અમેરિકાએ વેનેઝુએલા પર હુમલો કર્યો છે. અમેરિકાએ વેનેઝુએલાની રાજધાની કારાકાસમાં એક મુખ્ય લશ્કરી થાણા પર હુમલો કર્યો છે. કારાકાસમાં નૌકાદળના બેઝ પર હુમલો કરવામાં આવ્યો છે. પેન્ટાગોને નૌકાદળના બેઝને નિશાન બનાવ્યું હતું.
ઓછામાં ઓછા સાત વિસ્ફોટો સાંભળવામાં આવ્યા
શનિવારે સવારે લગભગ 2 વાગ્યે, વેનેઝુએલાની રાજધાની કારાકાસમાં ઓછામાં ઓછા સાત વિસ્ફોટો સાંભળવામાં આવ્યા હતા. શહેર ઉપર ધુમાડાના ગોટેગોટા ઉડતા જોવા મળ્યા હતા.
પહેલો વિસ્ફોટ સ્થાનિક સમય મુજબ રાત્રે 1:50 વાગ્યે થયો
શનિવારે રાત્રે વેનેઝુએલાની રાજધાની કારાકાસમાં CNN ટીમે અનેક વિસ્ફોટો જોયા હતા. પહેલો વિસ્ફોટ સ્થાનિક સમય મુજબ રાત્રે 1:50 વાગ્યે થયો હતો. CNN સંવાદદાતા ઓસ્મરી હર્નાન્ડેઝે જણાવ્યું હતું કે, "એક વિસ્ફોટ એટલો શક્તિશાળી હતો કે તેનાથી મારી બારી હલી ગઈ. વિસ્ફોટો પછી, કારાકાસના ઘણા વિસ્તારોમાં વીજળી ગુલ થઈ ગઈ. ઘણા વિમાનો પણ ઉડતા જોવા મળ્યા."
લોકો ઘરોમાંથી બહાર નીકળી આવ્યા
વેનેઝુએલાની સરકારે આ ઘટના પર તાત્કાલિક કોઈ ટિપ્પણી કરી ન હતી. વિસ્ફોટો સાંભળીને શહેરના અનેક વિસ્તારોમાં લોકો રસ્તાઓ પર દોડી આવ્યા હતા. કારાકાસમાં દૂર-દૂરથી ભીડ જોવા મળી હતી.
અમેરિકા સાથે લાંબા સમયથી તણાવ
આ હુમલો એવા સમયે થયો છે જ્યારે તાજેતરના દિવસોમાં અમેરિકન સૈન્ય ડ્રગ હેરફેર માટે ઉપયોગમાં લેવાતી બોટોને નિશાન બનાવી રહ્યું છે. શુક્રવારે, વેનેઝુએલાએ જણાવ્યું હતું કે તે ડ્રગ હેરફેર રોકવા માટે અમેરિકા સાથે વાટાઘાટો કરવા તૈયાર છે. રાષ્ટ્રપતિ નિકોલસ માદુરોએ એવો પણ આરોપ લગાવ્યો હતો કે અમેરિકા સરકાર બદલવા અને વેનેઝુએલાના વિશાળ તેલ ભંડારમાં પ્રવેશ મેળવવા માંગે છે. તેમના મતે, ઓગસ્ટમાં કેરેબિયન સમુદ્રમાં મોટા પાયે લશ્કરી તૈનાતી સાથે દબાણ અભિયાન શરૂ કરવામાં આવ્યું હતું.
ટ્રમ્પે ચેતવણી આપી હતી
આ હુમલા પહેલા, અમેરિકાના રાષ્ટ્રપતિ ડોનાલ્ડ ટ્રમ્પે વેનેઝુએલાના લોકોને વારંવાર ચેતવણી આપી હતી કે અમેરિકા વેનેઝુએલામાં કથિત ડ્રગ હેરફેર નેટવર્ક્સ સામે નવી કાર્યવાહી કરવાની તૈયારી કરી રહ્યું છે. ઓક્ટોબરમાં, ટ્રમ્પે કહ્યું હતું કે તેમણે CIA ને વેનેઝુએલાની અંદર કામ કરવા માટે અધિકૃત કર્યા છે જેથી ત્યાંથી ગેરકાયદેસર ડ્રગ હેરફેર અને સ્થળાંતર કરનારાઓના પ્રવાહને રોકી શકાય.. CNN એ ટિપ્પણી માટે વ્હાઇટ હાઉસનો સંપર્ક કર્યો છે, પરંતુ હજુ સુધી કોઈ જવાબ મળ્યો નથી.