ભારતીય ક્રિકેટના ઇતિહાસનાં પાનાંઓમાં જ્યારે પણ 1983ના ઐતિહાસિક વર્લ્ડકપ વિજયની ગાથા લખાય છે, ત્યારે મદનલાલનું નામ ગૌરવ સાથે લેવામાં આવે છે. તેઓ માત્ર એક રમતવીર નહોતા, પરંતુ મેદાન પર પોતાના પ્રબળ આત્મવિશ્વાસ, જુસ્સા અને લડાયક મિજાજ માટે ઓળખાતા હતા.
20 માર્ચ, 1951ના રોજ પંજાબના અમૃતસરમાં જન્મેલા મદનલાલ ઉધરામ શર્માએ ભારતીય ક્રિકેટને ખેલાડી અને કોચ તરીકે અદ્ભુત સેવાઓ આપી છે. મદનલાલને નાનપણથી જ રમત પ્રત્યે ઊંડો લગાવ હતો. તેમણે પ્રથમ શ્રેણી ક્રિકેટમાં પંજાબ અને ત્યારબાદ દિલ્હીની ટીમનું પ્રતિનિધિત્વ કર્યું. તેમણે 1974માં ઇંગ્લેન્ડ પ્રવાસ દરમિયાન ભારતીય રાષ્ટ્રીય ટીમ માટે ટેસ્ટ અને વન-ડે મેચમાં એકસાથે ડેબ્યૂ કર્યું હતું. એ દાયકામાં જ્યારે ભારતીય બોલિંગ આક્રમણ મુખ્યત્વે સ્પિનરો પર નિર્ભર હતું, ત્યારે મદનલાલે કરસન ઘાવરી અને કપિલ દેવ સાથે મળીને ભારતીય ફાસ્ટ બોલિંગ વિભાગની કમાન સંભાળી હતી.
તેમણે આંતરરાષ્ટ્રીય કારકિર્દીમાં ભારત માટે 39 ટેસ્ટ મેચોમાં 71 વિકેટ ઝડપી અને 1,042 રન બનાવ્યા હતા. જ્યારે 67 વન-ડે મેચોમાં 73 વિકેટ મેળવી અને 629 રન યોગદાનમાં આપ્યા હતા. ઘરેલુ ક્રિકેટમાં તેમનો રેકોર્ડ અદ્ભુત રહ્યો છે. 197 પ્રથમ શ્રેણી મેચોમાં તેમણે 42.84ની સરેરાશથી 10,208 રન બનાવ્યા હતા અને 625 વિકેટો ઝડપી હતી. આ આંકડાઓ તેમની બહુમુખી ઓલરાઉન્ડ ક્ષમતા સાબિત કરે છે.
મદનલાલની ક્રિકેટ સફરનું સર્વોચ્ચ શિખર 1983નો લોર્ડ્સનો વર્લ્ડકપ ફાઇનલ હતો. આંકડાઓથી પર જઈને તેમણે જે લડાયક વૃત્તિ બતાવી, તેણે ભારતને વિશ્વવિજેતા બનાવવામાં મુખ્ય ભૂમિકા ભજવી હતી. મદનલાલે ફાઇનલમાં 12 ઓવરમાં 31 રન આપીને વિવિયન રિચર્ડ્સ, ડેસમંડ હેન્સ અને રિચી રિચર્ડ્સનની અતિ મહત્ત્વપૂર્ણ વિકેટો ઝડપી હતી. 1983ના વર્લ્ડકપમાં 8 મેચમાં 17 વિકેટો સાથે તેઓ ભારત તરફથી બીજા સૌથી વધુ વિકેટ લેનાર બોલર રહ્યા હતા.
ક્રિકેટમાંથી નિવૃત્તિ લીધા પછી પણ મદનલાલે ભારતીય ક્રિકેટ સાથેનો પોતાનો નાતો તોડ્યો નહીં. તેઓ સપ્ટેમ્બર 1996થી સપ્ટેમ્બર 1997 દરમિયાન ભારતીય ક્રિકેટ ટીમના મુખ્ય કોચ રહ્યા હતા. તેમના કાર્યકાળ દરમિયાન ભારતે દક્ષિણ આફ્રિકા સામે હોમ સીરિઝ જીતી હતી. 2000થી 2001 દરમિયાન તેમણે રાષ્ટ્રીય પસંદગીકાર તરીકે સેવા આપી અને ભારતીય ટીમ માટે નવી ટેલેન્ટની પસંદગી કરી. તેમણે ઇન્ડિયન પ્રીમિયર લીગ(IPL)માં દિલ્હી ડેરડેવિલ્સ ટીમના મુખ્ય કોચ તરીકે પણ કામ કર્યું છે. આજે પણ તેઓ ટીવી ચેનલો પર ક્રિકેટ એનાલિસ્ટ તરીકે પોતાના સ્પષ્ટ અને નિષ્પક્ષ વિચારો રજૂ કરે છે.
મદનલાલ એવા ખેલાડીનું ઉત્કૃષ્ટ ઉદાહરણ છે, જે ટેલેન્ટ કરતાં પણ વધુ પોતાના જુસ્સા અને સમર્પણથી રમે છે. `ક્યારેય શરણાગતિ ન સ્વીકારવી'નો તેમનો દૃષ્ટિકોણ આજે પણ દેશના કરોડો યુવા ક્રિકેટરો માટે પ્રેરણાસ્રોત છે. ભારતીય ક્રિકેટના ઈતિહાસમાં તેમનું નામ હંમેશાં એક અણનમ અને સાચા યોદ્ધા તરીકે અમર રહેશે.
આવી જ પોસ્ટ વાંચવા માટે ક્લિક કરો
