ઓટીટી અને સિલ્વર સ્ક્રીન એમ બંનેનો સરવાળો ભેગો કરીએ તો મે મહિનામાં હિન્દી ભાષામાં વીસ જેટલી ફિલ્મો રિલીઝ થઈ. મે મહિનામાં બોક્સઓફિસ પર રાજીપો થાય એવું કોઈએ કામ કર્યું હોય તો રિતેશ દેશમુખની રાજા શિવાજી ફિલ્મે કામ કર્યું. મૂળ મરાઠી ભાષામાં બનેલી આ ફિલ્મ સદી ફટકારવામાં સફળ રહી. સદીની સાથે દર્શકોનાં દિલ જીતવામાં સફળ રહેલી રાજા શિવાજી ફિલ્મનું ડિરેક્શન રિતેશ દેશમુખે કર્યું હતું, પરંતુ આ સિવાય આખો મહિનો દુકાળ રહ્યો એમ કહી શકાય.
મરાઠી ફિલ્મ રાજા શિવાજી સાથે મે મહિનાનું ઓપનિંગ આમિર ખાનના ગોલ્ડન સ્પૂન બોર્ન દીકરા જુનૈદ ખાન અને સાઉથ હિટ એક્ટ્રેસ સાઈ પલ્લવીની રોમેન્ટિક એક દિન ફિલ્મ આવી હતી. એક દિવસ માટે પણ આ ફિલ્મને જોવા દર્શકો ન આવ્યા અને જુનૈદ ખાનની ફ્લોપ કરિયરમાં વધુ એક સુપર ફ્લોપ ફિલ્મ લખાઈ ગઈ. લાર્જ સ્કેલ પર ગ્રાન્ડ પ્રોડક્શન ડિઝાઈન સાથે બનાવવાનો પ્રયાસ કરેલી ભગવાન કૃષ્ણની ગાથાને કૃષ્ણાવતારમ્ પાર્ટ વન ફિલ્મને બોક્સઓફિસ પર બૂસ્ટર પાવર ન મળ્યો. હાર્દિક ગજ્જરે ફિલ્મનું દિગ્દર્શન કર્યું હતું. ફિલ્મ ફેસ્ટિવલ માટે જ બનાવી હોય એ રીતે આદિત્ય કૃપલાણીએ મૈં એક્ટર નહીં હૂં ફિલ્મનું મેકિંગ કર્યું હતું. આ ફિલ્મની સ્પેશિયલ વાત એ હતી કે ફિલ્મનો હીરો નવાઝુદ્દીન સિદ્દીકી હતા. ફિલ્મ બનીને તૈયાર થયાને બેએક વર્ષ થઈ ગયાં હતાં, પણ રિલીઝનુ ટાણું આ વર્ષે મળ્યું. જોકે, બોક્સઓફિસ પર ડિઝાસ્ટર રહેલી આ ફિલ્મને ફિલ્મ ફેસ્ટિવલમાં પણ જોઈએ એવું મોકળું મેદાન નહીં મળે. કોમેડી શોથી પોપ્યુલર થયેલા કપિલ શર્માને સિલ્વર સ્ક્રીન પર સફળતા મળવાનું બંધ જ થઈ ગયું છે. કપિલની કોમેડી ફિલ્મ દાદી કી શાદી રિલીઝ થઈ, પણ આ દર્શકો સાથે કનેક્ટ થવામાં સદંતર ફ્લોપ રહી.
