સિક્કિમથી કૈલાસ માનસરોવરની યાત્રાનો પાંચ વર્ષના લાંબા ગાળા પછી પુનઃ પ્રારંભ થયો છે. 36 પ્રવાસીઓનો પહેલો જથ્થો સિક્કિમના નાથુલા બોર્ડર પોઇન્ટથી ચીન હસ્તકના તિબેટના સ્વાયત્ત ક્ષેત્રમાં પ્રવેશ્યો હતો. 21થી 70 વર્ષની વયના યાત્રાળુઓના પહેલા જથ્થાને નાથુલામાં રાજ્યપાલ ઓમપ્રકાશ માથુરે વિદાય આપી હતી. તીર્થયાત્રીઓ માઉન્ટ એવરેસ્ટ અને માનસરોવર સુધી પહોંચવા માટે તિબેટના સ્વાયત્ત ક્ષેત્રમાં 11 દિવસ વિતાવશે. ચીનની સરહદે પીપલ્સ રિપબ્લિક ઓફ ચાઇનાના અધિકારીઓ અને સેનાના જવાનોએ તેમનું સ્વાગત કર્યું હતું. 36 તીર્થયાત્રીઓમાં 23 પુરુષ અને 13 મહિલા યાત્રાળુ છે. યાત્રાળુઓ બે દિવસ સુધી 18 માઇલમાં બનાવાયેલા નવા અનુકૂલન કેન્દ્રમાં રોકાયા હતા. તેના પછી શેરથાંગમાં બે દિવસ રોકાયા. શુક્રવારે તેમની તબીબી સ્થિતિ અને દસ્તાવેજોની તપાસ પછી તે ચીનની સરહદની અંદર ગયા હતા. સિક્કિમ પ્રવાસન વિભાગના સીઈઓ રાજેન્દ્ર છેતરીએ જણાવ્યું હતું કે આ સિક્કિમ અને દેશ માટે ગૌરવની ક્ષણ છે. કૈલાસ માનસરોવર પર યાત્રાના યજમાન થવું તે સિક્કિમ માટે સૌભાગ્યની વાત છે. અમને પ્રવાસીઓ પાસેથી સકારાત્મક પ્રતિક્રિયા મળવાની શરૂ થઈ ગઈ છે.
ટ્રુડોએ ભારત સાથે બગાડેલા કેનેડાના સંબંધો માર્ક કાર્નીએ સુધાર્યા
કેનેડામાં માર્ક કાર્ની વડાપ્રધાન બન્યા પછી ભારત-કેનેડા સંબંધો હવે ફરી પૂર્વવત્ થવાની દિશામાં આગળ વધી રહ્યા છે. કાર્નીએ તાજેતરમાં કહ્યું હતું કે તેમણે ખાલિસ્તાની આતંકી હરદીપસિંહ નિજ્જરની હત્યા મામલે ટિપ્પણી કરતાં પહેલાં તકેદારી રાખવી પડશે, કેમ કે આ ન્યાયિક પ્રક્રિયા સાથે જોડાયેલી બાબત છે. તેમનું આ નિવેદન એવા સમયે આવ્યું કે જ્યારે વડાપ્રધાન નરેન્દ્ર મોદી કેનેડાના આલ્બર્ટામાં કેનાનાસ્કિસ ખાતે જી-7 શિખર બેઠકમાં ભાગ લેવા પહોંચ્યા હતા અને કાર્ની સાથે તેમણે દ્વિપક્ષી વાટાઘાટો પણ કરી હતી. ભારત અને કેનેડાએ એકબીજાની રાજધાનીમાં હાઈ કમિશનર પુનઃ નીમવાની જાહેરાત કરી છે. બંને દેશો સંપૂર્ણ રાજદ્વારી સેવાઓ પુનઃ શરૂ કરવા તેમજ વ્યાપાર મંત્રણા પર ફરી હાથ ધરવા સંમત થયા છે. વડાપ્રધાન મોદી અને કાર્ની નવા હાઈ કમિશનર નીમવા પણ સંમત થયા હતા. બંનેએ પરસ્પર આદર, કાયદાના શાસન, સાર્વભૌમત્વ અને પ્રાદેશિક અખંડિતતાના સિદ્ધાંત પ્રત્યે પ્રતિબદ્ધતા પર આધારિત ભારત-કેનેડા સંબંધોના મહત્ત્વને પુનઃ પુષ્ટિ આપી હતી.
