ગુજરાતનું ચોમાસાનું અત્યંત લોકપ્રિય હિલસ્ટેશન એટલે સાપુતારા. સહ્યાદ્રિ પર્વતમાળા (ડાંગનાં જંગલો) વચ્ચે દરિયાઈ સપાટીથી આશરે 1000 મીટરની ઊંચાઈએ આવેલું આ નયનરમ્ય સ્થળ પ્રકૃતિપ્રેમીઓ માટે સ્વર્ગ સમાન છે. `સાપુતારા' શબ્દનો અર્થ સાપ અને ઉતારા મતલબ કે સાપોનો ઉતારો. અર્થાત્ `સર્પોનું નિવાસસ્થાન' થાય છે. અહીંની સ્થાનિક આદિવાસી સંસ્કૃતિમાં પ્રકૃતિ અને જીવજંતુઓની પૂજાનું વિશેષ મહત્ત્વ છે. અહીં સર્પગંગા નદીના કિનારે સાપની એક પવિત્ર મૂર્તિ આવેલી છે. સ્થાનિક ડાંગી આદિવાસીઓ આજે પણ હોળી (શિગમો) અને અન્ય ખાસ તહેવારો પર આ સર્પરાજની પૂજા-અર્ચના કરે છે.
જો તમે રોજિંદી વ્યસ્ત જિંદગીમાંથી બ્રેક લઈને શાંતિ અને કુદરતી સૌંદર્યનો આનંદ માણવા માંગતા હોવ, તો સાપુતારા એક ઉત્તમ વિકલ્પ છે. સાપુતારા એ બજેટ ફ્રેન્ડલી હોવાની સાથે-સાથે શાંતિ અને પ્રાકૃતિક આહ્લાદકતાનો એક અદ્ભુત સંગમ છે.
સાપુતારાનાં મુખ્ય જોવાલાયક સ્થળો
સાપુતારા તળાવ : હિલસ્ટેશનના કેન્દ્રમાં આવેલું આ ખૂબ જ સુંદર અને શાંત તળાવ છે. અહીં પ્રવાસીઓ બોટિંગ (રો-બોટ અને પેડલ-બોટ)ની મજા માણી શકે છે. તળાવની આસપાસ સાંજના સમયે ચાલવું એ એક અદ્ભુત અનુભવ છે.
સનસેટ પોઇન્ટ અને સનરાઇઝ પોઇન્ટ : સૂર્યાસ્ત અને સૂર્યોદયના અદ્ભુત નજારા જોવા માટે આ બંને પોઇન્ટ બેસ્ટ છે. સનસેટ પોઇન્ટ પરથી સાંજે સૂર્યને પહાડો પાછળ આથમતો જોવો એ આંખોને ટાઢક આપે છે.
રોપ-વે : સાપુતારામાં રોપ-વેની સવારી ખૂબ લોકપ્રિય છે. તે તમને મુખ્ય વેલી પરથી સનસેટ પોઇન્ટ (ગવર્નર હિલ) તરફ લઈ જાય છે. હવામાં લટકતી ટ્રોલીમાંથી આખા સાપુતારા અને આસપાસની લીલીછમ ખીણોનો નજારો અદ્ભુત દેખાય છે.
વાંસદા નેશનલ પાર્ક અને ગિરા ધોધ : સાપુતારાથી આશરે 50 કિમી દૂર આવેલો ગિરા ધોધ અત્યંત ભવ્ય છે. ખાસ કરીને ચોમાસામાં તેનો નજારો જોવા જેવો હોય છે. આ ઉપરાંત વાંસદા નેશનલ પાર્કમાં ડાંગની સમૃદ્ધ વનસ્પતિ અને વન્યજીવો જોઈ શકાય છે.
ટ્રાઇબલ મ્યુઝિયમ : ડાંગના સ્થાનિક આદિવાસીઓની સંસ્કૃતિ, તેમનાં પરંપરાગત વસ્ત્રો, ઘરેણાં, વાદ્યો અને જીવનશૈલીને નજીકથી સમજવા માટે આ મ્યુઝિયમની મુલાકાત લેવી જ જોઈએ.
સ્ટેપ ગાર્ડન અને રોઝ ગાર્ડન : અનોખી સ્ટેપ શૈલીમાં બનેલો બગીચો અને વિવિધ જાતના ગુલાબોથી સજ્જ રોઝ ગાર્ડન પરિવાર સાથે સમય વિતાવવા અને ફોટોગ્રાફી માટે ઉત્તમ સ્થળ છે.
સાપુતારા જવાનો ઉત્તમ સમય
ચોમાસુ : જો તમારે સાપુતારાનું અસલી સૌંદર્ય જોવું હોય તો ચોમાસાની ઋતુ શ્રેષ્ઠ છે. આ સમયે ચારેય તરફ હરિયાળી છવાઈ જાય છે, પહાડો વાદળોથી ઘેરાયેલાં રહે છે અને નાનાં-મોટાં અસંખ્ય ઝરણાં જીવંત થઈ ઊઠે છે. વળી, આ દિવસોમાં અહીં પ્રખ્યાત `મોન્સૂન ફેસ્ટિવલ' પણ યોજાય છે.
શિયાળો (ઓક્ટોબરથી ફેબ્રુઆરી): શિયાળામાં અહીં ગુલાબી ઠંડી પડે છે અને સવારે ધુમ્મસભર્યું વાતાવરણ જોવા મળે છે. સાઇટસીઇંગ અને ટ્રેકિંગ માટે આ સમય ખૂબ અનુકૂળ છે.
આવી જ પોસ્ટ વાંચવા માટે ક્લિક કરો
