એક કલાકાર તરીકે કેમેરા સામે ઉત્કૃષ્ટ અભિનય કરવો અને વાસ્તવિક જીવનમાં પોતાની ઓળખ જાળવી રાખવી, એ બંને વચ્ચે સંતુલન સાધવું કેટલું અઘરું છે તેનો તાજો પુરાવો અભિનેત્રી તાપસી પન્નુએ આપ્યો છે. લગભગ એક વર્ષ લાંબા સોશિયલ મીડિયા ડિટોક્સ એટલે કે ડિજિટલ દુનિયાથી સંપૂર્ણ અંતર જાળવી રાખ્યા બાદ તાપસીએ ફરી ઓનલાઇન પુનરાગમન કર્યું છે. પાછા ફરતાંની સાથે જ તેણે પોતાના ચાહકોને પૂછ્યું કે તેઓ કેવા પ્રકારનું કન્ટેન્ટ જોવા ઈચ્છે છે, પણ સાથે જ તેણે ગ્લેમર જગતની એક એવી કડવી વાસ્તવિકતા પરથી પડદો ઊંચક્યો જે આજે દરેક કલાકાર અનુભવી રહ્યો છે.
તાપસીએ ખુલાસો કર્યો કે સોશિયલ મીડિયા પરથી અચાનક ગાયબ થઈ જવા પાછળનું કારણ કોઈ આયોજન નહીં, પરંતુ એક ગૂંગળામણ હતી. તેને સતત એવું લાગવા માંડ્યું હતું કે તે કોઈ અજાણી રેસમાં દોડી રહી છે અથવા તો માત્ર ચર્ચામાં રહેવા માટે કોઈ ટ્રેન્ડનો હિસ્સો બનવા મથામણ કરી રહી છે. વર્ચ્યુઅલ દુનિયામાં વ્યસ્ત રહેવાને બદલે તે પોતાની સાચી જિંદગી જીવવા માંગતી હતી, જેથી તે ત્રણ-ચાર દિવસમાં માંડ એકાદ વાર ફોન ચેક કરતી. ફિલ્મ ઇન્ડસ્ટ્રીમાં વર્ષોથી એક લોજિક ચાલે છે કે કલાકારે પોતાને સોશિયલ મીડિયા પર બહુ એક્સપોઝ ન કરવો જોઈએ, નહીંતર લોકો તેમને થિયેટરમાં પૈસા ખર્ચીને જોવા કેમ આવશે? તાપસીને આ વાત યોગ્ય લાગતી હતી, કારણ કે સતત ઓનલાઇન રહેવાથી તેનો આખો દિવસ વરાળની જેમ ઊડી જતો હતો અને તે વાસ્તવિક જીવનના એ અનુભવોથી વંચિત રહી જતી હતી જે તેને એક બહેતર કલાકાર બનવામાં મદદ કરે છે.
