સુરતમાં સરકારી નોકરી અપાવવાના નામે છેતરપિંડીનો બનાવ સામે આવ્યો છે, જેમાં એક વ્યક્તિ પાસેથી અંદાજે 4 લાખ રૂપિયા પડાવી લેવામાં આવ્યા હતા. આરોપીએ પોતે સરકારી નોકરીમાં લગાડી આપવાની ખાતરી આપીને ભોગ બનનારને વિશ્વાસમાં લીધો હતો અને તબક્કાવાર મોટી રકમ વસૂલ કરી હતી. બાદમાં લાંબા સમય સુધી કોઈ નોકરી ન મળતા પીડિતને છેતરપિંડી થયાની શંકા ઉભી થઈ અને તેણે પોલીસમાં ફરિયાદ નોંધાવી.
અન્ય સંડોવાયેલા લોકો વિશે માહિતી મેળવવાનો પ્રયત્ન
ફરિયાદ મળતાં જ પોલીસે તાત્કાલિક તપાસ હાથ ધરી હતી. ત્રણ દિવસ સુધી સતત તપાસ, ટેકનિકલ સર્વેલન્સ અને અલગ-અલગ સ્થળોએ શોધખોળ કર્યા બાદ પોલીસે આરોપી અશ્વિન પાડવીને ઝડપી પાડવામાં સફળતા મેળવી. આરોપી પકડાય નહીં તે માટે રાજ્ય બહાર ભાગી જવાનો પ્રયાસ કરી રહ્યો હતો. પોલીસે મહારાષ્ટ્ર બોર્ડર નજીકથી તેને ઝડપી પાડી આગળની કાર્યવાહી હાથ ધરી છે. પ્રાથમિક તપાસમાં જાણવા મળ્યું છે કે આરોપીએ આ પ્રકારની છેતરપિંડી અન્ય લોકો સાથે પણ કરી હોવાની શક્યતા છે. હાલ પોલીસ સમગ્ર મામલે વધુ તપાસ કરી રહી છે અને અન્ય સંડોવાયેલા લોકો વિશે માહિતી મેળવવાનો પ્રયત્ન કરી રહી છે.
