ઝિમ્બાબ્વે 3 રને મેચ હારી ગયું હતું
આ મેચમાં બાંગ્લાદેશ ટીમના કેપ્ટન શાકિબ અલ હસને ટોસ જીતીને પ્રથમ બેટિંગ કરવાનો નિર્ણય કર્યો હતો. ત્યારબાદ ટીમની શરૂઆત ખરાબ રહી હતી અને 31 રનમાં બે વિકેટ ગુમાવી દીધી હતી. ત્યાર બાદ ઓપનર નજમુલ હુસૈન સેંટોએ 55 બોલમાં 71 રનની ઇનિંગ રમીને ટીમનો સ્કોર 7 વિકેટે 150 રન સુધી પહોંચાડ્યો હતો. સેન્ટો સિવાય અફીફ હુસૈને 29 રન બનાવ્યા હતા.
151 રનના લક્ષ્યનો પીછો કરવા ઉતરેલી ઝિમ્બાબ્વેની ટીમની શરૂઆત પણ સારી રહી ન હતી. ટીમે માત્ર 35 રનમાં ટોપ-4 વિકેટ ગુમાવી દીધી હતી. અહીંથી સીન વિલિયમ્સે સરસાઈ મેળવી હતી, પરંતુ અંતે ટીમને જીત અપાવી શક્યો નહોતો. તેણે 43 બોલમાં 64 રનની ઇનિંગ રમી હતી. ઝિમ્બાબ્વેએ 8 વિકેટે 147 રન બનાવ્યા હતા અને 3 રનથી મેચ હારી હતી.
