યુઝવેન્દ્ર ચહલે રચ્યો ઈતિહાસ, દુનિયાના દિગ્ગજોને હરાવી બન્યો IPLનો નંબર 1 બોલર

• 143મી મેચમાં ડ્વેન બ્રાવોને પાછળ છોડી દીધો 
  
• આ સિઝનમાં ચહલને પાછળ છોડવો મુશ્કેલ છે 
• લીગના ઈતિહાસમાં સૌથી વધુ વિકેટ લેનાર બોલર
  

ભારતના સ્ટાર લેગ સ્પિનર ​​યુઝવેન્દ્ર ચહલે IPLમાં ઈતિહાસ રચ્યો છે. તેણે IPL 2023ની 56મી મેચમાં કોલકાતા નાઈટ રાઈડર્સના કેપ્ટન નીતીશ રાણાની વિકેટ લઈને એક મોટી સિદ્ધિ હાંસલ કરી હતી. તે હવે આ લીગના ઈતિહાસમાં સૌથી વધુ વિકેટ લેનાર બોલર બની ગયો છે. છેલ્લા ઘણા સમયથી આ રેકોર્ડ ડ્વેન બ્રાવોના નામે હતો. પરંતુ હવે આ તાજ રાજસ્થાન રોયલ્સના બોલરે લઈ લીધો છે.

143મી મેચમાં ડ્વેન બ્રાવોને પાછળ છોડી દીધો 

યુઝવેન્દ્ર ચહલે તેની 143મી મેચમાં ડ્વેન બ્રાવોને પાછળ છોડી દીધો છે. જ્યારે બ્રાવોએ 161 મેચમાં 183 વિકેટ લીધી હતી. અગાઉ સનરાઇઝર્સ હૈદરાબાદ સામેની છેલ્લી મેચમાં ચહલે બ્રાવોની બરાબરી કરી હતી. હવે જો સક્રિય ખેલાડીઓની વાત કરીએ તો પીયૂષ ચાવલા, અમિત મિશ્રા અને રવિચંદ્રન અશ્વિન તેમની પાછળ છે. જો કે આ ત્રણેય ખેલાડીઓ ચહલથી ઘણા પાછળ છે. આ સિઝનમાં ચહલને પાછળ છોડવો મુશ્કેલ લાગે છે.

IPLમાં સૌથી વધુ વિકેટ લેનારા 5 બોલર

1. યુઝવેન્દ્ર ચહલ - 184 વિકેટ (143 મેચ)*

2. ડ્વેન બ્રાવો - 183 વિકેટ (161 મેચ)

3. પિયુષ ચાવલા - 174 વિકેટ (175 મેચ)

4. અમિત મિશ્રા - 172 વિકેટ (160 મેચ)

5. રવિચંદ્રન અશ્વિન - 171 વિકેટ (196 મેચ)*

જો આ સિઝનની વાત કરીએ તો ચહલ અત્યાર સુધી શાનદાર લયમાં જોવા મળ્યો છે. નીતિશ રાણાની વિકેટ આ સિઝનમાં તેની 18મી વિકેટ હતી. તે પર્પલ કેપમાં પણ ટોચના બોલરોની રેસમાં છે. ચહલ ગત સિઝનમાં પર્પલ કેપનો વિજેતા પણ હતો અને તેના નામે હેટ્રિક પણ હતી. તેનું શાનદાર પ્રદર્શન આ સિઝનમાં પણ ચાલુ છે. હવે જોવાનું એ રહેશે કે આ વર્ષે તે પર્પલ કેપની રેસમાં ક્યાં સુધી આગળ વધે છે. હાલમાં તેનું આ પ્રદર્શન આગામી દિવસોમાં ટીમ ઈન્ડિયામાં તેની વાપસી માટે ટર્નિંગ પોઈન્ટ સાબિત થઈ શકે છે.