T20 WC 2024: અફઘાનિસ્તાનને લાગ્યો મોટો ઝટકો, ઈજાના કારણે સ્ટાર ખેલાડી બહાર

• અફઘાનિસ્તાનનું વર્લ્ડકપમાં શાનદાર પ્રદર્શન
  
• ગ્રુપ Cમાં 6 પોઈન્ટ સાથે પ્રથમ સ્થાને છે
• ઈજાના કારણે મુજીબ ઉર રહેમાન વર્લ્ડકપમાંથી બહાર

અફઘાનિસ્તાન ક્રિકેટ ટીમ આ વર્લ્ડકપમાં શાનદાર ફોર્મમાં જોવા મળી રહી છે. રાશિદ ખાનની ટીમ સુપર-8 માટે ક્વોલિફાય થઈ ચૂકી છે. હવે સુપર-8 મેચ પહેલા અફઘાનિસ્તાનને મોટો ફટકો પડ્યો છે. ટીમનો સ્ટાર ખેલાડી ઈજાના કારણે વર્લ્ડકપમાંથી બહાર થયો છે.

મુજીબ ઉર રહેમાન વર્લ્ડકપમાંથી બહાર

અફઘાનિસ્તાનનો સ્ટાર સ્પિન બોલર મુજીબ ઉર રહેમાન આંગળીમાં ઈજાના કારણે વર્લ્ડકપમાંથી બહાર થઈ ગયો છે. મુજીબ આંગળી પર વારંવાર થતી ઇજાઓથી પરેશાન હતો. આ કારણે મુજીબ આ વખતે પણ IPL ચૂકી ગયો હતો. હવે ICCએ મુજીબ ઉર રહેમાનની જગ્યાએ હઝરતુલ્લાહ ઝાઝાઈને અફઘાનિસ્તાન ટીમમાં સામેલ કરવાની મંજૂરી આપી દીધી છે.

મુજીબ પ્રારંભિક મેચમાં રમ્યો હતો

અફઘાનિસ્તાને વિશ્વ કપમાં તેની પ્રથમ મેચ યુગાન્ડા સાથે રમી હતી. આ મેચમાં મુજીબ ઉર રહેમાન રમતા જોવા મળ્યો હતો. આ પછી, આંગળીમાં ઈજાના કારણે તે આગળની મેચોમાં રમી શક્યો ન હતો. સ્પિન બોલિંગને અફઘાનિસ્તાનની તાકાત માનવામાં આવે છે, તેથી મુજીબને વર્લ્ડકપમાંથી બાકાત રાખવો ચોક્કસપણે ટીમ માટે ચિંતાનો વિષય છે. જો કે, તેના વાપસી પર શંકાને જોતા, નૂર અહેમદને પહેલાથી જ ટીમમાં સામેલ કરવામાં આવ્યો હતો.

અફઘાનિસ્તાન સુપર-8માં પહોંચ્યું

T20 વર્લ્ડકપ 2024માં અફઘાનિસ્તાનની ટીમ શાનદાર ફોર્મમાં જોવા મળી રહી છે. આ ટૂર્નામેન્ટમાં અત્યાર સુધી રાશિદ ખાનની ટીમ એક પણ મેચ હારી નથી. અફઘાનિસ્તાને 3 મેચ રમી છે અને ત્રણેયમાં જીત મેળવી છે. અફઘાનિસ્તાન ગ્રુપ Cમાં 6 પોઈન્ટ સાથે પ્રથમ સ્થાને છે.