ગુજરાતમાં ચોમાસુ વાતાવરણ પૂર્ણપણે જામ્યું છે. રાજ્યમાં 'અપર એર સાયક્લોનિક' સિસ્ટમ સક્રિય થવાના કારણે હવામાન વિભાગ દ્વારા સમગ્ર ગુજરાતમાં સાર્વત્રિક ભારેથી અતિભારે વરસાદની શકયતા વ્યકત કરવામાં આવી છે. આગામી દિવસોમાં ઉત્તર, મધ્ય અને દક્ષિણ ગુજરાતના મોટાભાગના વિસ્તારોમાં મેઘરાજા ધમાકેદાર ઇનિંગ્સ રમે તેવી શક્યતા છે
અમદાવાદ, વડોદરા અને સુરતમાં પણ ભારે વરસાદી ઝાપટાં યથાવત
રાજ્યના મેટ્રો સિટી અમદાવાદ, વડોદરા અને સુરતમાં પણ ભારે વરસાદી ઝાપટાં યથાવત રહેશે. દક્ષિણ ગુજરાતના વાપી, ઉમરગામ, નવસારી, વલસાડ અને સુરત જિલ્લામાં ભારે વરસાદ માટે અલર્ટ જાહેર કરાયું છે. આ સિવાય સૌરાષ્ટ્ર અને કચ્છ ક્ષેત્રના ભુજ સહિતના વિવિધ ભાગો, મોરબી, રાજકોટ, જુનાગઢ, અમરેલી, ઉના અને વેરાવળ જેવા વિસ્તારોમાં પણ ધોધમાર વરસાદી માહોલ જામવાની પૂરેપૂરી સંભાવના છે.
રાજ્યના કુલ 137 તાલુકાઓમાં મેઘરાજાની નોંધપાત્ર પધરામણી
છેલ્લા 24 કલાક દરમિયાન રાજ્યના કુલ 137 તાલુકાઓમાં મેઘરાજાની નોંધપાત્ર પધરામણી થઈ છે. જેમાં સૌથી વધુ વલસાડના કપરાડામાં 4 ઈંચ અને બનાસકાંઠાના અમીરગઢમાં 3.5 ઈંચ વરસાદ ખાબક્યો છે. આ ઉપરાંત બનાસકાંઠાના ડીસામાં 3 ઈંચ, વાવ-થરાદના રાહ વિસ્તારમાં 2.5 ઈંચ તેમજ મહેસાણા, સુરતના ઉમરપાડા અને વલસાડના નાનાપૌંડામાં 2-2 ઈંચ વરસાદ નોંધાયો છે. જ્યારે બનાસકાંઠાના વડગામમાં 1.5 ઈંચ અને રાજ્યના અન્ય 129 તાલુકાઓમાં હળવાથી મધ્યમ સ્વરૂપે નોંધપાત્ર વરસાદ વરસ્યો છે.
129 તાલુકાઓમાં પણ હળવાથી મધ્યમ વરસાદી ઝાપટાં
આ સિવાય રાજ્યના અન્ય 129 તાલુકાઓમાં પણ હળવાથી મધ્યમ વરસાદી ઝાપટાં નોંધાયા છે. સાયક્લોનિક સિસ્ટમ સતત મજબૂત બની રહી હોવાથી નીચાણવાળા વિસ્તારો અને દરિયાકાંઠાના વિસ્તારોમાં તંત્રને એલર્ટ મોડ પર રાખવામાં આવ્યું છે.
આ પણ વાંચો : Sandesh Indepth : ગુજરાતમાં તો અલ-નીનોની અસર હતી તો પછી એવું શું થયું કે 14 કલાકમાં અનેક સ્થળે 16 ઇંચ વરસાદ ખાબક્યો?
