- મહિલા એશિયા કપ 2024માં ટીમ ઈન્ડિયાએ અજેય રહીને સેમીફાઈનલમાં પ્રવેશ કરી લીધો છે
- ટીમ ઈન્ડિયા સેમિફાઈનલમાં બાંગ્લાદેશ સામે ટકરાશે
- આ મેચ જીતીને ટીમ ઈન્ડિયા ફાઈનલમાં પહોંચીને નવો રેકોર્ડ બનાવવા ઈચ્છશે
મહિલા એશિયા કપ 2024માં ભારત સહિત 4 ટીમોએ સેમીફાઈનલમાં પ્રવેશ કર્યો છે. ગ્રુપ-એમાંથી ભારત અને પાકિસ્તાન અને ગ્રુપ-બીમાંથી શ્રીલંકા અને બાંગ્લાદેશ સેમિફાઈનલમાં પ્રવેશ્યા છે. નેપાળ, યુએઈ, થાઈલેન્ડ અને મલેશિયાની ટીમોની સફર ગ્રુપ સ્ટેજમાં જ અટકી ગઈ છે. હવે ટુર્નામેન્ટની પહેલી સેમીફાઈનલ મેચ ભારત અને બાંગ્લાદેશ વચ્ચે રમાશે અને બીજી સેમીફાઈનલ મેચ શ્રીલંકા અને પાકિસ્તાન વચ્ચે રમાશે.
ભારતની અત્યાર સુધીની સફર
ભારતીય ટીમ ટૂર્નામેન્ટમાં અત્યાર સુધી અજેય રહી છે. ટીમે પહેલી મેચમાં પાકિસ્તાનને 7 વિકેટે, બીજી મેચમાં યુએઈને 78 રને અને ત્રીજી મેચમાં નેપાળને 82 રને હરાવ્યું હતું. ટીમની સ્ટાર બેટ્સમેન શેફાલી વર્મા ફુલ ફોર્મમાં છે. શેફાલીએ 3 મેચમાં 158 રન બનાવ્યા છે. તે ટૂર્નામેન્ટમાં સૌથી વધુ રન બનાવનારી બીજી બેટ્સમેન છે. શેફાલીએ નેપાળ સામે 48 બોલમાં 81 રનની શાનદાર ઈનિંગ રમી હતી. ટીમની સ્ટાર બોલર દીપ્તિ શર્માએ 3 મેચમાં 8 વિકેટ ઝડપી છે. તે ટૂર્નામેન્ટમાં સૌથી વધુ વિકેટ લેનારી બોલર છે. ટીમ ઈન્ડિયાએ ગ્રુપ સ્ટેજમાં 3 મેચમાં 6 પોઈન્ટ ભેગા કરીને ટોપ પર રહીને સેમીફાઈનલમાં પ્રવેશ કર્યો છે.
બાંગ્લાદેશનું પ્રદર્શન
બાંગ્લાદેશની ટીમે ટૂર્નામેન્ટમાં અત્યાર સુધી 3 મેચ રમી છે. જેમાં ટીમે 2 મેચ જીતી છે અને 1 મેચ હારી છે. ટીમને પહેલી મેચમાં શ્રીલંકાએ 7 વિકેટે હરાવ્યું હતું. આ પછી ટીમે થાઈલેન્ડને 7 વિકેટે અને મલેશિયાને 114 રનથી હરાવીને સેમિફાઈનલમાં પ્રવેશ કર્યો હતો. બાંગ્લાદેશે ગ્રુપ સ્ટેજમાં 3 મેચમાંથી 4 પોઈન્ટ સાથે પોઈન્ટ ટેબલમાં બીજા સ્થાને રહીને સેમીફાઈનલની ટિકિટ મેળવી લીધી છે.
બંને ટીમોમાં કોનું પલડું ભારે?
ભારત અને બાંગ્લાદેશ વચ્ચે અત્યાર સુધીમાં કુલ 13 ટી20 મેચ રમાઈ છે. જેમાં ભારતે 11 મેચ જીતી છે અને બાંગ્લાદેશે 2 મેચ જીતી છે. એશિયા કપમાં અત્યાર સુધી બંને ટીમો 4 વખત સામસામે આવી ચુકી છે. ભારત બે વખત અને બાંગ્લાદેશ બે વખત જીત્યું છે.
ટીમ ઈન્ડિયા રચશે ઈતિહાસ
મહિલા એશિયા કપની અત્યાર સુધી કુલ 8 એડિશન રમાઈ છે, જેમાં ટીમ ઈન્ડિયાએ 7 વખત ટાઈટલ જીત્યું છે, જ્યારે બાંગ્લાદેશે 2018 એશિયા કપમાં એકમાત્ર ટાઈટલ જીત્યું છે. આ વર્ષે ટીમ ઈન્ડિયા રનર અપ બની હતી.
ફાઈનલમાં કોનો સામનો થશે?
જો ટીમ ઈન્ડિયા ફાઈનલમાં પહોંચશે તો ટીમની ટાઈટલ મેચ શ્રીલંકા અથવા પાકિસ્તાન સામે થશે. શ્રીલંકાની ટીમ આ પહેલા 5 વખત ફાઈનલમાં પહોંચી છે અને દરેક વખતે તેને ટીમ ઈન્ડિયાથી હારનો સામનો કરવો પડ્યો છે. પાકિસ્તાનની ટીમ બે વખત એશિયા કપની ફાઈનલમાં પહોંચી છે અને બંને વખત ટીમ ઈન્ડિયા સામે હારી છે.
