સૂર્યની કર્ક સંક્રાંતિનો સમય તમને કેવું ફળ આપશે?

• આ સમયમાં કુદરત પણ વર્ષાના રૂપે પહાડી વિસ્તારોમાં વધુ કેર વરસાવે અને ભૂસ્ખલન તથા વાદળ ફાટવાની ઘટનાઓ વિશેષ બનતી જોવા મળે. પૂર જેવી સ્થિતિ પણ જોવા મળે
  
  
  

ગ્રહોના રાજા સૂર્ય મહારાજ 17 જુલાઈના રોજ એક માસ માટે કર્ક રાશિમાં પ્રવેશ કરશે જેને કર્ક સંક્રાંતિ કહેવામાં આવે છે. કર્ક સંક્રાંતિ જળતત્ત્વ દર્શાવે છે વળી સૂર્ય ચંદ્રના ઘરમાં જાય છે જ્યાં સૂર્ય-બુધનો બુધાદિત્ય યોગ થશે. મંગળના સિંહમાં આવવા સાથે તે વક્રી શનિની સાતમી દૃષ્ટિમાં અને રાહુથી પાંચમે આવે છે. સૂર્યના ઘરમાં મંગળ રાજકીય ઘટનાક્રમને અચાનક અલગ દિશામાં લઇ જનાર બને છે અને સત્તાનું અચાનક હસ્તાંતરણ થતું જોવા મળશે. આ સમયમાં કુદરત પણ વર્ષાના રૂપે પહાડી વિસ્તારોમાં વધુ કેર વરસાવે અને ભૂસ્ખલન તથા વાદળ ફાટવાની ઘટનાઓ વિશેષ બનતી જોવા મળે. પૂર જેવી સ્થિતિ પણ જોવા મળે જેથી ડેમ વગેરે પર વિશેષ કાળજી રાખવી પડે. મોટા રાજકીય પક્ષોમાં પણ મોટા વિખવાદ જોવા મળે અને સંગઠનથી લઈને સત્તામાં અનેક ઉલટફેર જોવા મળે. વળી, વિશ્વસ્તરે પણ રાજનીતિના નવા આયામ જોવા મળે અને અનેક દેશની રાજનીતિમાં વિદેશનીતિ બદલાતી જોવા મળે. આ સમયમાં સેના બાબતે પણ મહત્ત્વના નિર્ણયો જોવા મળે અને અનેક દેશમાં સેના હાવી થતી જોવા મળે. કેટલાક દેશને આંતરવિગ્રહ સામે ઝઝૂમવું પડે. ગોચર ગ્રહોની રાશિ મુજબ અસર જોઈએ તો :

મેષ (અ.લ.ઈ) : નાનીનાની ખુશી પ્રાપ્ત કરી શકો. પરિવાર સાથે આનંદ માણી શકો. મુસાફરી થાય. પ્રોપર્ટી અંગે યોગ્ય નિર્ણય લઇ શકો. જમીન, મકાન, વાહનસુખ સારું રહે. માતાની સેવા કરવાથી એમને સરપ્રાઈઝ ગિફ્ટ આપવાથી વધુ પ્રગતિ કરી શકશો.

વૃષભ (બ. વ. ઉ) : તમારા વિચારોને અમલમાં મૂકી શકો. ભાઈભાંડુંનું સુખ સારું રહે, રચનાત્મક પ્રવૃત્તિ કરી શકો. નવા કાર્યમાં આગળ વધી શકો. સાહસથી સિદ્ધિ પ્રાપ્ત થાય, આગળ વધવાની તક મળે. તમારા કૌશલ્યથી કાર્યસિદ્ધિ થાય.

મિથુન (ક. છ. ઘ) : કાર્યમાં એક નવી શરૂઆત થતી લાગે, તમારાં સૌમ્ય વાણી-વર્તનથી અટકેલાં કાર્ય પૂર્ણ કરી શકો. ભાગીદારીમાં કાળજી રાખવી પડે, આર્થિક બાબતોમાં મધ્યમ રહે, અન્ય બાબતો મહેનતથી સારું પરિણામ લાવી શકો.

