જૂન, 2026ના બીજા સપ્તાહમાં વૈશ્વિક ક્રૂડ ઓઇલ બજારમાં ભારે અસ્થિરતા જોવા મળી રહી છે. સ્ટ્રેટ ઓફ હોર્મુઝ જે દુનિયાનો સૌથી મહત્ત્વનો દરિયાઈ એનર્જી રૂટ છે, ત્યાં ઈરાન સાથે વધેલા ભૌગોલિક તણાવને કારણે સપ્તાહની શરૂઆતમાં ક્રૂડની કિંમતો આકાશે આંબી ગઈ હતી. ઈરાને આ વ્યૂહાત્મક જળમાર્ગ બંધ કરવાની ચીમકી આપી હતી. જોકે, સપ્તાહના અંતે અમેરિકાના રાષ્ટ્રપતિ ડોનાલ્ડ ટ્રમ્પ દ્વારા ઈરાન પર પ્રસ્તાવિત સૈન્ય હુમલા ટાળવાના અને રાજદ્વારી વાતચીત ચાલુ રાખવાના સંકેતો મળતાં જ બજારને મોટી રાહત મળી છે. બ્રેન્ટ ક્રૂડ વાયદા (Brent Crude) ઘટીને બેરલ દીઠ આશરે $ 89.17 અને અમેરિકન ડબલ્યુટીઆઈ (WTI) $86.48 પર આવી ગયા છે, જે સાપ્તાહિક ધોરણે 4% થી વધુનો ઘટાડો દર્શાવે છે.
ફિફા વર્લ્ડકપ 2026 : ત્રણ દેશોની યજમાનીમાં ફૂટબોલના મહાકુંભનો પ્રારંભ
લાંબી પ્રતીક્ષા બાદ આખરે 11 જૂન, 2026ના રોજ ઉત્તર અમેરિકાના ત્રણ દેશો યુએસએ, મેક્સિકો અને કેનેડાની સંયુક્ત યજમાનીમાં ઇતિહાસના સૌથી મોટા ફિફા મેન્સ વર્લ્ડકપનો ધમાકેદાર પ્રારંભ થઈ ચૂક્યો છે. આ વખતે ટૂર્નામેન્ટમાં સૌથી રસપ્રદ મુદ્દો એ છે કે ઇતિહાસમાં પહેલીવાર 48 ટીમો આ ટ્રોફી માટે મેદાને ઊતરી રહી છે, જેના કારણે મેચોની સંખ્યા વધીને 104 થઈ ગઈ છે. મેક્સિકો સિટીના પ્રતિષ્ઠિત સ્ટેડિયમમાં રમાયેલી ઓપનિંગ મેચમાં યજમાન મેક્સિકોએ સાઉથ આફ્રિકાને 2-0થી હરાવીને પોતાના અભિયાનની શાનદાર શરૂઆત કરી છે, જ્યારે બીજી મેચમાં સાઉથ કોરિયાએ ચેક રિપબ્લિક સામે 2-1થી જીત મેળવી છે. આગામી દિવસોમાં બ્રાઝિલ, આર્જેન્ટિના અને ડિફેન્ડિંગ ચેમ્પિયન ફ્રાન્સ જેવી દિગ્ગજ ટીમો પણ મેદાનમાં ઊતરશે.
