સચિન તેંડુલકરનો આ રેકોર્ડ પણ વિરાટે તોડવો જોઇએ,યુવરાજ સિંહે આપ્યું મોટું નિવેદન

• વિરાટ કોહલીએ 50મી ODI સદી ફટકારીને ચર્ચામાં
  
• હવે પૂર્વ ક્રિકેટર યુવરાજ સિંહે આપી પ્રતિક્રિયા
• 100 સદીનો રેકોર્ડ પણ વિરાટ કોહલીએ તોડવો જોઈએ

વિરાટ કોહલીએ ન્યૂઝીલેન્ડ સામેની સેમિફાઇનલ મેચમાં તેની 50મી ODI સદી ફટકારીને સચિન તેંડુલકરનો સૌથી વધુ સદીનો રેકોર્ડ તોડ્યો હતો. હવે પૂર્વ ક્રિકેટર યુવરાજ સિંહે આ અંગે મોટી પ્રતિક્રિયા આપી છે. તેણે કહ્યું છે કે સચિન તેંડુલકરે બનાવેલો 100 સદીનો રેકોર્ડ પણ વિરાટ કોહલીએ તોડવો જોઈએ.

મુંબઈના વાનખેડે સ્ટેડિયમમાં રમાયેલી ન્યૂઝીલેન્ડ સામેની સેમીફાઈનલ મેચમાં વિરાટ કોહલીએ જબરદસ્ત ઇનિંગ રમી હતી. વિરાટ કોહલીએ 113 બોલમાં 117 રનની શાનદાર સદી ફટકારી હતી. આ તેની ODI કારકિર્દીની 50મી સદી છે અને હવે તે ODI ઈતિહાસમાં સૌથી વધુ સદી ફટકારનાર ખેલાડી બની ગયો છે. વિરાટ કોહલીએ મહાન સચિન તેંડુલકરનો 49 સદીનો રેકોર્ડ તોડ્યો હતો. ખાસ વાત એ છે કે જ્યારે વિરાટ કોહલીએ આ રેકોર્ડ તોડ્યો ત્યારે સચિન તેંડુલકર મેદાનમાં હાજર હતા અને તેણે વિરાટ કોહલીને ગળે લગાવીને અભિનંદન આપ્યા હતા.

વિરાટ કોહલી ખૂબ જ ઝડપથી સદી ફટકારી રહ્યો છે - યુવરાજ સિંહ

યુવરાજ સિંહને વિરાટ કોહલીના 50 સદીના રેકોર્ડ વિશે પ્રશ્ન પૂછવામાં આવ્યો હતો. આના જવાબમાં તેમણે કહ્યું કે, વિરાટ કોહલી જે ગતિથી ચાલી રહ્યો છે, તેણે સચિન તેંડુલકરનો 100 સદીનો રેકોર્ડ પણ તોડવો જોઈએ. ODI ક્રિકેટમાં મને લાગે છે કે તે આનાથી પણ વધુ સદી ફટકારી શકે છે. તેમનો કન્વર્ઝન રેટ ઘણો સારો છે. 71 અડધી સદી અને 50 સદી કોઈ મજાક નથી.

તમને જણાવી દઈએ કે સચિન તેંડુલકરે પોતે ઘણા વર્ષો પહેલા કહ્યું હતું કે માત્ર વિરાટ કોહલી જ તેનો રેકોર્ડ તોડી શકે છે અને માત્ર કોહલીએ જ આ કારનામું કર્યું છે. વિરાટ કોહલીએ આ વર્લ્ડ કપમાં શાનદાર પ્રદર્શન કર્યું છે અને અત્યાર સુધી તે સૌથી વધુ રન બનાવનાર બેટ્સમેન છે.