- ઓફ સ્ટમ્પના કોરિડોરની લાઇનલેન્થ બંને પેસ બોલરને વધારે ઘાતક બનાવે છે
વિશ્વ ક્રિકેટમાં છેલ્લા કેટલાક વર્ષોથી વિરાટ કોહલી, સ્ટિવ સ્મિથ, જોઇ રુટ અને કેન વિલિયમ્સનમાંથી બેસ્ટ કોણ તેવી ચર્ચા ચાલતી રહેતી હતી જેમાં પ્રત્યેકનો અભિપ્રાય અલગ અલગ રહેતો હતો. હવે ટ્રેન્ડ ચેન્જ થયો છે અને ભારત તથા ઇંગ્લેન્ડ વચ્ચે રમાતી પાંચ મેચની ટેસ્ટ શ્રોણીમાં બે પેસ બોલર જસપ્રીત બુમરાહ અને જેમ્સ એન્ડરસનમાંથી સર્વશ્રોષ્ઠ કોણ તેની ડિબેટ ચાલી રહી છે. આ ચર્ચાનો જવાબ આપવો મુશ્કેલ છે પરંતુ ભારત જેવા દેશમાં જ્યાં સ્પિનર્સનો દબદબો રહેતો હોય છે ત્યાં આ બંને બોલર્સે પોતાના ઘાતક યોર્કર અથવા આઉટ સ્વિંગર દ્વારા બેટ્સમેનોને પરસેવો લાવી દીધો છે. શ્રોણીની બે ટેસ્ટ મેચની સમીક્ષા કરીએ તો બુમરાહ અને એન્ડરસને કેટલાક અદ્ભુત સ્પેલ નાખ્યા છે જેના કારણે મેચો વધારે રસપ્રદ બની ગઈ હતી. બંને બોલર્સ પાસે ઘણો અનુભવ છે અને બંનેની બોલિંગની તાકાત ઓફ સ્ટમ્પની નજીકનો કોરિડોર છે જેની ઉપર તેઓ સતત એક જ લાઇનલેન્થથી લાંબા સ્પેલ નાખવાની ક્ષમતા ધરાવે છે. આ કારણથી બંને વિશ્વના અન્ય પેસ બોલર કરતાં અલગ પણ પડી રહ્યા છે. બંને બોલને ધારે ત્યારે ઇન સ્વિંગ કે આઉટ સ્વિંગર તરીકે નાખી શકે છે. ઓવરના તમામ છ બોલ તેમના વિવિધતાથી ભરેલા હોય છે અને બેટ્સમેન સતત વિચારતો રહે છે. આ સ્થિતિમાં બેટ્સમેનો ઓફ સ્ટમ્પની બહાર જતા બોલને છેડછાડ કરવાની ભૂલ કરીને વિકેટ આપી દેતા હોય છે.
વિશાખાપટ્ટનમ ખાતેની બીજી ટેસ્ટમાં એન્ડરસને ઓફ સ્ટમ્પના કોરિડોરમાં સૌથી વધારે ગુડલેન્થ બોલ નાખ્યા હતા અને તેણે 20 રન જ આપ્યા હતા. તેણે સ્ટમ્પની નજીક 31 લેન્થ બોલ નાખ્યા હતા જેમાં તેણે માત્ર ત્રણ રન આપ્યા હતા અને એક બેટ્સમેનને પેવેલિયન પરત મોકલી પણ આપ્યો હતો. ઇંગ્લેન્ડના સૌથી અનુભવી પેસ બોલર તથા સ્ટુઅર્ટ બ્રોડ સાથે પેસ બોલર તરીકે સંયુક્ત રીતે હાઇએસ્ટ વિકેટ ઝડપનાર એન્ડરસને મેચમાં માત્ર એક જ યોર્કર નાખ્યો હતો. બીજી તરફ બુમરાહે ઓફ સ્ટમ્પની નજીક ગુડ લેન્થ ઉપર વધારે નાખ્યા હતા પરંતુ તે અચાનક યોર્કર નાખીને બેટ્સમેનને સ્તબ્ધ કરી દેતો હતો. બુમરાહની બીજી પસંદગીનો બોલ લેન્થ બોલ છે અને તેણે બે વિકેટ ઝડપી હતી. યોર્કર બુમરાહનું સૌથી મોટું ઘાતક હથિયાર છે. બીજી ટેસ્ટમાં તેણે છ યોર્કર નાખ્યા હતા અને એક ઇંગ્લિશ બેટ્સમેનનો શિકાર કર્યો હતો.
