- T20 વર્લ્ડકપના ઈતિહાસમાં 12 વર્ષ પહેલા બન્યો મહારેકોર્ડ
- બ્રેન્ડન મેક્કુલમે T20 વર્લ્ડકપમાં સૌથી મોટી ઇનિંગ રમવાનો રેકોર્ડ બનાવ્યો
- આ ભારતીય બેટ્સમેન T20 વર્લ્ડકપમાં આ રેકોર્ડ તોડવાની ક્ષમતા ધરાવે છે
T20 વર્લ્ડકપના ઈતિહાસમાં 12 વર્ષ પહેલા એક મોટો રેકોર્ડ બન્યો હતો જેને આજ સુધી કોઈ બેટ્સમેન તોડી શક્યો નથી. 2012માં T20 વર્લ્ડકપમાં ન્યૂઝીલેન્ડના પૂર્વ બેટ્સમેને આ ટૂર્નામેન્ટમાં સૌથી મોટી ઇનિંગ રમવાનો રેકોર્ડ બનાવ્યો હતો, જે અત્યાર સુધી અજેય છે. ન્યૂઝીલેન્ડના ભૂતપૂર્વ વિસ્ફોટક બેટ્સમેન બ્રેન્ડન મેક્કુલમે બાંગ્લાદેશ સામેની મેચમાં શાનદાર સદી ફટકારી હતી. આજ સુધી અન્ય કોઈ બેટ્સમેન આનાથી મોટી ઈનિંગ રમી શક્યા નથી, પરંતુ આ ભારતીય બેટ્સમેન 2024ના T20 વર્લ્ડકપમાં તેને તોડવાની ક્ષમતા ધરાવે છે.
મેક્કુલમે રમી હતી સૌથી મોટી ઇનિંગ
ભૂતપૂર્વ બેટ્સમેન બ્રેન્ડન મેક્કુલમે 2012 વર્લ્ડકપમાં ન્યૂઝીલેન્ડ માટે સૌથી મોટી ઇનિંગ રમી હતી, જેમાં તેણે 123 રન બનાવ્યા હતા. તેણે બાંગ્લાદેશના બોલરોની ધોલાઇ કરતા 11 ચોગ્ગા અને 7 છગ્ગા ફટકાર્યા હતા. ત્યારબાદ મેક્કુલમે ક્રિસ ગેલનો સર્વોચ્ચ વ્યક્તિગત સ્કોર તોડ્યો હતો. ગેલે 2007 T20 વર્લ્ડકપમાં દક્ષિણ આફ્રિકા સામે 117 રન બનાવ્યા હતા. જો કે ગેલ હવે બીજા સ્થાને છે, પરંતુ અત્યાર સુધી આ ટૂર્નામેન્ટમાં મેક્કુલમથી મોટો સ્કોર અન્ય કોઈ કરી શક્યું નથી.
ટોચના 5 બેટ્સમેન જેમણે સૌથી મોટો સ્કોર બનાવ્યો
- બ્રેન્ડન મેક્કુલમ - 123 રન (2012)
- ક્રિસ ગેલ - 117 રન (2007)
- એલેક્સ હેલ્સ - 116 રન* (2014)
- અહેમદ શહેઝાદ - 111 રન* (2014)
- રિલે રૂસો - 109 રન (2022)
આ ભારતીયો તોડી શકે છે રેકોર્ડ
સૂર્યકુમાર યાદવ અને યશસ્વી જયસ્વાલ T20 વર્લ્ડકપના ઈતિહાસમાં સૌથી મોટી ઇનિંગ્સ રમવાના મેક્કુલમના રેકોર્ડને તોડવાની ક્ષમતા ધરાવે છે. આ બંને બેટ્સમેન ચોગ્ગા અને છગ્ગા ફટકારવામાં માહિર છે. મોટી વાત એ છે કે આ બંનેના નામે ટી20 ફોર્મેટમાં સદીઓ નોંધાયેલી છે. સૂર્યકુમાર યાદવે T20 ઈન્ટરનેશનલમાં 4 સદી ફટકારી છે. જો કે હવે જોવાનું એ રહેશે કે મેક્કુલમનો આ મહાન રેકોર્ડ આ વખતે પણ તૂટે છે કે નહીં.
