આસો મહિનાની નવરાત્રી શરૂ થવા વચ્ચે માત્ર થોડા કલાકો બાકી છે. નવરાત્રી એટલે થનગનાટ અને તરવરાટનો ઉત્સવ, પરંતુ કહેવાય નવરાત્રી, વાસ્તવમાં તો શું દિવસ અને શું રાત. રાત્રિમાં આહ્લાદક સ્વરૂપ ધારણ કરતો આ માત્ર એક તહેવાર નથી, પણ નવ દિવસ અને નવ રાતનો એક એવો પરંપરાગત મહોત્સવ છે, જેની તરસ આખું વરસ અનુભવાતી હોય છે. નવરાત્રી એટલે મા શક્તિ સાથે વ્યક્તિગત શક્તિના મિલનનો મહોત્સવ, ગુજરાતની ગરિમા, અસ્મિતા, ઓળખાણ. નવરાત્રી દરમ્યાન શેરીઓમાં, પોળોમાં, મેદાનો, એસી ડોમમાં બાળપણથી બુઢાપો ગરબે ઘૂમવા ઊમટી પડે છે. વિશ્વ ફલક પર વિસ્તરેલી નવરાત્રી ઓહ, આહથી આહા સુધી વિસ્તરે છે.
ઓહ! એટલે આશ્ચર્ય તો ખરું જ, સાથે કેટલાક માટે અફસોસ સૂચવતો ઉદ્ગાર પણ ખરો. ઘણા માટે નવરાત્રીના દિવસો આશ્ચર્ય, કેટલાક માટે તૈયારીઓની ચિંતા, મીઠી મૂંઝવણ, ઓહ! કેટલાક માટે ચિંતા `પાસ મળશે કે નહીં?' તો કેટલાક માટે થોડા શારીરિક માનસિક તણાવ સાથે શરૂ થાય છે. જે લોકોને આધુનિક નવરાત્રી તો શું નવરાત્રી જ સમજમાં નથી આવતી, તેઓ માટે હંમેશા આશ્ચર્ય જ રહે છે. જ્યારે કેટલાક માટે મૂંઝવણ એ વાતની રહે છે કે નવ નવ દિવસ શું પહેરશું, ક્યાં રમવા જશું, કેવા ગરબા-રાસ-દાંડિયા રમશું વગેરે વગેરે મૂંઝવણો થતી રહે છે. શારીરિક માનસિક તણાવ પહેલા બીજા દિવસે અનુભવાય, જ્યારે ગરબા રમીને ઘરે આવીએ, ત્યારે આખું શરીર કળતર કરે છે. પગ જકડાઈ જાય ત્યારે મનમાંથી નીકળે છે; `ઓહ, હજી તો આઠ-નવ દિવસ બાકી છે. રાત્રે ગરબા રમતી વખતે અને ખેલૈયાઓનો થનગનાટ જોઈને જે આશ્ચર્ય થાય તે! જ્યારે કોઈ અદ્ભુત સ્ટેપ કરે કે કોઈનો ભવ્ય ટ્રેડિશનલ ડ્રેસ જોઈએ, ત્યારે મોઢામાંથી આપોઆપ નીકળી જાય `ઓહ! શું સરસ લાગી રહ્યું છે!' જેમને મન આ તહેવાર સમય-શક્તિ-ધનનો બગાડ છે તેમને મન `ઓહ! બાપ રે, નવરાત્રી આવી ગઈ!'