જુનાગઢ જિલ્લામાં ધોધમાર વરસાદ પડવાને લઈને રસ્તાઓનું ધોવાણ થયું છે, ખાસ કરીને મેંદરડા તાલુકામાં કરોડો રૂપિયાનું નુકસાન રસ્તાના ધોવાના કારણે થઈ આવવાનું સામે આવ્યું છે. 20 ઓગસ્ટના રોજ મેંદરડા તાલુકામાં અંદાજિત 12થી 13 ઈંચ જેટલો ભારે વરસાદ પડવાને કારણે ખેડૂતો અને સ્થાનિક માર્ગોને વ્યાપક નુકસાન થયું છે. આ અચાનક અને અતિશય વરસાદથી રસ્તાનું ધોવાણ થતાં લોકોને ભારે હાલાકી ભોગવવી પડી રહી છે. ત્યારે અનેક રસ્તાઓ સંપૂર્ણપણે ધોવાઈ ગયા છે. ભારે વરસાદને પગલે મેંદરડા તાલુકાના અનેક રસ્તાઓ ધોવાણ થયા બાદ ચાલવા જેવી સ્થિતિમાં રહ્યા નથી.
ઘણા રસ્તાઓ ધોવાઈ ગયા અને પુલિયા તૂટી ગયા
ભારે વરસાદે પરિસ્થિતિ વધુ ગંભીર બનાવી દીધી છે. ઘણા રસ્તાઓ ધોવાઈ ગયા છે અને પુલિયા તૂટી ગયા છે, જેના કારણે ગામડાઓનો સંપર્ક કપાઈ ગયો છે. ખાસ કરીને મેંદરડાથી ઝીંઝુડા જતો રસ્તો, ચીરોળા અને નતાળીયાના રસ્તાઓ સંપૂર્ણપણે બંધ થઈ ગયા છે. આ કારણે વિદ્યાર્થીઓ, વેપારીઓ અને સામાન્ય લોકોને અવરજવરમાં ભારે મુશ્કેલી પડી રહી છે. આ રસ્તાઓનું સમારકામ ઝડપથી કરાવવામાં આવે, પુલિયા રીપેર કરવામાં આવે અને જ્યાં ધોવાણ થયું છે ત્યાં માટી નાખીને તાત્કાલિક માર્ગો ચાલુ કરાવવામાં આવે તેવી રજૂઆત કરવામાં આવી છે. આ પરિસ્થિતિમાં સ્થાનિક તંત્ર પાસે તાત્કાલિક પગલાં લેવાની અપેક્ષા છે, જેથી ખેડૂતો અને સ્થાનિક નાગરિકોને રાહત મળી શકે. આમ તાત્કાલિક રસ્તાઓની મરામત કરવામાં આવે તેવી માગણી કરવામાં આવી છે.
