ઇશિદા તેની પત્ની પાસે પાછો ફર્યો તે વિચારથી સાદાને અત્યંત ઈર્ષા થઈ

કેટલીક ઘટનાઓ એવી હોય છે, જે સમયના પડદા પાછળ છુપાઈને પણ પોતાની છાપ છોડી જાય છે. આવી જ એક ઘટના છે વર્ષ 1936માં બનેલી કિચિઝો ઇશિદા હત્યા કેસ કે જેમાં સાદા આબે નામની એક મહિલાનું નામ ગુનાના ઇતિહાસમાં છપાઈ ગયું. આ કોઈ સામાન્ય હત્યા નહોતી, પરંતુ પ્રેમ, જુસ્સો, ઈર્ષ્યા અને એક અસામાન્ય અપરાધની એવી ગાથા હતી, જેણે સમગ્ર જાપાનને હચમચાવી દીધું હતું.

સાદા આબેનો જન્મ 28 મે, 1905ના રોજ થયો હતો. તે એક ગેઇશા અને વેશ્યા તરીકે કામ કરતી હતી. તેનું જીવન ઉતાર-ચઢાવથી ભરેલું હતું. વર્ષ 1934ના ઑક્ટોબરમાં પોલીસે એક ગેરકાયદેસર રેડ લાઈટ એરિયાના એક કૂટણખાના પર દરોડા પાડ્યા અને આ રેડમાં પોલીસના હાથે દેહવ્યાપારના ગુનામાં સાદા આબે ઝડપાઈ ગઈ. જોકે, સાદાનાં નસીબ એટલાં સારાં હતાં કે, તેણે વધુ સમય જેલમાં રહેવું ન પડ્યું. સાદાના એક મિત્ર, કિન્નોસુકે કાસાહારાએ તેને જેલમાંથી બહાર કાઢવાની વ્યવસ્થા કરી. કાસાહારા સાદા પ્રત્યે અત્યંત આકર્ષિત હતો અને તેણે સાદાના જેલમાંથી બહાર આવ્યા બાદ સાદા સાથે પોતાના ગેરસંબંધ સ્થાપિત કર્યા.

20 ડિસેમ્બર, 1934ના રોજ કાસાહારાએ સાદા માટે એક ઘરની વ્યવસ્થા કરી અને તેને નિયમિત આવક પણ પૂરી પાડી. આવી રીતે કાસાહારા અને સાદાનું જીવન ચાલી રહ્યું હતું. 1 ફેબ્રુઆરી, 1936ના રોજ સાદા આબે ટોક્યોના નકાનો પડોશમાં આવેલા `યોશિદાયા' નામની રેસ્ટોરાંમાં એપ્રેન્ટિસ તરીકે કામ કરવા લાગી. આ રેસ્ટોરાંના માલિક હતા 42 વર્ષીય કિચિઝો ઇશિદા. ઇશિદાએ એક ઇલ ડિશ રેસ્ટોરાંમાં એપ્રેન્ટિસ તરીકે શરૂઆત કરીને પોતાનો વ્યવસાય બનાવ્યો હતો અને વર્ષ 1920માં તેણે પોતાની રેસ્ટોરાં `યોશિદાયા' ખોલી હતી. જોકે, તેનું ચરિત્ર સહેજ પણ સારું નહોતું. તે એક સ્ત્રીલંપટ તરીકે કુખ્યાત હતો અને તે સમયે રેસ્ટોરાંનું મોટાભાગનું સંચાલન તેની પત્ની કરતી હતી. સાદાએ યોશિદાયામાં કામ શરૂ કર્યાના થોડા સમય પછી જ કિચિઝો ઇશિદા સાદા સાથે જાતીય સંબંધો સ્થાપવાના પ્રયત્નો કરવા લાગ્યો હતો.

ઇશિદા અને સાદા વચ્ચેનો સંબંધ ઝડપથી ગાઢ બનવા લાગ્યો. 23 એપ્રિલ, 1936ના રોજ તેઓ શિબુયા પડોશમાં એક ટી હાઉસમાં પૂર્વઆયોજિત જાતીય મુલાકાત માટે મળ્યાં. તેઓ માત્ર એક ટૂંકા સંબંધની યોજના બનાવી રહ્યાં હતાં, પરંતુ તેના બદલે તેઓ ચાર દિવસ સુધી પથારીમાં જ રહ્યાં. આ ચાર દિવસ દરમિયાન તેમના સંબંધોમાં એક અસામાન્ય જુસ્સો અને ગાઢતા વિકસી.

