સુરતના રાજ ટેક્સટાઈલ માર્કેટમાં 13 દિવસ પહેલા ભયાનક આગ લાગી હતી. ત્યારે આગની આ ઘટનાના 13 દિવસ બાદ આજથી ટેક્સટાઈલ માર્કેટ ફરી શરૂ થઈ ગયું છે. ઉલ્લેખનીય છે કે હાલમાં તંત્ર દ્વારા A અને C વિંગ શરૂ કરવાની મંજૂરી આપી છે પણ જે વિંગમાં આગ લાગી હતી તે B વિંગ હજુ પણ બંધ હાલતમાં છે. જો કે A અને c વીંગ શરૂ થતા વેપારીઓએ ભગવાનની પૂજા અર્ચના કરીને ધંધાની શરૂઆત કરી દીધી છે.
13 દિવસ માર્કેટ બંધ રહેતા વેપારીઓને લાખોનું નુકસાન
ઉલ્લેખનીય છે કે છેલ્લા 13 દિવસથી માર્કેટ બંધ રહ્યું હોવાને લઈ પ્રતિદિન પ્રત્યેક વેપારીને 2 લાખથી લઈને 5 લાખ સુધીનું નુકસાન થયું હોવાનું અનુમાન લગાવવામાં આવી રહ્યું છે. ત્યારે હવે વેપારીએ પ્રભુને પ્રાર્થના કરી કે ફરી આવી દુર્ઘટના ન બને, દુર્ઘટના બાદ A અને C વીંગના વેપારીઓએ આજથી પોતાના ધંધાની શરૂઆત કરી દીધી છે. ઉલ્લેખનીય છે કે ટેક્સટાઈલ માર્કેટમાં લાગેલી આગ એટલી બેકાબૂ બની હતી કે 7 કલાક પસાર થવા છતાં પણ આગ કાબુમાં આવી નહતી. બિલ્ડિંગના 9માં માળે દુકાનોમાં આગ લાગી હતી.
