સેમિફાઇનલમાં ઓસ્ટ્રેલિયા પર ભારે પડી શકે છે ટીમ ઇન્ડિયા, જાણો કારણ!

• ભારત અને ઓસ્ટ્રેલિયા વચ્ચેની આ મેચ કેપટાઉનમાં ન્યુઝીલેન્ડના મેદાનમાં રમાશે
  
• ભારતીય ટીમ મેચ જીતે છે તો તે સતત બીજી વખત T20 વર્લ્ડ કપની ફાઇનલમાં પ્રવેશશે
• ભારતીય મહિલા ટીમમાં વિશ્વની સૌથી ખતરનાક ઓપનિંગ જોડી છે

ભારતીય મહિલા ક્રિકેટ માટે આજનો દિવસ ખૂબ મહત્ત્વનો છે. સાઉથ આફ્રિકામાં રમાઈ રહેલા ICC મહિલા T20 વર્લ્ડ કપની પહેલી સેમિફાઇનલ ગુરુવારે (23 ફેબ્રુઆરી) ભારત અને ઓસ્ટ્રેલિયા વચ્ચે રમાશે. બંને ટીમો વચ્ચેની આ મેચ કેપટાઉનમાં ન્યુઝીલેન્ડના મેદાનમાં રમાશે. આ મેચમાં હરમનપ્રીત કૌરની ટીમની નજર ફાઇનલમાં પ્રવેશવા પર હશે. જો ભારતીય મહિલા ટીમ આ મેચ જીતી જશે તો તે સતત બીજી વખત T20 વર્લ્ડ કપની ફાઇનલમાં પ્રવેશ કરશે. આ પહેલા ટીમ ઈન્ડિયા વર્ષ 2020માં ફાઇનલમાં પહોંચી હતી. 23 ફેબ્રુઆરીએ ભારત અને ઓસ્ટ્રેલિયા વચ્ચે રમાનારી સેમિફાઇનલમાં રોમાંચક જંગ જોવા મળશે. આજે એ પાંચ કારણો વિશે જાણીએ જેના કારણે ભારતીય ટીમ ઓસ્ટ્રેલિયા પર ભારે પડશે.

ખતરનાક ઓપનિંગ જોડી

ભારતીય મહિલા ટીમમાં વિશ્વની સૌથી ખતરનાક ઓપનિંગ જોડી છે. ટીમ ઈન્ડિયાની ઓપનિંગ બેટર સ્મૃતિ મંધાના અત્યારે જબરદસ્ત ફોર્મમાં છે. વર્લ્ડ કપમાં અત્યાર સુધી સૌથી વધુ રન બનાવનાર તે બીજી બેટ્સમેન છે. બીજી તરફ શેફાલી વર્મા તેની વિસ્ફોટક સ્ટાઈલ માટે જાણીતી છે. જો આ બંને બેટ્સમેન ઓસ્ટ્રેલિયા સામેની સેમિફાઈનલ મેચમાં સફળ રહેશે તો મેચને એકતરફી બનાવી દેશે.

મજબૂત મિડલ ઓર્ડર

ભારતીય મહિલા ટીમનો મિડલ ઓર્ડર ઘણો મજબૂત છે. મિડલ ઓર્ડરમાં જેમિમા રોડ્રિગ્સ અને હરમનપ્રીત કૌર જેવી બેટ્સમેન છે. જે વિકેટ પર રહીને ઝડપી રન બનાવવામાં માહેર છે. આ બંને મહિલા ક્રિકેટરો પાસે આંતરરાષ્ટ્રીય ક્રિકેટનો લાંબો અનુભવ છે. જેમિમાએ પાકિસ્તાન સામે મેચ વિનિંગ ઇનિંગ રમી હતી. જો ભારતીય મિડલ ઓર્ડરના બેટ્સમેનો સેમિફાઇનલ મેચમાં સારું પ્રદર્શન કરવામાં સફળ રહેશે તો ઓસ્ટ્રેલિયાની મુશ્કેલીઓ વધી જશે.

રિચા મેચ પલટી શકે છે

ભારતીય મહિલા ટીમની વિકેટ કીપર બેટર રિચા ઘોષ અત્યારે જબરદસ્ત ફોર્મમાં છે. તેણે વર્લ્ડ કપમાં કેટલીક શાનદાર ઈનિંગ્સ રમી છે. તેને વિસ્ફોટક બેટિંગ કરવું પસંદ છે. રિચા એકલા હાથે મેચ પલટાવવાની ક્ષમતા ધરાવે છે. જોકે, તેની પાસે આંતરરાષ્ટ્રીય ક્રિકેટનો વધુ અનુભવ નથી. પરંતુ બહુ ઓછા સમયમાં તેણે આક્રામક બેટર તરીકે પોતાની ઈમેજ બનાવી છે.

બેસ્ટ ઓલરાઉન્ડર

ટીમ ઈન્ડિયા પાસે દીપ્તિ શર્મા અને દેવિકા વૈદ્ય જેવા મહાન ઓલરાઉન્ડર છે. આ સિવાય શિખા પાંડે પણ ઓલરાઉન્ડર તરીકે રમે છે. આ તમામ ખેલાડીઓ શાનદાર બેટિંગ ઉપરાંત શાનદાર બોલિંગ કરવામાં પણ સક્ષમ છે. દીપ્તિએ તેની કારકિર્દીમાં ઘણી વખત ઝડપી ઇનિંગ્સ રમી છે. આ ઓલરાઉન્ડર સેમિફાઈનલ મેચમાં ઓસ્ટ્રેલિયાન પર ભારે પડી શકે છે.

તેજ આક્રમણ

ભારત પાસે રેણુકા સિંહ ઠાકુર અને પૂજા વસ્ત્રાકર જેવા ફાસ્ટ બોલર છે. જે કોઈપણ બેટિંગ આક્રમણને તોડી પાડવાની ક્ષમતા ધરાવે છે. રેણુકા મહિલા ટી20 વર્લ્ડ કપમાં ભારત માટે અત્યાર સુધીની સૌથી સફળ બોલર રહી છે. તેણે વર્લ્ડ કપમાં અત્યાર સુધીમાં 7 વિકેટ ઝડપી છે. તેની સ્વિંગ બોલિંગ ઓસ્ટ્રેલિયાને મુશ્કેલીમાં મૂકી શકે છે.