27 એપ્રિલની રાત્રે તેઓ ફુટાકો તામાગાવા નામના બીજા ટી હાઉસમાં ગયા. અહીં પણ તેઓ દારૂ પીતાં અને જાતીય સંબંધો બાંધતાં રહ્યાં. જ્યારે હોટલનો સ્ટાફ રૂમમાં ભોજન પીરસવા આવતો ત્યારે પણ તેઓ અટકતાં નહોતાં. આ પછી તેઓ ઓગુ એરિયામાં ગયાં. ઇશિદા લગભગ બે અઠવાડિયાંની ગેરહાજરી પછી 8 મેના રોજ સવારે પોતાની રેસ્ટોરાંમાં પાછો ફર્યો.

આ બે અઠવાડિયાંની મુલાકાત સમાપ્ત થયા પછી સાદા ખૂબ જ બેચેન અને અતિશય દારૂ પીવા લાગી. તેણે કહ્યું કે ઇશિદા સાથે તેને પહેલીવાર તેના જીવનમાં સાચો પ્રેમ મળ્યો હતો અને ઇશિદા તેની પત્ની પાસે પાછો ફર્યો તે વિચારથી સાદાને અત્યંત ઈર્ષા થઈ.

9 મે, 1936ના રોજ સાદાએ એક નાટક જોયું, જેમાં એક વેશ્યાએ તેના પ્રેમી પર મોટી છરી વડે હુમલો કર્યો હતો. આ નાટકથી પ્રેરિત થઈને તેણે નક્કી કર્યું કે તે તેની આગામી મુલાકાતમાં ઇશિદાને છરીથી ધમકાવશે.

11 મેના રોજ સાદાએ તેનાં કેટલાંક કપડાં ગીરવે મૂક્યાં અને તે પૈસાથી એક રસોડાની છરી ખરીદી. જ્યારે તે અને ઈશિદા મળ્યાં ત્યારે તેણે પોતાની બેગમાંથી છરી બહાર કાઢી અને નાટકમાં કર્યું હતું તેમ તેને ધમકાવ્યો. કહ્યું, `કિચી, તે તારા મનપસંદ ગ્રાહકોમાંથી એકને ખુશ કરવા માટે જ કિમોનો પહેર્યો હતો.'

ઇશિદા અને સાદા ઓગુ પાછાં એક હોટેલમાં ગયાં. આ વખતે તેમના પ્રેમસંબંધ દરમિયાન સાદાએ ઇશિદાના જાતીય અંગ પર છરી મૂકી અને કહ્યું કે તે ખાતરી કરશે કે તે ક્યારેય બીજી કોઈ સ્ત્રી સાથે રમત નહીં કરે. ઇશિદા આના પર હસ્યો. જાતીય સંબંધોના આ તબક્કાની બે રાત પછી સાદાએ ઇશિદાનું ગળું દબાવવાનું શરૂ કર્યું અને ઈશિદાએ તેને અટકાવી નહીં. વધારામાં એમ કહ્યું કે, આનાથી તેની ખુશી વધે છે. 16 મે, 1936ની સાંજે સાદા આબેએ તેના ઓબી(કિમોનોનો પટ્ટો)નો ઉપયોગ ઇશિદાના શ્વાસને ઉત્તેજના દરમિયાન રોકવા માટે કર્યો અને તેઓ બંનેએ તેનો

આનંદ લીધો.