આફ્રિકા વાઇલ્ડ લાઇફ : સોલોન્ગા નેશનલ પાર્કમાં `બોનોબોસ' સાથે અનોખી મિત્રતા
આફ્રિકાનાં જંગલોમાંથી વાઈલ્ડ લાઈફ ક્ષેત્રે એક અત્યંત રસપ્રદ અને હકારાત્મક સમાચાર સામે આવ્યા છે. ડેમોક્રેટિક રિપબ્લિક ઓફ કોંગો(DRC)ના પ્રખ્યાત સોલોન્ગા નેશનલ પાર્કમાં, સંશોધકો અને વન રક્ષકોએ છેલ્લાં ચાર વર્ષની અથાક મહેનત પછી દુનિયાના સૌથી ભયગ્રસ્ત મહાવાનરો પૈકીના એક એવા `બોનોબોસ'(Bonobos)નો વિશ્વાસ જીતવામાં મોટી સફળતા મેળવી છે. માનવજાતના સૌથી નજીકના સંબંધી ગણાતા આ વન્યજીવો સામાન્ય રીતે માણસોથી દૂર ભાગે છે, પરંતુ હવે તેઓ મર્યાદિત માનવ હાજરીને સ્વીકારતા થયા છે. પાર્ક પ્રશાસન આ પ્રજાતિને માનવ હાજરી સાથે રહેતા શીખવી રહ્યું છે, જેથી આગામી વર્ષમાં પ્રવાસીઓ જંગલમાં કુદરતી વાતાવરણમાં આ અદ્ભુત જીવોને નજીકથી જોઈ શકશે.
ભારતીય ચોમાસુ 2026 : આઈએમડીનું અનુમાન અને દેશ પર તેની અસરો
ભારતીય હવામાન વિભાગ(IMD)ના જૂન, 2026ના તાજા બુલેટિન અનુસાર દેશમાં દક્ષિણ-પશ્ચિમ ચોમાસાની પ્રગતિ મિશ્ર રહી છે. કેરળમાં 4 જૂને મોડું બેઠા બાદ, હાલમાં ચોમાસુ કર્ણાટક, તેલંગણા, આંધ્રપ્રદેશ અને પશ્ચિમ બંગાળના કેટલાક ભાગોમાં આગળ વધી ચૂક્યું છે. જોકે, વેસ્ટર્ન ડિસ્ટર્બન્સની સક્રિયતાને કારણે મધ્ય અને ઉત્તર ભારતમાં ચોમાસાની ગતિ થોડી ધીમી પડી છે. આઈએમડીના અનુમાન મુજબ, જૂન મહિનામાં સમગ્ર દેશમાં સરેરાશ વરસાદ સામાન્ય કરતાં ઓછો (લોન્ગ પિરિયડ એવરેજના 92% થી ઓછો) રહેવાની સંભાવના છે. દિલ્હી-NCR સહિત ઉત્તર ભારતમાં આગામી દિવસોમાં વાવાઝોડું, વીજળીના કડાકા અને હળવા વરસાદની ચેતવણી અપાઈ છે.
બોલિવૂડ વિવાદ : રણવીર સિંહ પરનો કામબંધીનો આદેશ (બૅન) પાછો ખેંચાયો
બોલિવૂડના સુપરસ્ટાર રણવીર સિંહ અને ફિલ્મ કર્મચારીઓની સર્વોચ્ચ સંસ્થા `ફેડરેશન ઓફ વેસ્ટર્ન ઇન્ડિયા સિને એમ્પ્લોઇઝ' વચ્ચે સર્જાયેલો હાઇ-પ્રોફાઇલ વિવાદ ચાલુ અઠવાડિયે ભારે ચર્ચામાં રહ્યો છે. એસોસિએશને રણવીર સામે અસહકારનો આદેશ જાહેર કરીને એક પ્રકારે બૅન મૂક્યો હતો. જોકે, આ વિવાદ વધુ વકરે તે પહેલાં જ રણવીર સિંહની લીગલ ટીમે FWICEને કાનૂની નોટિસ મોકલીને પડકાર ફેંક્યો કે કરાર આધારિત વિવાદોમાં ફેડરેશનને આવી સત્તા નથી. છેવટે, પ્રોડ્યૂસર્સ ગિલ્ડ અને અન્ય કલાકાર મંડળોની મધ્યસ્થતા બાદ, FWICE એ કાનૂની લડાઈ ટાળવા અને મામલો શાંતિપૂર્ણ રીતે ઉકેલવા માટે રણવીર પરનો આ પ્રતિબંધ તાત્કાલિક ધોરણે પાછો ખેંચી લીધો છે, જેનાથી અભિનેતાની આગામી ફિલ્મના શૂટિંગનો રસ્તો સાફ થઈ ગયો છે.
આવી જ પોસ્ટ વાંચવા માટે ક્લિક કરો