પિતા પ્રકાશ પાદુકોણને બેડમિન્ટન સ્કૂલ ડેડીકેટ કરતી દીપિકા
દીપિકાએ પિતા પ્રકાશ પાદુકોણને તેમના 70મા જન્મદિને એક બેડમિન્ટન સ્કૂલ ડેડિકેટ કરી છે. દીપિકાએ સોશિયલ મીડિયા પર જાતે આ ખુશીની ક્ષણ શેર કરી હતી. દીપિકાના પિતા પ્રકાશ પાદુકોણ બેડમિન્ટન લેજેન્ડ ગણાય છે. વાસ્તવમાં દીપિકાની પહેલી ઓળખ જ પ્રકાશ પાદુકોણની પુત્રી તરીકેની છે. દીપિકાએ પિતા સાથે મળીને આ સ્કૂલ લોન્ચ કરી છે. પ્રકાશ પાદુકોણ જ અહીં બેડમિન્ટનની તાલીમ આપવાના છે. દીપિકાએ આ ક્ષણે ગર્વ સાથે જણાવ્યું હતું કે જે લોકો બેડમિન્ટન રમીને મોટા થયા છે તેમને જ ખબર છે કે આ રમત કેટલી ખાસ છે. મારો પોતાનો પણ અંગત અનુભવ છે કે આ રમતે મારી જિંદગીનું ખાસ રીતે ઘડતર કર્યું છે. મારા પિતા આ વયે પણ પોતાનો મોટાભાગનો સમય બેડમિન્ટનમાં જ પસાર કરે છે. અમે ઈચ્છીએ છીએ આ રમત થકી કેળવાતી શિસ્ત અને ફિટનેસનો લાભ અન્ય લોકોને પણ મળે. દીપિકા અત્યારે કારકિર્દીમાં જુદાં કારણોસર ચર્ચામાં છે. તેણે હાલમાં જ સંદિપ રેડ્ડી વાંગાની ફિલ્મ `સ્પિરિટ' કામના કલાકો બાબતે છોડી દીધી છે.
32 વર્ષની વયે ટેસ્ટ રમવાની તક મળી અને પહેલી જ મેચમાં 6 વિકેટ
ભારતના ભૂતપૂર્વ ટેસ્ટ ક્રિકેટર અને સૌરાષ્ટ્રના વતની દિલીપ દોશીનું સોમવારે રાત્રે લંડન ખાતે નિધન થયું હતું. તેઓ 77 વર્ષના હતા. ભારતની વિખ્યાત સ્પિન ચોકડીની વિદાય બાદ દોશીએ ભારતીય ટેસ્ટ ક્રિકેટમાં સ્પિનની કલાને આગળ ધપાવી હતી. 1947માં રાજકોટ ખાતે જન્મેલા દિલીપ દોશીને 32 વર્ષની વયે ભારત માટે ટેસ્ટ રમવાની તક મળી હતી અને તેમણે પોતાની પહેલી જ ટેસ્ટમાં ચેપોક ખાતે ઓસ્ટ્રેલિયા સામે છ વિકેટ ખેરવી દીધી હતી. 33 ટેસ્ટની કારકિર્દીમાં દોશીએ 114 વિકેટ ઝડપી હતી અને 28મી ટેસ્ટ દરમિયાન તેમણે કારકિર્દીની 100 વિકેટ પૂરી કરી હતી. એ અરસામાં કપિલ દેવ સાથે મળીને તેમણે ભારતને કેટલીક ટેસ્ટમાં વિજય પણ અપાવ્યો હતો. તેઓ રણજી ટ્રોફીમાં બંગાળ માટે 62 મેચ રમ્યા હતા અને ત્યાર બાદ વતન પરત ફરીને સૌરાષ્ટ્ર માટે રણજી ટ્રોફીમાં રમ્યા હતા. જોકે, તેઓ મોટાભાગની ફર્સ્ટ ક્લાસ ક્રિકેટ ઇંગ્લેન્ડમાં રમ્યા હતા. તેઓ વોરવિકશાયર અને નોટ્ટિંગહામ કાઉન્ટી માટે અનુક્રમે 43 અને 44 એમ કુલ 87 કાઉન્ટી મેચ રમ્યા હતા. એકંદરે 238 ફર્સ્ટ ક્લાસ મેચમાં દિલીપ દોશીએ 898 વિકેટ ઝડપી હતી. જેમાં 43 વાર તેમણે ઇનિંગ્સમાં પાંચ કે તેથી વધુ વિકેટ ખેરવી હતી. 1981માં ભારતે મેલબોર્ન ખાતે ઓસ્ટ્રેલિયા સામે ઐતિહાસિક વિજય હાંસલ કર્યો તેમાં દોશીએ પાંચ વિકેટ ઝડપી હતી.