18 મે, 1936ની વહેલી સવાર હતી. ઓગુના ટી હાઉસનો નાનો રૂમ, જ્યાં ઇશિદા અને સાદા છેલ્લા કેટલાક દિવસથી રોકાયાં હતાં. બહારની દુનિયાથી અલિપ્ત તેઓ એકબીજામાં એટલાં ખોવાઈ ગયાં હતાં કે સમય અને વાસ્તવિકતાનું ભાન ભૂલી ગયાં હતાં. તે રાત્રિ પણ તેમની અગાઉની રાત્રિઓ જેવી જ હતી, જેમાં કામોત્તેજક શ્વાસરોધની રમત ચરમસીમા પર હતી. સાદાએ ઇશિદાનું ગળું દબાવવાનું શરૂ કર્યું. ઇશિદા, જે આ રમતનો આનંદ લેતો હતો, તેણે સાદાને કહ્યું કે, `અડધેથી રોકાઈશ નહીં, નહીં તો પછી ખૂબ પીડા થશે.' આ શબ્દો સાદાના મનમાં ઊંડા ઊતરી ગયા. તેણે ગળું દબાવવાનું ચાલુ રાખ્યું. ઇશિદાનો શ્વાસ રૂંધાવા લાગ્યો, તેનું શરીર નિષ્પ્રાણ બન્યું અને થોડી જ ક્ષણોમાં કિચિઝો ઇશિદાનું જીવન સમાપ્ત થઈ ગયું. તે મૃત્યુ પામ્યો હતો.

સાદાએ અનુભવ્યું કે ઇશિદા હવે જીવંત નથી. તેના માટે આ ક્ષણ પ્રેમ અને મૃત્યુનું એક અનોખું મિશ્રણ હતું. તેણે ઇશિદાના મૃતદેહને બિયર પીવડાવવાનો પ્રયાસ કર્યો, જાણે કે તે તેને ફરી જીવંત કરી શકે, પરંતુ મૃત્યુએ તેની પકડ મજબૂત કરી લીધી હતી. પછી તેણે એક ભયાનક કૃત્ય કર્યું. તેણે પોતાની બેગમાં રહેલી છરી બહાર કાઢી અને ઇશિદાનાં જાતીય અંગો કાપી નાખ્યાં. આ એક આઘાતજનક અને અસામાન્ય કૃત્ય હતું, જેણે આ કેસને ઇતિહાસમાં ખૂંખાર બનાવી દીધો. તેણે પોતાના લોહીથી ઇશિદાના શરીર પર `કિચી સાદા-2' લખ્યું, જાણે કે તે તેમના પ્રેમ અને મૃત્યુના બંધનને કાયમ માટે અંકિત કરવા માંગતી હોય.

સાદાએ ઇશિદાનાં કપાયેલાં જનનાંગોને પોતાના કિમોનોમાં સંતાડી દીધાં. તે રૂમમાંથી બહાર નીકળી, પરંતુ જતા પહેલાં તેણે હોટલની નોકરાણીને સૂચના આપી કે તે રૂમને ખોલે નહીં. આ સૂચના પાછળ તેનો ઇરાદો સ્પષ્ટ હતો. તે ઇચ્છતી હતી કે ઇશિદાની શોધખોળ તરત જ શરૂ ન થાય, જેથી તેને પલાયન કરવાનો સમય મળી શકે.

હત્યા કર્યા પછી સાદાએ તરત જ ભાગી જવાનું વિચાર્યું. તે ટોક્યોની શેરીઓમાં ભટકવા લાગી. તેના મનમાં શું ચાલી રહ્યું હતું તે કોઈ જાણી શકતું નહોતું. તેણે પોતાના બીજા એક પ્રેમી ઓમિયા સાથે અંતિમ મુલાકાત કરી. આ મુલાકાત પછી તે એક જાહેર બગીચામાં થોડો સમય વિતાવી, જાણે કે તે પોતાના કૃત્યની ભયાનકતાને પચાવવાનો પ્રયાસ કરી રહી હોય.

આખરે તેણે આસાકુસામાં એક ધર્મશાળામાં આશ્રય લીધો. તે બે દિવસ સુધી આ ધર્મશાળામાં રહી, જાણે કે સમય થંભી ગયો હોય.

ઇશિદાના મૃતદેહની શોધખોળ શરૂ થઈ. ટી હાઉસના કર્મચારીઓને શંકા ગઈ અને રૂમ ખોલવામાં આવ્યો. જે દૃશ્ય સામે આવ્યું તે ભયાનક હતું. કિચિઝો ઇશિદાનો મૃતદેહ વિકૃત અવસ્થામાં રૂમમાં પડ્યો હતો. પોલીસને તરત જ જાણ કરવામાં આવી.

