- T20 વર્લ્ડકપ 2024માં ટીમ ઈન્ડિયા બની ચેમ્પિયન
- ભારતે 17 વર્ષ બાદ T20 વર્લ્ડકપનો ખિતાબ જીત્યો
- પીએમ મોદી સાથે ટીમની મુલાકાતનો સામે આવ્યો વીડિયો
T20 વર્લ્ડકપનું આયોજન અમેરિકા અને વેસ્ટ ઈન્ડિઝમાં થયું હતું. ટીમ ઈન્ડિયાએ આ ટૂર્નામેન્ટ જીતી અને રોહિત શર્માની કપ્તાનીમાં ભારતે 17 વર્ષ બાદ T20 વર્લ્ડકપનો ખિતાબ જીત્યો. ભારતની જીત સાથે જ કરોડો ભારતીય ચાહકોનું વર્લ્ડકપ જીતવાનું સપનું પણ પૂરું થયું હતું.
ટીમ ઈન્ડિયા 4 જુલાઈએ રોહિત શર્મા સાથે ભારત પહોંચી હતી. જ્યાં દિલ્હી એરપોર્ટ પર તેમનું ભવ્ય સ્વાગત કરવામાં આવ્યું હતું. આ પછી ટીમ ઈન્ડિયાએ ભારતના વડાપ્રધાન નરેન્દ્ર મોદી સાથે મુલાકાત કરી હતી. પીએમ મોદી સાથે ટીમ ઈન્ડિયાની મુલાકાતનો વીડિયો હવે સામે આવ્યો છે.
PMએ તમામ ખેલાડીઓ સાથે કરી વાત
ભારતના વડા પ્રધાન નરેન્દ્ર મોદીએ ખેલાડીઓ સાથેની તેમની મુલાકાત દરમિયાન દરેક સાથે વાત કરી અને તેમના અનુભવો વિશે જાણ્યું. તેણે પહેલા રાહુલ દ્રવિડ અને પછી રોહિત શર્મા સાથે વાત કરી. આ પછી, તેણે દરેક ખેલાડી સાથે વાત કરી અને તેમના વિશે જાણ્યું. આ દરમિયાન ટીમ ઈન્ડિયાના ખેલાડીઓ ખૂબ જ ખુશ દેખાતા હતા. આ વીડિયોમાં જોઈ શકાય છે કે ભારતીય ટીમ સિવાય ટીમ ઈન્ડિયાના હેડ કોચ રાહુલ દ્રવિડ, BCCI સેક્રેટરી અને BCCI પ્રમુખ રોજર બિન્ની પણ PM મોદી સાથે જોવા મળી રહ્યા છે. પીએમ મોદીએ તમામ ખેલાડીઓના પ્રદર્શનની માહિતી પણ લીધી હતી.
વર્લ્ડકપમાં ટીમ ઈન્ડિયાનું જોરદાર પ્રદર્શન
T20 વર્લ્ડકપ 2024માં ભારતીય ટીમનું પ્રદર્શન ઘણું જ શાનદાર રહ્યું હતું. આ દરમિયાન રોહિત શર્મા T20 વર્લ્ડકપનો ખિતાબ જીતનાર બીજો ભારતીય કેપ્ટન બન્યો. આ પહેલા ટીમ ઈન્ડિયાએ વર્ષ 2007માં એમએસ ધોનીની કેપ્ટનશીપમાં T20 વર્લ્ડકપનો ખિતાબ જીત્યો હતો. ભારતીય ટીમે વર્લ્ડકપ દરમિયાન પણ એક રેકોર્ડ બનાવ્યો હતો. તેણે આ ટૂર્નામેન્ટમાં એકપણ મેચ હાર્યા વિના ટાઈટલ જીત્યું હતું. ભારતે ફાઈનલ મેચમાં સાઉથ આફ્રિકાને 7 રનથી હરાવ્યું હતું.
