રક્ષાબંધન એ માત્ર એક તહેવાર નથી, પરંતુ ભાઈ-બહેનના સ્નેહ, સમર્પણ અને અતૂટ વિશ્વાસનું પ્રતીક છે. આ પવિત્ર દિવસે બહેન પોતાના ભાઈના કાંડા પર રક્ષાસૂત્ર બાંધી તેના દીર્ઘાયુષ્ય અને સુખી જીવનની મંગલકામના કરે છે, જ્યારે ભાઈ જીવનભર તેની રક્ષા કરવાનું વચન આપે છે. ભારતીય સિનેમા એટલે કે બોલિવૂડ પણ આ લાગણીશીલ સંબંધથી ક્યારેય અળગું રહ્યું નથી. દાયકાઓથી ફિલ્મનિર્માતાઓએ રૂપેરી પડદા પર ભાઈ-બહેનના પ્રેમ, ત્યાગ, નોકઝોક અને સંઘર્ષને અત્યંત સુંદરતાથી રજૂ કર્યા છે. આવો નજર કરીએ એવી કેટલીક યાદગાર ફિલ્મો પર, જેમાં ભાઈ-બહેનના આ પવિત્ર સંબંધની અનોખી ગાથા દર્શાવવામાં આવી છે
છોટી બહન - વર્ષ 1959
ભાઈ-બહેનના સંબંધ પર બનેલી ક્લાસિક ફિલ્મોમાં `છોટી બહન'નું સ્થાન અગ્રણી છે. નંદા અને બલરાજ સાહની અભિનીત આ ફિલ્મનું ગીત `ભૈયા મેરે રાખી કે બંધન કો નિભાના...' આજે પણ રક્ષાબંધનના તહેવાર પર દેશભરમાં સૌથી વધુ ગુંજતું સદાબહાર ગીત છે.
હરે રામા હરે કૃષ્ણા - વર્ષ 1971
દેવ આનંદ અને ઝિનત અમાન અભિનીત આ ક્લાસિક ફિલ્મમાં બાળપણમાં વિખૂટી પડી ગયેલી બહેનને શોધવા અને તેને ખોટા રસ્તેથી પાછી વાળી પરિવાર સાથે જોડવા માટે એક ભાઈના સંઘર્ષની કથા સુંદર રીતે રજૂ કરવામાં આવી છે.
રેશમ કી ડોરી - વર્ષ 1974
આત્મારામના નિર્દેશનમાં બનેલી અને ધર્મેન્દ્ર અભિનીત ફિલ્મ `રેશમ કી ડોરી' ભાઈ-બહેનના પવિત્ર સંબંધનું ઉત્તમ ઉદાહરણ છે. ફિલ્મમાં ભાઈ પોતાની બહેનની રક્ષા અને તેના સુખી ભવિષ્ય માટે પોતાનું સર્વસ્વ ન્યોછાવર કરી દે છે.
બંધન - વર્ષ 1998
સલમાન ખાન, જેકી શ્રોફ અને અશ્વિની ભાવે અભિનીત આ ફિલ્મ પારિવારિક લાગણીઓથી ભરપૂર છે. ફિલ્મમાં સલમાન ખાને એક એવા સમર્પિત ભાઈની ભૂમિકા ભજવી છે, જે પોતાની બહેનની ખુશી અને તેના સંસારને બચાવવા માટે પોતાના જીજાજીની દરેક કડવી વાત સહન કરે છે.
ફિઝા - વર્ષ 2000
કરિશ્મા કપૂર અને રિતિક રોશન અભિનીત આ ફિલ્મમાં રમખાણો વચ્ચે ગુમ થઈ ગયેલા ભાઈ(અમાન)ને શોધવા માટે નીકળેલી બહેન(ફિઝા)ની દર્દનાક સફર દર્શાવવામાં આવી છે. બહેનનો ભાઈ પ્રત્યેનો સ્નેહ અને તેને પાછો લાવવાની જીદ આ ફિલ્મને અત્યંત પ્રભાવશાળી બનાવે છે.
બમ બમ બોલે - વર્ષ 2010
બાળપણના નિર્દોષ પ્રેમ પર આધારિત આ ફિલ્મમાં એક ભાઈથી તેની બહેનનાં જૂતાં ખોવાઈ જાય છે. ગરીબીને કારણે માતા-પિતાને જાણ કર્યા વગર ભાઈ પોતાની નાની બહેન માટે નવાં જૂતાં લાવવા જે જહેમત ઉઠાવે છે, તે દૃશ્યો કોઈ પણ દર્શકની આંખોમાં આંસુ લાવી દે છે.
સરબજિત - વર્ષ 2016
આ ફિલ્મ ભારતીય ખેડૂત સરબજિત સિંહના વાસ્તવિક જીવન પર આધારિત બાયોગ્રાફિકલ ડ્રામા છે. ઐશ્વર્યા રાય બચ્ચન (દલબીર કૌર) અને રણદીપ હૂડા (સરબજિત) અભિનીત આ ફિલ્મ એક એવી બહેનની હૃદયસ્પર્શી કહાની છે, જે પાકિસ્તાનની જેલમાં બંધ પોતાના નિર્દોષ ભાઈને મુક્ત કરાવવા બે દાયકાથી વધુ સમય સુધી એકલા હાથે અથાક સંઘર્ષ કરે છે.
રક્ષાબંધન- વર્ષ 2022
અક્ષય અને ભૂમિ અભિનીત ફિલ્મ `રક્ષાબંધન' એક મધ્યમવર્ગીય ભાઈની ચિંતાઓ અને જવાબદારીઓ પર આધારિત છે. ફિલ્મમાં ચાર બહેનોનાં લગ્ન અને ખુશીઓ માટે સંઘર્ષ કરતા ભાઈની વાત છે. ફિલ્મનું ગીત `મૈં રહૂં ના તેરે બિના' ભાઈ-બહેનના પ્રેમની સાચી પરિભાષા સમજાવે છે.
જિગરા - વર્ષ 2024
વર્ષ 2024માં રિલીઝ થયેલી ફિલ્મ `જિગરા' સંપૂર્ણપણે ભાઈ-બહેનના સંબંધને સમર્પિત છે. આલિયા અને વેદાંગ અભિનીત આ ફિલ્મમાં એક એવી બહેનની હિંમત અને સંઘર્ષની વાત છે, જે વિદેશમાં મુશ્કેલીમાં ફસાયેલા પોતાના નિર્દોષ ભાઈને બચાવવા માટે આખી દુનિયા સામે લડી લે છે. આજના આધુનિક યુગમાં પણ ભાઈ-બહેન વચ્ચેના અડગ સમર્પણનું આ શ્રેષ્ઠ ઉદાહરણ છે.
આવી જ પોસ્ટ વાંચવા માટે ક્લિક કરો
