T20 ક્રિકેટની ક્યારથી થઈ હતી શરૂઆત? આ દેશો વચ્ચે રમાઈ પ્રથમ મેચ

ક્રિકેટના સૌથી ટૂંકા ફોર્મેટ એટલે કે T20 ક્રિકેટની લોકપ્રિયતા કોઈનાથી છુપાયેલી નથી. છેલ્લા બે દાયકામાં ક્રિકેટના આ ફોર્મેટે આ રમતના ચાહકોના દિલમાં અમીટ છાપ છોડી છે. ક્રિકેટના આ ફોર્મેટની લોકપ્રિયતાને કારણે ઘણા નવા દેશો પણ આ રમત તરફ વળ્યા અને પોતાના પ્રદર્શનથી દરેકના દિલ જીતી લીધા. તેમાં યુએસએ અને અફઘાનિસ્તાન જેવી ટીમો સામેલ છે, જેમણે સફળતાના નવા આયામો સર કર્યા છે.

ઓલિમ્પિકમાં મળ્યું ક્રિકેટને સ્થાન

ક્રિકેટના આ ફોર્મેટમાં લોકોની રુચિને ધ્યાનમાં રાખીને આ રમતને લોસ એન્જલસ ઓલિમ્પિક-2028માં પણ સ્થાન આપવામાં આવ્યું છે. ઓલિમ્પિકમાં ક્રિકેટના આગમન સાથે આ રમતનો પડઘો સમગ્ર વિશ્વમાં વધુ પ્રસરશે તે સ્વાભાવિક છે. દરમિયાન, અમે વાત કરી રહ્યા છીએ કે ક્રિકેટનું આ સૌથી નાનું ફોર્મેટ ક્યારે શરૂ થયું અને કઈ બે ટીમો વચ્ચે પહેલી મેચ રમાઈ.

ઓસ્ટ્રેલિયા અને ન્યુઝીલેન્ડ વચ્ચે રમાઈ હતી પ્રથમ મેચ

ક્રિકેટના આ ફોર્મેટની પ્રથમ આંતરરાષ્ટ્રીય મેચ (પુરુષો) એટલે કે T20 ક્રિકેટ 17 ફેબ્રુઆરી, 2005ના રોજ ઓકલેન્ડમાં રમાઈ હતી. આ મેચ ન્યૂઝીલેન્ડ અને ઓસ્ટ્રેલિયા વચ્ચે રમાઈ હતી. તત્કાલીન ODI વર્લ્ડ કપ ચેમ્પિયન ટીમ ઓસ્ટ્રેલિયાએ આ મેચમાં 20 ઓવરમાં 5 વિકેટ ગુમાવીને 214 રન બનાવ્યા હતા. ઓસ્ટ્રેલિયાએ આ મેચ 44 રને જીતી લીધી હતી. આ મેચમાં ઓસ્ટ્રેલિયાના કેપ્ટન રિકી પોન્ટિંગે 55 બોલમાં અણનમ 98 રન બનાવ્યા હતા. ક્રિસ ગેલે 2007માં પ્રથમ ટી20 વર્લ્ડ કપમાં સદી ફટકારી હતી, આ પહેલા આ સૌથી મોટો સ્કોર પણ હતો.

માઈકલ કાસ્પ્રોવિઝે હતો જીતનો હીરો

ઓસ્ટ્રેલિયા દ્વારા આપવામાં આવેલા 215 રનના ટાર્ગેટનો પીછો કરતી વખતે સ્કોટ સ્ટાઈરિસે ન્યૂઝીલેન્ડ માટે 39 બોલમાં 66 રનની શાનદાર ઈનિંગ રમી હતી પરંતુ તે પોતાની ટીમને જીત તરફ લઈ જઈ શક્યો નહોતો. ઓસ્ટ્રેલિયાના ફાસ્ટ બોલર માઈકલ કાસ્પ્રોવિઝે 29 રનમાં 4 વિકેટ ઝડપી હતી અને ઓસ્ટ્રેલિયાને 44 રનથી મેચ જીતવામાં મદદ કરવામાં મહત્વની ભૂમિકા ભજવી હતી. આ મેચમાં રિકી પોન્ટિંગને પ્લેયર ઓફ ધ મેચ પસંદ કરવામાં આવ્યો હતો.

પુરુષોની પહેલા મહિલા T20 આંતરરાષ્ટ્રીય મેચ રમાઈ

પુરૂષો પહેલા મહિલાઓ વચ્ચે પ્રથમ આંતરરાષ્ટ્રીય T20 મેચ રમાઈ હતી. આ મેચ 05 ઓગસ્ટ 2004ના રોજ યુનાઈટેડ કિંગડમના હોવમાં ઈંગ્લેન્ડ અને ન્યુઝીલેન્ડ વચ્ચે રમાઈ હતી. આ મેચમાં ન્યુઝીલેન્ડની ટીમે જીત મેળવી હતી.

હવે 100 થી વધુ દેશો રમે છે T20 ક્રિકેટ

હાલમાં આંતરરાષ્ટ્રીય T20 ક્રિકેટ મેચ રમનારા દેશોની સંખ્યા 100થી વધુ છે. જ્યારે માત્ર 16 દેશો વન-ડે ઈન્ટરનેશનલ મેચો રમે છે અને 12 દેશો ટેસ્ટ ક્રિકેટ રમે છે. ઇન્ટરનેશનલ ક્રિકેટ કાઉન્સિલ (ICC) એ કહ્યું છે કે તે T20ને રમતને વૈશ્વિક સ્તરે લઇ જવા માટે સૌથી યોગ્ય ફોર્મેટ માને છે.