પોલીસ તપાસ શરૂ થઈ. સાદા આબે જે ઇશિદા સાથે છેલ્લે જોવા મળી હતી તે મુખ્ય શંકાસ્પદ બની. પોલીસે તેની શોધખોળ શરૂ કરી. 20 મે, 1936ના રોજ સાદા આબેની શિનાગાવા, ટોક્યોમાં ધરપકડ કરવામાં આવી. જ્યારે તેની ધરપકડ કરવામાં આવી, ત્યારે પણ તેના કિમોનોમાં ઇશિદાનાં કપાયેલાં જનનાંગો મળી આવ્યાં.

આ ધરપકડના સમાચાર વીજળી વેગે સમગ્ર જાપાનમાં ફેલાઈ ગયા. આ કેસ એક રાષ્ટ્રીય સનસનાટી બની ગયો. અખબારો અને રેડિયો પર આ ઘટનાના સમાચાર છવાઈ ગયા. લોકો આ અસામાન્ય અપરાધ વિશે જાણવા માટે ઉત્સુક હતા. સાદા આબેનું નામ દરેકની જીભ પર હતું. તેના કૃત્યની ભયાનકતા અને તેની પાછળનાં કારણો વિશે અટકળોનો દોર શરૂ થયો.

સાદા આબે પર હત્યા અને મૃતદેહને વિકૃત કરવાના આરોપો મૂકવામાં આવ્યા. તેનો મુકદ્દમો જાપાનના ઇતિહાસમાં સૌથી ચર્ચિત મુકદ્દમાઓમાંથી એક બન્યો. કોર્ટમાં સાદાએ પોતાના કૃત્યને પ્રેમ અને જુસ્સાનું પરિણામ ગણાવ્યું. તેણે દાવો કર્યો કે ઇશિદા પ્રત્યેનો તેનો પ્રેમ એટલો ગાઢ હતો કે તે તેને કોઈ બીજા સાથે વહેંચી શકતી નહોતી અને તેને કાયમ માટે પોતાનો બનાવવા માટે તેણે આ ભયાનક પગલું ભર્યું.

આખરે સાદા આબેને 6 વર્ષની કેદની સજા ફટકારવામાં આવી, જે પાછળથી ઘટાડીને 5 વર્ષ કરવામાં આવી. આ સજા ઘણા લોકો માટે આશ્ચર્યજનક હતી, કારણ કે આવા ભયાનક ગુના માટે તે પ્રમાણમાં ઓછી માનવામાં આવતી હતી.

પાંચ વર્ષની જેલની સજા ભોગવીને સાદા આબેને મુક્ત કરવામાં આવી. જેલમાંથી બહાર આવ્યા પછી પણ તે જાપાનમાં એક સેલિબ્રિટી બની રહી. તેણે પોતાની આત્મકથા લખી, જેણે ભારે લોકપ્રિયતા મેળવી. ઘણા કલાકારો, લેખકો અને ફિલ્મનિર્માતાઓએ તેની વાર્તા પરથી પ્રેરણા લીધી. નાગિસા ઓશિમાની પ્રખ્યાત ફિલ્મ `ઇન ધ રિયલમ ઓફ ધ સેન્સેસ' (In the Realm of the Senses) પણ આ જ ઘટના પર આધારિત છે. જોકે, તે એક કલાત્મક રજૂઆત છે.

સાદા આબેએ જાહેર જીવનમાં પણ ભાગ લીધો, પરંતુ 1970ના દાયકા પછી તે જાણે ગાયબ જ થઈ ગઈ. તેના મૃત્યુની ચોક્કસ તારીખ અજ્ઞાત છે, પરંતુ માનવામાં આવે છે કે તેનું અવસાન 1971 પછી થયું હતું.

કિચિઝો ઇશિદા હત્યા કેસ અને સાદા આબેની કથા જાપાનના ઇતિહાસમાં એક અનોખો અધ્યાય છે. તે માત્ર એક ગુનાની વાર્તા નથી, પરંતુ માનવ મનોવિજ્ઞાનની જટિલતા, જુસ્સાની ભયાનકતા અને સમાજ પર તેની અસરની પણ ગાથા છે. સાદા આબેનું કૃત્ય ભલે ભયાનક હોય, પરંતુ તે સમયે જાપાની સમાજમાં જાતીયતા, પ્રેમ અને સ્ત્રીઓની ભૂમિકા વિશેની ચર્ચાઓને જન્મ આપ્યો.