પૈસા હાથનો મેલ છે તો પણ માણસ રાત-દિવસ તેની પાછળ કેમ દોડે છે?
(અમૃત સોલંકી - ટાઢાની વાડી બોટાદ)
લોકોને મેલા રહેવું ગમે છે.
ખારી (બિસ્કિટ) ખારા નથી હોતા છતાં તેને ખારી કેમ કહે છે?
(રોહિત દરજી `કર્મ' - હિંમતનગર)
તપેલી તપેલી ન હોય ત્યારે પણ એને તપેલી કહે છે એટલે.
ધીરજનાં ફળ મીઠાં જ કેમ હોય છે?
(ગૃહિત શિંગાળા - રાજકોટ)
કેમ કે એ સારી ક્વોલિટીનાં ફ્રૂટ રાખે છે.
દુનિયાની સૌથી કીમતી વસ્તુ કઈ છે?
(રમેશસિંહ એલ. રાઠોડ - મજરા, પ્રાંતિજ)
ઊંઘ.
દાંતવાળાં કૂતરાં કરડે તો ઈન્જેક્શન લેવાં પડે, તો દાંત વગરનાં બોખાં કૂતરાં કરડે તો શું કરવું?
(ચિરાગકુમાર કનૈયાલાલ પંચાલ - મધવાસ, લુણાવાડા)
કૂતરાને ચોકઠું કરાવી આપવું.
લોકો દારૂ પીને દવાખાને શું કરવા જતા હશે? (સોમાતભાઈ ગોવિંદભાઈ નંદાણિયા - લોએજ, માંગરોળ)
દવા-દારૂ કરાવવા.
લગ્ન બાદ પતિ કરતાં પત્ની કેમ વધારે ઉડાઉ બની જાય છે?
(હંસાબહેન ઘનશ્યામ ભરુચા -
વિરાર, મુંબઇ)
એના બાપના રૂપિયા ક્યાં વપરાતા હોય છે?
કોક્રોચનો અર્થ શું થાય?
(ઝાલા રણજિત - ગૌચરના
મુવાડા, કપડવંજ)
વંદા જે હોય ગંદા.
મોંઘવારી અને ભ્રષ્ટાચાર ક્યાં સુધી રહેશે?
(જિતેન્દ્ર એમ. ટાંક `કવિ જિમ', ડિસા)
જબ તક સૂરજ ચાંદ રહેગા.
`ફૂલ તુમહેં ભેજા હૈ ખત મેં, ફૂલ નહીં મેરા દિલ હૈ' આમાં ફૂલની કિંમત શું સમજવી?
(મુકેશ ટી. ચંદારાણા - મીઠાપુર)
ભેજા જેટલી.
રાશિ સારી પણ ભવિષ્ય ધૂંધળું. એવું કેમ? (જય કનૈયાલાલ ભાવસાર - ચાણક્યપુરી, અમદાવાદ)
લખણ ખોટાં હોય એટલે.
ઊંઘની ગોળી બની શકે છે, પણ સવારે વહેલા ઊઠવાની ગોળી કેમ નથી બનતી?
(અબ્બાસઅલી ગિનિવાલા - વડોદરા)
પેટ સાફ કરવાનીનો ડબલ ડોઝ લઈ લેવો, ઊઠીને દોડવું પડશે.
જમણવારમાં પેટ પટારો કેમ બની જાય છે? (કનૈયાલાલ હરીભાઈ ભાવસાર - ભાવસાર ઓળ, વડનગર)
મફતનું ભોજન સૌને ગમે.
પત્નીને ઘરકામમાં મદદ કરવા કયું કામ કરાવવું જોઈએ?
(મહાસુખ દરજી - ઈશનપુર, અમદાવાદ)
એને નડવું ન જોઈએ.
આવી ગરમીમાં કોઈ તમારી પર પાણી નાખે તો તમે ગુસ્સે થાવ કે ખુશ થાવ?
(શિવમ યાજ્ઞિક - યુનિવર્સિટી રોડ, રાજકોટ)
પાણીના તાપમાન પર જવાબનો આધાર છે.
સ્મશાનમાં રહેવું જોખમી છે કે સંસારમાં? (ચંપકસિંહ રાજ - આજવા રોડ, વડોદરા)
સ્મશાનમાં બબાલ થવાના ચાન્સીસ નહીંવત્ હોય છે.
કોયલ કેમ કાગડીના માળામાં પોતાનાં ઈંડાં મૂકી આવે છે?
(યોગેશભાઈ આર. જોશી - હાલોલ)
કેમ કે કાગડી સારી બેબીસિટર છે.
કાનથી સાંભળેલું સાચું કે આંખથી જોયેલું સાચું?
(મૌલિક ઠક્કર - જામનગર)
પત્ની કહે એ સાચું.
ભૂતપ્રેત, જીન ક્યાં જોવા મળે?
(વિવેક મનીષ આચાર્ય - રાજકોટ)
આપણી આજુબાજુ.
આંખ આડા કાન કરવા એટલે શું?
(જિતેન્દ્ર શાહ - હિંમતનગર)
કોઈ જોતું હોય ત્યારે એની આંખો સામે મોઢું આડું કરી આંખ સામે કાન ધરવા.
ભાઈબંધ કેવા હોવા જોઈએ કૃષ્ણ સુદામા જેવા કે જય વીરુ જેવા?
(અમરીશ મેહતા - ગુરુકુલ, અમદાવાદ)
ખપારા કોડિયા જેવા.
જેને મગજ ન હોય એને બ્રેઇન હેમરેજ થાય? (કુશલ શાહ - ગોરવા, વડોદરા)
એને ખોપરીમાં ખાલી ચડી જાય.
ધામધૂમથી લગ્ન કરવાં સારાં કે કોર્ટ મેરેજ કરવા સારા?
(શૈલેષ ચાવડા - વિરમગામ)
આર્થિક પરિસ્થિતિ મુજબ જોખમ લેવું.
લોકો હંમેશાં પારકી પંચાત કેમ કરે છે? (માલવિકા જયેશકુમાર સ્વાદિયા - ભૂજ)
પોતાની કરવા જાય તો ઘરમાં છૂટા હાથની મારામારી થાય.
લગ્ન વખતે હસ્તમેળાપ કરવામાં આવે તો છૂટાછેડા વખતે? (ઘનશ્યામ એચ. ભરુચા - વિરાર, મુંબઈ)
પંજા લડાવવાના.
આવી જ પોસ્ટ વાંચવા માટે ક્લિક કરો
