- RCBએ કોહલીની કેપ્ટન્સીમાં પંજાબ સામેની મેચમાં 24 રનથી જીત મેળવી
- હર્ષલ પટેલના બોલ પર જિતેશને LBW આપ્યો હતો પછી જિતેશે DRS લેવાનું નક્કી કર્યું
- DRS વખતે કોહલી અને મેક્સવેલનો એક વીડિયો સોશિયલ મીડિયા પર ખૂબ વાયરલ થયો
રોયલ ચેલેન્જર્સ બેંગ્લોરની ટીમે વિરાટ કોહલીની કેપ્ટન્સીમાં પંજાબ કિંગ્સ સામે રમાયેલી મેચમાં 24 રનથી જીત મેળવી હતી. આ જીત સાથે હવે RCB ટીમે 6 મેચમાં 3 જીત હાંસલ કરી છે. મેચ દરમિયાન DRSના નિર્ણય વખતે વિરાટ કોહલી અને ગ્લેન મેક્સવેલનો એક વીડિયો સોશિયલ મીડિયા પર વાયરલ થઈ રહ્યો છે, જેમાં તેઓ સ્ટોન પેપર સિઝર રમતા જોવા મળ્યા હતા.
જ્યારે પંજાબ કિંગ્સની ટીમ 175 રનના લક્ષ્યનો પીછો કરવા ઉતરી ત્યારે અમ્પાયરે તેમની ઇનિંગ દરમિયાન હર્ષલ પટેલના એક બોલ પર જિતેશ શર્માને LBW આઉટ આપ્યો હતો. આ પછી જિતેશે DRS લેવાનું નક્કી કર્યું. આ દરમિયાન જ્યાં બધાની નજર થર્ડ અમ્પાયરના નિર્ણય પર ટકેલી હતી, ત્યારે વિરાટ કોહલી અને ગ્લેન મેક્સવેલ સ્ટોન પેપર સિઝર રમતા જોવા મળ્યા હતા. આ વીડિયો સામે આવ્યા બાદ ગ્લેન મેક્સવેલે પણ મેચ બાદ સોશિયલ મીડિયા પર જવાબ આપવામાં મોડું ન કર્યું અને કહ્યું કે વિરાટને આ ગેમમાં ખૂબ જ ખરાબ આઈડિયા છે જેમાં તે હંમેશા પેપર માટે જાય છે.
વિરાટ કોહલીએ મેચમાં 4 DRS લીધા અને બધા સાચા સાબિત થયા
ફાફ ડુપ્લેસીસની જગ્યાએ વિરાટ કોહલીને આ મેચમાં RCB ટીમની કેપ્ટનશિપની જવાબદારી સોંપવામાં આવી હતી. ફરી એકવાર આ જવાબદારી નિભાવતી વખતે જ્યાં વિરાટ કોહલીએ બેટ વડે 59 રનની શાનદાર ઈનિંગ રમી, ત્યાં તે DRS લેવાના મામલે પણ ઘણો સારો સાબિત થયો. પંજાબની ઇનિંગ્સ દરમિયાન કોહલીએ કુલ 4 વખત DRS લેવાનું નક્કી કર્યું, જેમાં 2 આઉટ માટે હતા અને તે બંને સંપૂર્ણ રીતે સાચા સાબિત થયા હતા.
