ખોટું લગાડનારા ખેરખાંઓ

કવિ જગદીશ જોષીની ખૂબ જાણીતી કાવ્યપંક્તિઓ છે. `વાતે વાતે તને વાંકું પડ્યું ને મેં વાતોની કુંજગલી છોડી દીધી. મિત્રોસ, વાંકું પાડવું, ખોટું લગાડવું, રિસાઈ જવું એ માણસનો સ્વભાવ છે.

એવું કહેવાય છે કે, ખોટું લગાડવામાં સ્ત્રીઓની, મહિલાઓની માસ્ટરી હોય છે, પણ મારા વાલીડા'વ, એવું માત્ર કહેવાય છે હોં. ખોટું લગાડવામાં પુરુષો પણ પાવરધા હોય છે. ભઈલાઓ પણ ભૂરાંટા થઈ ભારેખમ ચહેરો બનાવી બેસી જતા હોય છે. આપણી આજુબાજુ એવા અનેક વાયડા ભાયડાઓ વસતા હોય છે, જે વાંકું પાડવામાં નિષ્ણાત હોય છે.'

આવા ખોટું લગાડનારા શૂરવીરોની ખાસિયત એ હોય છે કે એમને ક્યારે, કોનાથી, કેમ ખોટું લાગ્યું છે એની માત્ર એમને જ ખબર હોય છે. સામેવાળી પાર્ટી તો એકદમ `અંજાન' હોય છે. એમને તો ખબર જ નથી હોતી કે પેલો `પોપટ' રિસાયો છે, એને કચ્ચીને ખોટું લાગ્યું છે. રિસાયેલો `રોબોટ' અચાનક જ એને જેનાથી ખોટું લાગ્યું હોય એની સાથે વાત કરવાનું બંધ કરી દે, એની સામે જોવાનું બંધ કરી દે, એની સાથે હળવા-મળવાનું બંધ કરી દે અને પેલાને એની `લગીરે' ખબર જ નથી હોતી. એ ખોટું લગાડનારને એના આવા વર્તનનું કારણ પૂછે તો રિસાયેલો જવાબ આપ્યા વગર વાયવ્ય દિશામાં જોઈ ચાલવા માંડે છે.

આવા ખોટું લગાડનારા ખેરખાંઓ પાસે ખોટું લગાડવા માટે ખાસ કારણો પણ નથી હોતાં. સાવ સામાન્ય, ફાલતુ, તદ્દન બોગસ, બકવાસ વાતમાં એમને ખોટું લાગી જતું હોય છે. ખોટું લગાડવા માટે એ જાતે પોતે જ કારણો શોધી નાંખતા હોય છે અને પછી ખોટું લગાડી દેતા હોય છે. ઉદાહરણ તરીકે, `હું આવ્યો ત્યારે એણે મને કેમ છો પણ ન કહ્યું, હેલો પણ ન કહ્યું અને મારી સામે સ્માઈલ ન આપ્યું.', `એ ખુરશીમાં બેઠો'તો ને હું ગયો તો એણે ઊભા થઈ મને ખુરશીમાં બેસવાનું પણ ન કહ્યું.' એના બાપા બીમાર હતા તો એણે મને જાણ સુધ્ધાં નહોતી કરી.' `એના ભત્રીજાની બાબરી ઉતરાવી ત્યારે એણે મને કહ્યું જ નહોતું, બોલો.' આવાં બધાં ભેદી-ગેબી કારણોસર લોકોને જોરદાર `ખોટા' લાગી જતા હોય છે અને પછી એ સામેવાળી વ્યક્તિઓ સાથે સંબંધો કાપી નાખતા હોય છે.

અત્યારના સોશિયલ મીડિયાના જમાનામાં લોકોને `ડિજિટલી ખોટું' લાગી જતું હોય છે. જેમ કે, `એણે મારા ફોટાને લાઈક જ ન કર્યું.' `એણે મારી પોસ્ટ જોઈ, વાંચી તો પણ જવાબ ન આપ્યો.' `એ ઓનલાઈન દેખાય છે તો પણ મને મસેજે નથી કરતો.' `મારી પોસ્ટ પર એની ડબલ ટિક અને બ્લૂ ટિક દેખાય છે તો પણ એ મને રિસપોન્ડ નથી કરતો.' `એ કાયમ મારા ફોટા જોઈ લે છે, પણ પોતાના ફોટા તો અપલોડ કરતો જ નથી.' `એ મારા મિસ કોલનો જવાબ જ નથી આપતો.'

આપણે ત્યાં ઓફિસોમાં પણ આવા ખોટું લગાડનારા કલીગ્સ ટેબલ પર બિરાજમાન હોય છે. જેમને ડેઈલી ઓફિસ અવર્સ દરમિયાન કચ્ચી-કચ્ચીને ખોટું લાગી જતું હોય છે. `આજે હું નવું શર્ટ પહેરીને ગયો તો કોઈએ મારાં વખાણ જ ન કર્યાં.'

`આજે બોસે મને વેરીગૂડ કહ્યું તો કોઈએ મને `વેલડન' કહ્યું જ નહીં.' `પ્યૂને બધાયને ગરમ ચા આપી અને મને ઠંડી ચા આપી.' બધાયના ટેબલ પરના પંખા ફાસમફાસ ફરે છે અને મારા ટેબલ પરનો પંખો સાવ ધીમો ફરે છે. આવાં બધાં કારણોને લઈને કારકુન `રિસાયેલી વહુ'ની જેમ ધૂંધવાઈને બેસી રહે છે.

આવા ખોટું લગાડનારા ખેરખાઓ જાતે જાતે જ રિસાતા હોય છે, જાતે જ અબોલા લઈ લેતા હોય છે અને જાતે જ સંબંધો કાપી નાંખતા હોય છે. એમને જેનાથી ખોટું લાગ્યું હોય એને જાણ સુધ્ધાં પણ નથી હોતી એટલે એ નોર્મલ હોય છે, પણ ખિજાયેલો ખડ્ડુસ ખુન્નસામાં ફર્યા કરે છે. આવા ખોટેખોટા ખોટું લગાડનારાઓનો એક જ ઉપાય છે. એમને ટોટલી ઈગ્નોર કરવાના. એટલે એ થોડા સમય પછી આપમેળે `લાઈન પર' આવી વાત કરવા માંડશે. શું કહેવું છે તમારું? આવા ખોટું લગાડનાર ખેરખાંઓ તમારી આજુબાજુ ભમે છે?