ગુજરાત કોંગ્રેસમાં જૂથવાદ ચરમસીમાએ પહોંચ્યો છે. જૂનાગઢમાં શરૂ થયેલી કોંગ્રેસની પ્રશિક્ષણ શિબિરમાં રાહુલ ગાંધી કાર્યકરોને સંગઠનના પાઠ ભણાવી રહ્યાં છે. ત્યારે આ શિબિરમાં કોંગ્રેસના બે જિલ્લા પ્રમુખોની ગેરહાજરી ઉડીને આંખે વળગી રહી છે. અમરેલી જિલ્લાના પ્રતાપ દૂધાત અને ગીર સોમનાથ જિલ્લાના પૂંજાભાઈ વંશ આ શિબિરમાં ગેર હાજર રહેતા અનેક સવાલો ઉભા થયાં છે. બંનેની ગેરહાજરીને લઈને કોંગ્રેસના નેતાઓ તેમને બચાવવાની ભૂમિકામાં આવી ગયાં છે.
પ્રશિક્ષણ શિબિરનો અંતિમ તબક્કો ચાલી રહ્યો છે
જૂનાગઢમાં યોજાઈ રહેલી પ્રશિક્ષણ શિબિરનો અંતિમ તબક્કો ચાલી રહ્યો છે. આ શિબિરમાં કોંગ્રેસના મોવડી મંડળને ગુજરાતના 14 જિલ્લાના પ્રમુખોની કામગીરી નબળી હોવાનો રીપોર્ટ મળ્યો છે. કોંગ્રેસના મોવડી મંડળે તેમને કામગીરી સુધારો અથવા કાર્યવાહી માટે તૈયાર રહો તેવું સ્પષ્ટ જણાવી દીધું છે. આ પ્રમુખોને કામગીરી સુધારવા માટે 90 દિવસનો સમય આપવામાં આવ્યો છે. 14 જિલ્લામાં મોટા ભાગના જિલ્લા સૌરાષ્ટ્ર ઝોનના હોવાનું જાણવા મળ્યું છે. રાજ્યમાં માત્ર 9 જિલ્લામાં જ પ્રમુખોની કામગીરી સંતોષકારક હોવાનું જાણવા મળ્યું છે.
