જો તમે ઉચ્ચ અભ્યાસ માટે વિદેશ જવાનું સપનું જોતા હોવ અને ખાસ કરીને કેનેડામાં અભ્યાસ કરવા માંગતા હો, તો શક્ય છે કે આ વર્ષે તમારું સ્વપ્ન અધૂરું રહી જાય. કેનેડાએ આ વર્ષે તેના સ્ટુડન્ટ વિઝા નિયમોને કડક બનાવ્યા છે અને પાછલા વર્ષોની સરખામણીમાં આ વખતે ઘણા ઓછા વિઝા આપવાની યોજના બનાવી છે. એક રિપોર્ટ મુજબ કેનેડાની આ નવી નીતિ ભારતીય વિદ્યાર્થીઓ માટે ત્યાં જઈને અભ્યાસ કરવાનું પહેલા કરતા વધુ મુશ્કેલ બનાવી શકે છે.
રિપોર્ટ મુજબ કેનેડામાં જાહેર કરાયેલા સ્ટુડન્ટ વિઝાની સંખ્યામાં આ વર્ષે લગભગ 50%નો ઘટાડો થવાની સંભાવના છે. કેનેડા દર વર્ષે મોટી સંખ્યામાં વિઝા આપે છે, પરંતુ આ વખતે આ સંખ્યા અડધી થઈ શકે છે. એપ્લાય બોર્ડ રિપોર્ટ નોંધે છે કે કેનેડા આવતા વિદેશી વિદ્યાર્થીઓની સંખ્યાને 2018 અને 2019ના સ્તરો સુધી મર્યાદિત કરવાની યોજના બનાવવામાં આવી રહી છે.
કેનેડામાં વણસી પરિસ્થિતિ
2024ના શરૂઆતના મહિનામાં જ ભારતીય વિદ્યાર્થીઓ માટે સ્ટુડન્ટ વિઝાની મંજૂરીમાં ઘટાડો થયો છે, જે દર્શાવે છે કે સ્થિતિ વધુ વણસી શકે છે. રિપોર્ટમાં એમ પણ કહેવામાં આવ્યું છે કે 2023માં કેનેડાએ 4,36,000 સ્ટડી પરમિટ જાહેર કરી હતી, પરંતુ 2024ના અંત સુધીમાં આ સંખ્યા ઘટીને માત્ર 2,31,000 થઈ શકે છે. આનો અર્થ એ થયો કે ગયા વર્ષની સરખામણીમાં આ વર્ષે 39% ઓછી સ્ટડી પરમિટ જાહેર કરવામાં આવશે.
કેનેડામાં સૌથી વધારે ભારતીય વિદ્યાર્થીઓ કરે છે અભ્યાસ
મીડિયા રિપોર્ટ મુજબ દર વર્ષે મોટી સંખ્યામાં ભારતીય વિદ્યાર્થીઓ કેનેડા ભણવા જાય છે. 2022માં કેનેડા આવેલા કુલ 5.5 લાખ આંતરરાષ્ટ્રીય વિદ્યાર્થીઓમાંથી 2.26 લાખ વિદ્યાર્થીઓ એકલા ભારતના હતા. હાલમાં કેનેડામાં 3.2 લાખ ભારતીય વિદ્યાર્થીઓ અભ્યાસ કરે છે અને કામ કરે છે, જે ત્યાંના અર્થતંત્રમાં નોંધપાત્ર યોગદાન આપે છે. કેનેડાએ આ વર્ષે વિદેશી વિદ્યાર્થીઓની સંખ્યા મર્યાદિત કરવાનો નિર્ણય શા માટે લીધો તેની પાછળના ઘણા કારણો હોઈ શકે છે. નાણાકીય બોજ વધવાને કારણે ઈમિગ્રેશન પોલિસી કડક કરવામાં આવી છે. જેની સીધી અસર તે વિદ્યાર્થીઓ પર પડી રહી છે જેઓ ઉચ્ચ શિક્ષણ માટે કેનેડા જવા માંગતા હતા.
Disclaimer: અહીં આપેલી તમામ માહિતી માત્ર જાણકારી માટે છે. સંદેશ ન્યૂઝ તેની પુષ્ટિ કરતું નથી.
