નવસારી જિલ્લામાં વીજ વિભાગની ગંભીર બેદરકારીનો એક મોટો કિસ્સો સામે આવ્યો છે, જેમાં 16 વર્ષીય કિશોરીએ જીવ ગુમાવ્યો છે. પ્રાથમિક માહિતી મુજબ DGVCLના વીજતારમાં ખામી હોવાને કારણે જીવંત તાર અચાનક તૂટીને નીચે પડી ગયો હતો. તે સમયે નજીકમાં હાજર કિશોરી તેના સંપર્કમાં આવતા જ તેને તીવ્ર કરંટ લાગ્યો હતો. ઘટના બનતા જ આસપાસના લોકોમાં ભય અને ગભરાટ ફેલાયો હતો. સ્થાનિક લોકોએ તાત્કાલિક કિશોરીને નજીકની હોસ્પિટલમાં ખસેડી હતી, જ્યાં તેને સારવાર આપવામાં આવી રહી હતી.
જવાબદાર અધિકારીઓ સામે કડક કાર્યવાહી કરવાની માગ
પરંતુ ગંભીર ઈજાઓને કારણે સારવાર દરમિયાન તેનું દુખદ અવસાન થયું હતું. આ ઘટનાને લઈને સ્થાનિકોમાં ભારે રોષ જોવા મળી રહ્યો છે. લોકોનો આક્ષેપ છે કે DGVCL દ્વારા વીજતારોની યોગ્ય દેખરેખ રાખવામાં આવતી નથી, જેના કારણે આવા જીવલેણ બનાવો બને છે. સ્થાનિકોએ જવાબદાર અધિકારીઓ સામે કડક કાર્યવાહી કરવાની માગ ઉઠાવી છે. હાલમાં પોલીસ દ્વારા મામલાની તપાસ શરૂ કરવામાં આવી છે અને સમગ્ર ઘટનાની વિગતવાર માહિતી એકત્રિત કરવામાં આવી રહી છે. આ દુર્ઘટનાએ ફરી એકવાર વીજ સુરક્ષાના મુદ્દે ગંભીર પ્રશ્નો ઉભા કર્યા છે.
