માલદીવ સરકારની ફરી આડોડાઈ, ભારતીય હેલિકોપ્ટર, ક્રૂનું સંચાલન કરવાનો નિર્ણય કર્યો

• ફરી એકવાર માલદીવ અને ભારત આમને-સામને
  
• માલદીવ ભારતીય હેલિકોપ્ટરનું સંચાલન પોતે કરશે તેવો નિર્ણય લેવાયો
• 10 મે સુધી માલદીવમાંથી તમામ સૈન્યને હટાવી દેવાશે

છેલ્લા ઘણા સમયથી ભારત અને માલદીવ વચ્ચે સંબંધો વણસ્યા છે. આટલું ઓછું હોય તેમ માલદીવ્સ નેશનલ ડિફેન્સ ફોર્સ (MNDF) માટે પ્લાનિંગ, પોલિસી અને રિસોર્સ મેનેજમેન્ટના પ્રિન્સિપલ ડાયરેક્ટર કર્નલ અહેમદ મુજુથબા મોહમ્મદે પત્રકાર પરિષદમાં જણાવ્યું હતું કે માલદીવ્સમાંથી ભારતીય સૈનિકો પાછા ખેંચવા માટે ચર્ચા ચાલી રહી છે. તેમણે ભારપૂર્વક જણાવ્યું હતું કે રાષ્ટ્રપતિ મોહમ્મદ મોઈજ્જુની સરકારે 10 મે પછી માલદીવમાં કોઈપણ વિદેશી સૈન્ય ટુકડીને તૈનાત કરવાની મંજૂરી ન આપવાનો નિર્ણય કર્યો છે, મળતી માહિતી અનુસાર, ગયા અઠવાડિયે, ભારતે જણાવ્યું હતું કે ટાપુ રાષ્ટ્રમાં નવા અને હળવા હેલિકોપ્ટરનું સંચાલન કરતા લશ્કરી કર્મચારીઓને બદલવા માટે તેની તકનીકી નિષ્ણાતોની પ્રથમ નાગરિક ટીમ માલદીવ આવી છે.

તકનીકી કર્મચારીઓની પ્રથમ ટીમ માલદીવ પહોંચી

વિદેશ મંત્રાલયના પ્રવક્તા રણધીર જયસ્વાલે 29 ફેબ્રુઆરીએ સાપ્તાહિક પ્રેસ કોન્ફરન્સમાં જણાવ્યું હતું કે, "અદ્યતન લાઇટ હેલિકોપ્ટરનું સંચાલન કરવા માટે તકનીકી કર્મચારીઓની પ્રથમ ટીમ માલદીવ પહોંચી ગઈ છે." તે હાલના કર્મચારીઓનું સ્થાન લેશે જેઓ આ પ્લેટફોર્મનું સંચાલન કરતા હતા.

ભારત 10 મે સુધીમાં તમામ સૈન્ય કર્મચારીઓને બે તબક્કામાં હટાવી દેશે

ભારતીય સૈન્ય કર્મચારીઓને પાછા ખેંચવાના મુદ્દાને ઉકેલવા માટે રચાયેલ ઉચ્ચ સ્તરીય કોર જૂથની બીજી બેઠક પછી, માલદીવના વિદેશ મંત્રાલયે કહ્યું હતું કે ભારત 10 મે સુધીમાં તેના તમામ સૈન્ય કર્મચારીઓને બે તબક્કામાં પાછા ખેંચી લેશે.

મોઈજ્જુએ રાષ્ટ્રપતિ પદ સંભાળ્યા બાદ આ મુદ્દો ઉઠાવ્યો હતો

 માલદીવ સાથે ભારતના સંબંધો ત્યારે તણાવમાં આવ્યા જ્યારે ચીન તરફી નેતા મોહમ્મદ મોઈજ્જુએ નવેમ્બરમાં રાષ્ટ્રપતિ પદ સંભાળ્યા બાદ કહ્યું હતું કે તેઓ દેશમાંથી તમામ ભારતીય સૈન્ય કર્મચારીઓને હાંકી કાઢવાનું તેમનું ચૂંટણી વચનને નિભાવશે.