કેનેડામાં મોસ્ટ વોન્ટેડ થયો ગેંગસ્ટર ગોલ્ડી બ્રાર, ટોપ 25 ગુનેગારોની યાદીમાં સમાવેશ

• બી ઓન ધ લુકઆઉટ યાદીમાં મૂકવામાં આવ્યો
  
• ભારતે આ મુદ્દો કેનેડા સરકાર સમક્ષ ઉઠાવ્યો છે
• પંજાબી ગાયક સિદ્ધુ મુસેવાલા હત્યા કેસનો મુખ્ય આરોપી 
  

પંજાબી ગાયક સિદ્ધુ મુસેવાલાની હત્યાના મુખ્ય આરોપી ગેંગસ્ટર ગોલ્ડી બ્રારની મુશ્કેલીઓ વધી ગઈ છે. કેનેડિયન પોલીસે જાહેર કરેલા 25 મોસ્ટ વોન્ટેડ ગુનેગારોની યાદીમાં ગોલ્ડી બ્રારનું નામ સામેલ કરવામાં આવ્યું છે. તે યાદીમાં 15મા નંબરે છે. તેના પર ઈનામ પણ રાખવામાં આવ્યું છે, કેનેડામાં તેના પર હત્યાનો આરોપ છે.

રોયલ કેનેડિયન માઉન્ટેડ પોલીસના કહેવા પર ગોલ્ડી બ્રારને આ યાદીમાં સામેલ કરવામાં આવ્યો છે. કેનેડા પોલીસે ગોલ્ડી બ્રાર પર ઇન્ટરપોલના આદેશ પર આ કાર્યવાહી કરી છે. ગોલ્ડી બ્રારને કેનેડા સરકાર દ્વારા બી ઓન ધ લુકઆઉટ  યાદીમાં મૂકવામાં આવ્યો છે. તાજેતરમાં જ નેશનલ ઈન્વેસ્ટિગેશન એજન્સી NIAએ ગોલ્ડી બ્રાર અને તેના સહયોગીઓ લોરેન્સ બિશ્નોઈ, અનમોલ બિશ્નોઈ વિરુદ્ધ ચાર્જશીટ દાખલ કરી હતી. જેમાં તેના આતંકવાદી સંગઠનો સાથે સંબંધ હોવાનો દાવો કરવામાં આવ્યો છે.

ભારતે આ મુદ્દો કેનેડા સરકાર સમક્ષ ઉઠાવ્યો છે

ભારત સરકાર ગેંગસ્ટર ગોલ્ડી બ્રારને લઈને કેનેડા સરકાર સમક્ષ આ મુદ્દો ઘણી વખત ઉઠાવી ચૂકી છે. ભારતે કેનેડાની સરકારને ઘણી વખત કહ્યું છે કે ભારત વિરુદ્ધ આતંકવાદી ગતિવિધિઓ માટે તેની જમીનનો ઉપયોગ ન થવા દે.

જ્યારે 29 મે, 2022ના રોજ પંજાબના ગાયક સિદ્ધુ મુસેવાલાની માનસામાં હત્યા કરવામાં આવી હતી, ત્યારે ગેંગસ્ટર ગોલ્ડી બ્રાર હુમલાની જવાબદારી સ્વીકારનાર પ્રથમ વ્યક્તિ હતો. બ્રાર પર આરોપ છે કે તેણે કેનેડામાં બેસીને મુસેવાલાની હત્યાનો આખો પ્લાન ઘડ્યો હતો. તે સતત સૂચના આપી રહ્યો હતો અને શૂટરોને ઘટનાને અંજામ આપવામાં મદદ કરી રહ્યો હતો.

CMએ કસ્ટડીનો દાવો કર્યો હતો

પંજાબના મુખ્યમંત્રી ભગવંત માને થોડા મહિના પહેલા દાવો કર્યો હતો કે અમેરિકાની સુરક્ષા એજન્સીઓએ ગેંગસ્ટર ગોલ્ડી બ્રારને કસ્ટડીમાં લીધો છે. જો કે, બાદમાં બ્રારે પોતે આગળ આવ્યો અને એક મુલાકાતમાં અટકાયતમાં લેવાના આરોપોને નકારી કાઢ્યા હતા.