કર્ક (ડ.હ) : સત્તાનાં સૂત્રો હાથમાં આવે, તમારા ખુદ માટે સમય કાઢી શકો, તમારા વ્યક્તિત્વનો વિકાસ થાય. યશ-પ્રતિષ્ઠા પ્રાપ્ત થાય. ઘણા વણઉકેલ્યા પ્રશ્નોના જવાબ મેળવી શકશો. તમામ મોરચે તમે સારી રીતે આગળ વધી શકો.

સિંહ (મ. ટ) : કેટલાક એવા બનાવ બને કે તમને માનસિક વ્યગ્રતા અને ઉશ્કેરાટ રહે, કોઈ બાબતને અહમનો પ્રશ્ન ન બનાવવો, વાદ-વિવાદથી દૂર રહેવું, મતભેદ નિવારવા સલાહ છે, લાગણીના સંબંધોમાં પણ અનબન જોવા મળે.

કન્યા (પ. ઠ. ણ) : ગણતરી વિનાનાં સાહસ ન કરવાં સલાહ છે. આવક કરતાં જાવક વધી ન જાય તે જોવું, નાણાકીય વ્યવહારનો હિસાબ રાખવો. અંગત લોકો અને સગાં સ્નેહીમિત્રોથી સારું રહે, આગળ વધવાની તક પ્રાપ્ત થાય.

તુલા(ર.ત): અગાઉના સમયમાં તમે કરેલા કાર્યનાં સારાં પરિણામ આજે મેળવી શકો, કર્મના સિદ્ધાંતને સમજી શકો, સ્ત્રીવર્ગ પોતાની પ્રતિભા બતાવી શકે, વેપારીવર્ગને મધ્યમ રહે, નોકરિયાત વર્ગની પ્રગતિ થાય. વિદ્યાર્થીવર્ગને શુભ રહે.

વૃશ્ચિક (ન. ય) : યોગ્ય સમય પર યોગ્ય નિર્ણય લઈ શકો. આ સમયમાં ભાગ્યની દેવી રીઝતી જણાય, નવીન તક હાથમાં આવે. ઈષ્ટદેવની આરાધનાથી લાભ થાય, ધ્યાન, યોગ, મૌનથી લાભ થાય, આધ્યાત્મિક ચિંતન થાય.

ધન (ધ. ભ. ફ. ઢ) : આ સમયમાં હકારાત્મક વિચારોની વધુ જરૂર રહેશે, જે બાબત વિચારી હોય તે બનતી જોવા મળે. દૂર દેશથી સારા સમાચાર મળે, અંગત મિત્રો સાથે મતભેદ દૂર કરી શકો. જૂના મિત્રોને મળવાનું થાય.

મકર (ખ. જ) : જાહેરજીવનમાં ધ્યાન આપી શકો, આંતરિક સંબંધોમાં સારું રહે, મનની વાત વ્યક્ત કરી શકો. કૌટુંબિક અને સામાજિક રીતે આગળ વધી શકો, તમે કરેલા કાર્યનાં સારાં પરિણામ મેળવી શકો, યશ, પ્રતિષ્ઠા પ્રાપ્ત થાય.

કુંભ (ગ. સ. શ) : હિતશત્રુઓથી સાવધ રહેવું, વધુ પડતા વિશ્વાસે ન ચાલવું, વ્યક્તિગત દેખરેખથી કામ કરવું. ખાવાપીવામાં પરેજી રાખવી જરૂરી બને છે, તબિયતની કાળજી લેવી, વધુ પડતી દોડધામ નિવારવા સલાહ છે.

મીન (દ. ચ. ઝ. થ) : વિદ્યાર્થીવર્ગને એકાગ્રતા રહે, સંતાન અંગે સારું રહે, વિદેશ જવા ઇચ્છતા મિત્રોને સારું રહે,પરિવાર સાથે આનંદ માણી શકો, પ્રણયમાર્ગે આગળ વધી શકો, ગમતી વ્યક્તિ સાથે વાતચીત થાય, મનની વાત વ્યક્ત કરી શકો.