તંગદિલી : દિલ્હી- લાહોરની બસ બે મુસાફર સાથે દોડી - Sandesh
  • Home
  • India
  • તંગદિલી : દિલ્હી- લાહોરની બસ બે મુસાફર સાથે દોડી

તંગદિલી : દિલ્હી- લાહોરની બસ બે મુસાફર સાથે દોડી

 | 5:17 am IST

નવી દિલ્હી

ભારતનાં વહીવટીતંત્ર દ્વારા શાસિત કાશ્મીરના ઉરી સીમાડે લશ્કરી છાવણી પર ત્રાસવાદી હુમલો થયા પછી દિલ્હી-લાહોર વચ્ચે દોડી રહેલી બસ લગભગ ખાલી દોડી રહી છે.  મંગળવારે સાંજે સાડા પાંચ વાગે લાહોરથી દિલ્હી, દિલ્હીનાં ડોક્ટર આંબેડકર બસમથકે પહોંચેલી બસમાં માત્ર એક દંપતી સફર કરીને પહોંચ્યું હતું. સ્થાનિક અધિકારીએ જણાવ્યા મુજબ મંગળવાર સવારે લાહોર તરફ ગયેલી બસ પણ ખાલી હતી.   બસમાં લાહોરથી દિલ્હી પહોંચેલા મહમદ આબિદ અને તેમનાં પત્નીએ બીબીસી હિન્દીને જણાવ્યું કે, ‘દિલ્હીની બસ ટિકિટ ખરીદ કર્યા પછી આંચકો લાગ્યો, કારણ કે બસમાં અમારા બે સિવાય બીજું કોઈ હતું જ નહીં.’   તેમણે કહ્યું કે, ‘ગઈ વખતે આવ્યા ત્યારે પૂરી બસ ભરેલી હતી પરંતુ આ વખતે બસ ખાલી હતી.’   પરંતુ ૧૨ કલાકની બસસફર વિશે તેઓ કહે છે કે, ‘અમે ખૂબ આરામથી દિલ્હી પહોંચ્યા છીએ, આ સેવાને ચાલુ રાખવી જોઇએ.’

અટલબિહારી વાજપેયી વડાપ્રધાન હતા ત્યારે દિલ્હી-લાહોર બસસેવા ૧૯૯૯માં શરૂ થઈ હતી, પરંતુ ૨૦૦૧માં ભારતીય સંસદ પર ત્રાસવાદી હુમલો થયા પછી કેટલાક સમય સુધી બસસેવાને રોકી દેવામાં આવી હતી.

૧૯૯૯માં શરૂ થઈ હતી સેવા

  • દિલ્હી ટ્રાન્સપોર્ટ કોર્પોરેશનના ચીફ જનરલ મેનેજર એ. કે. ગોયલે બીબીસીને કહ્યું કે ક્યારેક નફો રળી આપનારી આ બસસેવા એક વર્ષથી નુકસાનમાં ચાલી રહી છે.
  • એ. કે. ગોયલે કહ્યું કે, ‘વર્ષ ૨૦૧૪માં વાઘામાં થયેલા હુમલા પછી આ બસ હવે લાહોર સુધી પણ નથી જતી. પાકિસ્તાનના વાઘા વિસ્તાર સુધી બસ જાય છે. દિલ્હીથી તો ઠીક ઠીક સંખ્યામાં લોકો લાહોર જાય છે પરંતુ ત્યાંથી તો ચાર, પાંચ લોકો જ ભારત આવે છે. તેને કારણે બસસેવા નફામાં નથી ચાલી રહી.’
  • બસની સુરક્ષાને જોતાં બસ આવ્યાના ત્રણ કલાક પહેલાં જ ર્ટિમનલને બંધ કરી દેવામાં આવે છે. બસ મથકમાં અંદર પહોંચવા પર પ્રતિબંધ લાગી જાય છે.
  • બસમથકમાં દિલ્હી પોલીસના જવાનો તૈનાત હતા અને બસ આવે તેની પ્રતીક્ષા કરી રહ્યા હતા.
  • ફરી હુમલા પછી જે દંપતી આ બસમાં સફર કરી રહ્યું હતું તે પણ મુસીબતનું માર્યું હતું. દિલ્હીના એપોલો હોસ્પિટલમાં થોડા સમય પહેલાં મહમદ આબિદનું લીવર ટ્રાન્સપ્લાન્ટ થયું હતું. મહમદ પત્ની સાથે હોસ્પિટલમાં ચેકઅપ માટે બસમાં દિલ્હી આવ્યા હતા.
  • શંકાનું વાતાવરણ પ્રવર્તી રહ્યું હોવાથી આરંભે તો તેઓ હિન્દી બીબીસી સાથે વાત કરવા તૈયાર નહોતા પરંતુ પછી રાજી થઈ ગયા.
  • મહમદ આબિદ પત્નીને લઈને ત્રીજીવાર ભારત આવ્યા, ભારતમાં કોઈ કુટુંબીજન ના હોવાથી દિલ્હીનાં એક ગેસ્ટહાઉસમાં ત્રણ દિવસનું રોકાણ કરવાના છે.
  • દર વર્ષે લોકો પાકિસ્તાનથી મોટી સંખ્યામાં સારવાર માટે ભારત આવે છે. મહમદ આબિદે જણાવ્યા મુજબ બંને દેશો માટે આ બસસેવા ખૂબ જરૂરી છે. જે લોકો વિમાનમાર્ગે ભારત આવવાનો ખર્ચ નથી ઉપાડી શકતાં તેઓ બસની મદદથી સરળતાથી એકબીજાના દેશમાં આવી જઈ શકે છે.
  • તેમને પૂછવામાં આવ્યું કે સ્થિતિમાં તંગદિલી પ્રવર્તી રહી છે તેવામાં ભારત આવવાનો અનુભવ કેવો લાગ્યો?
  • આ પ્રશ્નના ઉત્તરમાં મહમદ આબિદનાં પત્નીએ જણાવ્યું કે, ‘અહીં આવ્યા પછી એવો અનુભવ નથી થતો કે ભારત-પાકિસ્તાન વચ્ચે ઝઘડો ચાલે છે, પરંતુ બસ ખાલી કેમ આવી તે સમજાતું નથી. અહીં આવ્યા પછી કોણ હિંદુ છે અને કોણ મુસલમાન, કોણ પાકિસ્તાની છે કે કોણ ભારતીય, એવી કોઇ ઓળખ જોવા નથી મળતી.’

નીચે આપેલી લીંક પર ક્લિક કરીને જોડાઓ સંદેશ ન્યૂઝ સાથે.

તમે અમને ફેસબુક, ટ્વીટર, ઇન્સ્ટાગ્રામ અને યુ ટ્યુબ પર પણ લાઇક અને ફોલો કરી શકો છો.

લેટેસ્ટ ન્યૂઝ અપડેટ્સ તમારા ફોન પર સૌથી પહેલા મેળવવા માટે આજે જ ડાઉનલોડ કરો Sandeshની નવી મોબાઇલ એપ્લિકેશન